ហាម៉ាស៖ បទ​ឈប់បាញ់​ហ្គាហ្សាម្ដង​នេះ គឺ​ច្បាស់លាស់ និង​វិជ្ជមាន

ក្រុម​​ហាម៉ាស បាននិយាយថា កិច្ចពិភាក្សាក្នុងប្រទេសកាតាកាលពីថ្ងៃអង្គារ​ទី១៧​ធ្នូ ដែល​ផ្តោត​លើ​បទឈប់បាញ់ និងការដោះដូរអ្នកទោសចំណាប់ខ្មាំងនៅ​តំបន់​ហ្គាហ្សា គឺ «ច្បាស់លាស់ និងវិជ្ជមាន»។

សេចក្ដី​ថ្លែងការណ៍​របស់​​ក្រុម​សកម្ម​ប្រយុទ្ធ​ប៉ាឡេស្ទីន បាន​រៀបរាប់​ថា៖ «ក្រុមហាម៉ាស បញ្ជាក់ថា ដោយ​មាន​ការពិភាក្សាដ៏ច្បាស់លាស់ និងវិជ្ជមានដែលធ្វើឡើងនៅថ្ងៃនេះ នៅទីក្រុងដូហា ក្រោមការជួយ​​ពីបងប្អូនកាតា និងអេហ្ស៊ីបរបស់យើង ការ​ឈានដល់កិច្ចព្រមព្រៀងមួយសម្រាប់បទឈប់បាញ់ និងការដោះដូរអ្នកទោស គឺអាចធ្វើទៅបាន បើការ​លុកលុយ​បញ្ឈប់​ដើម្បី​ដាក់លក្ខខណ្ឌថ្មី»។

មន្ត្រីជាន់ខ្ពស់ក្រុមហាម៉ាស ដែលមានមូលដ្ឋាននៅទីក្រុងដូហា បាននិយាយកាលពីថ្ងៃចន្ទថា កិច្ចព្រមព្រៀ​ង​គឺ​ជិត​បាន​សម្រេច​ជាង​ពេល​ណាណា​ទាំង​អស់ ប៉ុន្តែបានព្រមានថា នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ នៅតែអាច «រំខានដល់កិច្ចព្រមព្រៀង ដូចដែលគាត់បានធ្វើរាល់ពេលពីមុន»។

ប្រភពមួយផ្សេងទៀតដែលស្និទ្ធនឹងក្រុមហាម៉ាស បាន​​ប្រាប់​​ថា៖ «អ្វីគ្រប់យ៉ាងបង្ហាញថា យើងកាន់តែខិតទៅជិតកិច្ចព្រមព្រៀងមួយ។ ខ្ញុំរំពឹងថាមុនពេល (ប្រធានាធិបតីអាមេរិក​ទើប​ជាប់ឆ្នោត លោក ដូណាល់ ត្រាំ) ចូលកាន់តំណែង​នៅថ្ងៃទី​២០​ខែមករា»។

ចំណែក​ឯ​ប្រភព​​ពី​ក្រុមហាម៉ាស​មួយ​ទៀត បាន​បញ្ជាក់​ថា កិច្ចព្រមព្រៀងនេះគឺជាផែនការបីដំណាក់កាល ដែលនាំទៅដល់ការបញ្ចប់សង្រ្គាម និងការដកទ័ពអ៊ីស្រាអែល​ទាំង​ស្រុង​ចេញពីហ្គាហ្សា ហើយថា​​ ហាម៉ាស​កំពុងរង់ចាំការយល់ព្រមពីអ៊ីស្រាអែល។

សូម​បញ្ជាក់​ថា កាតា សហរដ្ឋអាមេរិក និងអេហ្ស៊ីប បាន​ជួយ​ធ្វើ​ការ​សម្រុះសម្រួល​រវាងអ៊ីស្រាអែល និងក្រុមហាម៉ាសអស់រយៈពេលជាច្រើនខែ​កន្លង​ ក្នុង​ដំណើរស្វែងរកបទឈប់បាញ់នៅតំបន់ហ្គាហ្សា និងការដោះលែងចំណាប់ខ្មាំង។

ប៉ុន្តែក្រៅពីបទឈប់បាញ់រយៈពេលមួយសប្តាហ៍កាលពីចុងឆ្នាំមុន ដែល​ឃើញ​មាន​ចំណាប់ខ្មាំងជាច្រើនត្រូវបានដោះលែងជាថ្នូរនឹង​ការ​ដោះលែង​ជនជាតិប៉ាឡេស្ទីនដែលត្រូវបានឃុំខ្លួនក្នុងពន្ធនាគាររបស់អ៊ីស្រាអែល ការចរចាជាបន្តបន្ទាប់​ត្រូវ​បានបរាជ័យក្នុងការបញ្ឈប់សង្គ្រាម៕

ដោយ៖ ឈាង

ចុចអាន៖ អ៊ីស្រាអែល៖ កិច្ចព្រមព្រៀង​ដោះលែង​ចំណាប់ខ្មាំង ជិត​សម្រេច​បាន​មែនទែន​ហើយ!