តើ អាមេរិក និយាយបែបណា ពេលអ៊ុយក្រែន ធ្វើឃាតប្រធានកងកម្លាំងនុយក្លេអ៊ែរ រុស្ស៊ី?

ឆ្លើយតបទៅការចោទប្រកាន់របស់អ្នកនាំពាក្យក្រសួងការពារជាតិរុស្ស៊ី ដែលថា សម្ព័ន្ធមិត្តលោកខាងលិចរបស់អ៊ុយក្រែន បានសមគំនិត ធ្វើឃាតប្រធានកងកម្លាំងនុយក្លេអ៊ែររុស្ស៊ី លោក Igor Kirillov, សហរដ្ឋអាមេរិក បានចេញមុខបដិសេធថា ខ្លួនគ្មានជាប់ពាក់ព័ន្ធអ្វីឡើយ ចំពោះការវាយប្រហារនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ Moscow Times នៅថ្ងៃពុធទី១៨ខែធ្នូឆ្នាំ២០២៤, អ្នកនាំពាក្យក្រសួងការពារជាតិអាមេរិកលោក Matthew Miller និយាយថា «ខ្ញុំសូមប្រាប់ថា សហរដ្ឋអាមេរិក មិនបានដឹងអ្វីមុនឡើយនៃការសម្លាប់នេះ ហើយក៏មិនជាប់ពាក់ព័ន្ធដែរ»។

យ៉ាងណា លោក Miller បានចង្អុលចំៗថា មេទ័ពរុស្ស៊ីម្នាក់នេះបានប្រព្រឹត្តអំពើឃោរឃៅច្រើនណាស់ ហើយជាអ្នកបញ្ជាឲ្យប្រើសារធាតុគីមីនៅលើសមរភូមិ បំពានសិទ្ធិសញ្ញាអាវុធគីមី។

លោក Kirillov គឺជាមន្ត្រីយោធាឋានៈខ្ពស់បំផុត ដែលត្រូវធ្វើឃាតចាប់តាំងពីទីក្រុងមូស្គូ បើកប្រតិបត្តិការវាយលុកអ៊ុយក្រែនមក។ គាត់និងជំនួយការបានបាត់បង់ជីវិត នៅពេលគ្រាប់បែកបង្កៃក្នុងកង់ស្គីអេឡិចត្រូនិច ត្រូវគេបញ្ជាពីចម្ងាយឲ្យផ្ទុះ ខណៈគាត់ដើរចេញពីផ្ទះក្នុងទីក្រុងមូស្គូ។

ភ្លាមៗនោះ សេវាសន្តិសុខអ៊ុយក្រែនហៅកាត់ SBU បានចេញមុខអះអាងទទួលខុសត្រូវចំពោះការវាយប្រហារនេះ ដោយបញ្ជាក់ថា «លោក Igor Kirillov ដែលជាប្រធានកងកម្លាំងការពារនុយក្លេអ៊ែរ ជីវសាស្ត្រ គីមី (NBC) គឺជាឧក្រិដ្ឋជនសង្គ្រាមនិងជាគោលដៅស្របច្បាប់របស់អ៊ុយក្រែន​ ព្រោះគាត់ជាអ្នកចេញបញ្ជាឲ្យប្រើប្រាស់អាវុធគីមីដែលគេហាមឃាត់ ដើម្បីប្រឆាំងនឹងយោធាទីក្រុងកៀវ។ ដូច្នេះ ការសងសឹកចំពោះឧក្រិដ្ឋកម្មសង្រ្គាមនេះ គឺចៀសមិនរួចឡើយ»។

លោក Kirillov វ័យ៥៤ឆ្នាំ បានដឹកនាំ​ NBC ចាប់តាំងពីឆ្នាំ២០១៧មក ហើយបានក្លាយជាមន្ត្រីយោធាមានមុខមានមាត់ខ្លាំង ដោយសារតែគាត់ចេះដឹងជ្រៅជ្រះអំពីរឿងដែលអ៊ុយក្រែននិងសហរដ្ឋអាមេរិក ប្រើប្រាស់អាវុធគីមីនៅលើសមរភូមិ។

គាត់ក៏អះអាងមានព័ស្តុតាង ដែលបង្ហាញថា​ សហរដ្ឋអាមេរិក បានធ្វើប្រតិបត្តិការជាបណ្តាញក្នុងមន្ទីរពិសោធន៍ជីវសាស្ត្រនៅប្រទេសអ៊ុយក្រែននិងកន្លែងផ្សេងទៀត ដែលជាការគំរាមកំហែងធំធេងដល់ប្រជាជនស៊ីវិលផងដែរ។

កាលពីខែតុលា ចក្រភពអង់គ្លេសបានដាក់ទណ្ឌកម្មលើលោក Kirillov ដោយនិយាយថា បុរសម្នាក់នេះជាអ្នកទទួលខុសត្រូវលើការប្រើប្រាស់អាវុធគីមីក្នុងប្រទេសអ៊ុយក្រែន ហើយដើរតួសំខាន់ក្នុងការបំភ្លៃព័ត៌មានរបស់វិមានក្រឹមឡាំង៕

អត្ថបទ៖ សុខ សុវណ្ណ

ចុចអាន៖ អ៊ុយក្រែន អះអាងថា ខ្លួនជាអ្នកសម្លាប់ប្រធាន កងកម្លាំងនុយក្លេអ៊ែររុស្ស៊ី