រុស្ស៊ី ចាប់បានជនសង្ស័យនៅពីក្រោយការធ្វើឃាត ឧត្តមសេនីយ៍ផ្កាយ២

សេវាសន្តិសុខរុស្ស៊ី បានបញ្ជាក់ពីការចាប់ខ្លួនជនសង្ស័យម្នាក់ នៅពីក្រោយការសម្លាប់ឧត្តមសេនីយ៍ផ្កាយ២ Igor Kirillov និងសហការីរបស់គាត់ក្នុងទីក្រុងមូស្គូ កាលពីថ្ងៃអង្គារ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងសេចក្តីប្រកាសនៅថ្ងៃពុធទី១៨ខែធ្នូឆ្នាំ២០២៤ និងចេញផ្សាយដោយ BBC, សេវាសន្តិសុខរុស្ស៊ីអះអាងថា ជនសង្ស័យមានសញ្ជាតិអ៊ូសបេគីស្ថានអាយុ២៩ឆ្នាំ ហើយរូបគេគឺធ្វើការឲ្យចារកម្មអ៊ុយក្រែន។

ទោះបីជាយ៉ាងណាក៏ដោយ ភ្លាមៗ រុស្ស៊ីមិនទាន់បញ្ចេញឈ្មោះ ឬព័ត៌មានលម្អិតអំពីជនសង្ស័យម្នាក់នេះឡើយ ខណៈការសួរចម្លើយនិងស៊ើបអង្កេតកំពុងបន្ត។

លោក Kirillov ប្រធានកងកម្លាំងការពារនុយក្លេអ៊ែរ ជីវសាស្ត្រ គីមី (NBC) ត្រូវគេធ្វើឃាតដោយការបំផ្ទុះគ្រាប់បែកបង្កៃក្នុងកង់ស្គីអេឡិចត្រូនិច ពេលគាត់ដើរចេញពីផ្ទះក្នុងទីក្រុងមូស្គូ ហើយភ្លាមៗក្រោយពីនោះ ទីក្រុងកៀវ បានចេញមុខទទួលខុសត្រូវថា ការវាយប្រហារនេះគឺជាស្នាដៃរបស់ខ្លួន។

សេវាសន្តិសុខអ៊ុយក្រែនហៅកាត់ SBU បញ្ជាក់ថា «លោក Igor Kirillov គឺជាឧក្រិដ្ឋជនសង្គ្រាមនិងជាគោលដៅស្របច្បាប់របស់អ៊ុយក្រែន​ ព្រោះគាត់ជាអ្នកចេញបញ្ជាឲ្យប្រើប្រាស់អាវុធគីមីដែលគេហាមឃាត់ ដើម្បីប្រឆាំងនឹងយោធាទីក្រុងកៀវ។ ដូច្នេះ ការសងសឹកចំពោះឧក្រិដ្ឋកម្មសង្រ្គាមនេះ គឺចៀសមិនផុតឡើយ»។

ដោយឡែកអាមេរិកឯណោះ បានចេញមុខបដិសេធថា ខ្លួនគ្មានជាប់ពាក់ព័ន្ធអ្វីឡើយ ចំពោះរឿងនេះ ដោយអ្នកនាំពាក្យក្រសួងការពារជាតិលោក Matthew Miller និយាយថា «ខ្ញុំសូមប្រាប់ថា សហរដ្ឋអាមេរិក មិនបានដឹងអ្វីមុនឡើយនៃការសម្លាប់នេះ ហើយក៏មិនជាប់ពាក់ព័ន្ធដែរ»។

សូមបញ្ជាក់ថា លោក Kirillov គឺជាមន្ត្រីយោធាឋានៈខ្ពស់បំផុត ដែលត្រូវធ្វើឃាតចាប់តាំងពីទីក្រុងមូស្គូ បើកប្រតិបត្តិការវាយលុកអ៊ុយក្រែនក្នុងឆ្នាំ២០២២មក ហើយគេបារម្ភថា ការធ្វើឃាតថ្មីនេះ នឹងដុតបញ្ឆេះសង្គ្រាមកាន់តែក្តៅរោលរាល៕

អត្ថបទ៖ សុខ សុវណ្ណ

ចុចអាន៖ តើ អាមេរិក និយាយបែបណា ពេលអ៊ុយក្រែន ធ្វើឃាតប្រធានកងកម្លាំងនុយក្លេអ៊ែរ រុស្ស៊ី?