ចិន ប្រហារជីវិតអតីតមន្ត្រីកំពូលម្នាក់ ពីបទពុករលួយ ពាក់ព័ន្ធទឹកប្រាក់ ៤១២លានដុល្លារ

តាមសេចក្តីរាយការណ៍របស់ RT កាលពីថ្ងៃអង្គារទី១៧ខែធ្នូឆ្នាំ២០២៤, ប្រទេសចិន បានប្រហារជីវិតអតីតមន្ត្រីកំពូលម្នាក់ ដែលត្រូវកាត់ទោសពីបទអំពើពុករលួយ ពាក់ព័ន្ធទឹកប្រាក់ជាង ៣ពាន់លានយ័ន (៤១២លានដុល្លារអាមេរិក)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងខែកញ្ញាឆ្នាំ២០២២ តុលាការក្នុងតំបន់ស្វយ័ត North Inner Mongolia រកឃើញថា លោក Li Jianping អាយុ៦៤ឆ្នាំ ដែលជាអតីត​លេខា​គណៈកម្មាធិការ​ការងារ​បក្ស​កុម្មុយនិស្ត​នៃ​តំបន់​អភិវឌ្ឍន៍​សេដ្ឋកិច្ចនិង​បច្ចេកវិទ្យា Hohhot មានពិរុទ្ធពីបទឧក្រិដ្ឋកម្ម រួមទាំងការស៊ីសំណូក, រឹបអូសយកថវិការដ្ឋ និងឃុបឃិតជាមួយក្រុមឧក្រិដ្ឋកម្ម ហើយគាត់ក៏ត្រូវកាត់ទោសប្រហារជីវិត។

លុះមកដល់ខែសីហាឆ្នាំនេះ គាត់​បានចាញ់បណ្តឹង​ឧទ្ធរណ៍។ សាលក្រមក៏​ត្រូវ​បាន​អនុម័ត​ដោយ​តុលាការ​ប្រជាជន​កំពូល​ចិន ហើយការប្រហារជីវិត បានធ្វើឡើងកាលពីថ្ងៃអង្គារ។

តុលាការកំពូលរកឃើញថា លោក Li បានយកប្រាក់ជាង១៩៧លានដុល្លារ ពីមូលនិធិក្រុមហ៊ុនរដ្ឋ ទៅប្រើមិនត្រឹមត្រូវតាមរយៈមធ្យោបាយបោកប្រាស់ ខណៈក្នុងនោះ មានប្រាក់ជាង៣៩.៦លានដុល្លារ មិនទាន់យកបានមកវិញនៅឡើយទេ។

លើសពីនេះ គាត់ថែមទាំងស៊ីសំណូកជាង ៧៩.២លានដុល្លារផងដែរ ហើយកិបកេងមូលនិធិរដ្ឋជាង ១៣៧លានដុល្លារទៀត។

សូមបញ្ជាក់ថា ចាប់តាំងពីអាណត្តិទី៣ក្នុងឆ្នាំ២០២២មក ប្រធានាធិបតីចិនលោក ស៊ី ជីនពីង បានបង្កើនយុទ្ធនាការប្រឆាំងអំពើពុករលួយដោយមិនយល់យោគឡើយ។ ជាក់ស្តែង មហាសេដ្ឋីនិងធនាគារិកជាច្រើននាក់ ត្រូវបានបណ្តេញចេញពីបក្ស ឬជាប់គុកក្នុងប្រតិបត្តិការបោសសម្អាតនេះ៕

អត្ថបទ៖ សុខ សុវណ្ណ

ចុចអាន៖ ជប៉ុន​ កាត់ទោសប្រហារជីវិតឃាត ក ម្នាក់ពីបទសម្លាប់រង្គាល