គ្រោះរញ្ជួយដីកម្រិត ៧.៣ រ៉ិចទ័រ នៅវ៉ានូទូតំបន់​ប៉ាស៊ីហ្វិក​​​សម្លាប់មនុស្ស១៤នាក់

គ្រោះរញ្ជួយដីកម្រិត ៧.៣ រ៉ិចទ័រ ដែលបានវាយប្រហារលើប្រទេសវ៉ានូទូ បានសម្លាប់មនុស្សយ៉ាងហោចណាស់១៤នាក់ និងរាប់រយនាក់ផ្សេងទៀតរងរបួស ព្រមទាំង​បង្កការ​​បំផ្លិចបំផ្លាញយ៉ាងធ្ងន់ធ្ងរនៅទូទាំងប្រទេសកោះនៅ​តំបន់​ប៉ាស៊ីហ្វិកខាងត្បូងនេះ។ នេះបើយោងតាមការចេញផ្សាយរបស់ទីភ្នាក់ងារព័ត៌មាន​APនៅថ្ងៃទី១៨ខែធ្នូនេះ។

កិច្ចខិតខំប្រឹងប្រែងជួយសង្គ្រោះដ៏គួរឱ្យសង្វែក បានកើតឡើង បន្ទាប់ពីគ្រោះរញ្ជួយដីបានវាយប្រហារកាលពីរសៀលថ្ងៃអង្គារ ហើយក្រុមអ្នកជួយសង្គ្រោះបានធ្វើការពេញមួយយប់ ដោយព្យាយាមចូលទៅដល់មនុស្សដែលកំពុងស្រែករកជំនួយពីក្រោមគំនរបាក់បែក។

រញ្ជួយដីនេះបានវាយប្រហារនៅជម្រៅ​៥៧គីឡូម៉ែត្រ ហើយចំណុចកណ្តាលស្ថិតនៅចម្ងាយ​៣០​គីឡូម៉ែត្រ ភាគខាងលិចទីក្រុង Port Vila ដែលជាទីក្រុងធំបំផុតនៅប្រទេសវ៉ានូទូនេះ ដែលជាប្រទេស​ក្រុមកោះចំនួន​៨០ដែលមានប្រជាជន​ប្រហែល​៣៣ម៉ឺន​នាក់។

អង្គការ​ជំនួយ​មនុស្សធម៌ កាកបាទក្រហម បានឱ្យ​ដឹង​នៅព្រឹកថ្ងៃពុធ​នេះថា មនុស្ស​១៤នាក់បានស្លាប់ដោយដកស្រង់ព័ត៌មានរបស់រដ្ឋាភិបាល។ លើសពីនេះការខូចខាតយ៉ាងទូលំទូលាយចំពោះទូរគមនាគមន៍ និងហេដ្ឋារចនាសម្ព័ន្ធផ្សេងទៀតបានរារាំងការចេញផ្សាយរបាយការណ៍ផ្លូវការ ហើយសេវាទូរស័ព្ទនៅតែធ្លាក់ចុះ។ បើតាមប្រធានកាកបាទក្រហមប្រទេសនេះមនុស្សជាង ២០០​នាក់បានរងរបួស ហើយថាមពលអគ្គិសនី និងទឹកត្រូវបានដាច់ផងដែរ។

រញ្ជួយ​ដី​នេះ បាន​បំផ្លាញ​ស្ថានទូត អគារស្នាក់នៅរបស់បេសកកម្មការទូតមួយចំនួននៅ Port Vila រួមទាំងស្ថានទូត​សហរដ្ឋ​អាមេរិក អង់គ្លេស បារាំង និងនូវែលសេឡង់ ដោយ​រងការ​ខូចខាតយ៉ាងខ្លាំងហើយ​ផ្នែកខ្លះនៃអគារបានបាក់​រលំរាប​ដល់​​ដី ខណៈមនុស្ស​មួយចំនួននៅតែជាប់ក្រោមគំនរបាក់បែក។

អ្នកស្រុកមុននេះត្រូវបានគេណែនាំអោយនៅឱ្យឆ្ងាយពីឆ្នេរសមុទ្រយ៉ាងហោចណាស់ ២៤ ម៉ោង ហើយរហូតដល់រលកយក្សស៊ូណាមិ និងប្រព័ន្ធតាមដានការរញ្ជួយដីត្រូវបានដំណើរការម្តងទៀត។ ជាមួយគ្នានេះជើងហោះហើរទាំងអស់នៅក្នុងប្រទេសនេះត្រូវបានផ្អាកផងដែរ។

គួរបញ្ជាក់ថាទីតាំងរបស់ប្រទេសវ៉ានូទូ ស្ថិតនៅតំបន់ដែលងាយរងគ្រោះរញ្ជួយដី ហើយមានខ្លាំងជាងកម្រិត ៦ និងមិន​មែន​ជារឿងចម្លែកនោះទេ ដោយអគាររបស់ប្រទេសនេះភាគច្រើនក៏ត្រូវបានសាងសង់ក្នុងបំណងទប់ទល់នឹងការបំផ្លិចបំផ្លាញ​ដោយ​ការរញ្ជួយដីផងដែរ៕

អត្ថបទ៖ ប៊ុន សុភាព