អាមេរិក ប្រកាស​អាសន្ន​ថា រុស្ស៊ី​ជិត​ទទួល​ស្គាល់​កម្មវិធី​អាវុធ​នុយក្លេអ៊ែរ​របស់​កូរ៉េ​ខាង​ជើង

នៅកិច្ច​ប្រជុំ​ក្រុមប្រឹក្សាសន្តិសុខអង្គការសហប្រជាជាតិកាលពីថ្ងៃពុធ​ទី​១៨​ខែ​ធ្នូ​ឆ្នាំ​២០២៤ សហរដ្ឋអាមេរិក​បានប្រកាសអាសន្នថា ប្រទេសរុស្ស៊ីជិតទទួលយក​កម្មវិធី​នុយក្លេអ៊ែរ​របស់​កូរ៉េខាងជើង ខណៈ​ដែល​​កិច្ចសហប្រតិបត្តិការ​ការពារ​គ្នា​ទៅ​វិញ​ទៅ​មក​រវាង​ប្រទេស​ទាំង​ពីរ​កំពុងកើនឡើង​គួរ​ឲ្យ​ព្រួយ​បារម្ភ។

ឯកអគ្គរដ្ឋទូតអាមេរិកប្រចាំអង្គការសហប្រជាជាតិ លោកស្រី Linda Thomas-Greenfield បាននិយាយថា៖ «ជា​សញ្ញា​ព្រមាន យើងវាយតម្លៃថា រុស្ស៊ីប្រហែលជាជិតទទួលយកកម្មវិធីអាវុធនុយក្លេអ៊ែររបស់កូរ៉េខាងជើង ដោយ​ផ្ទុយ​ពី​ការប្តេជ្ញាចិត្តរយៈពេលជាច្រើនទសវត្សរ៍​កន្លង​មក​របស់ទីក្រុងមូស្គូ ក្នុងការលុបបំបាត់នុយក្លេអ៊ែរនៅឧបទ្វីបកូរ៉េ»។

លោកស្រីបានបន្ថែម​ថា៖ «យើងជឿជាក់ថា ទីក្រុងមូស្គូ នឹងកាន់តែស្ទាក់ស្ទើរ​មិន​ហ៊ាន​រិះគន់ការអភិវឌ្ឍអាវុធនុយក្លេអ៊ែររបស់ទីក្រុងព្យុងយ៉ាង ហើយ​ថែមទាំងរារាំងការអនុម័តទណ្ឌកម្ម ឬ​សេចក្ដី​សម្រេច​ដែលថ្កោលទោសអាកប្បកិរិយាអស្ថិរភាពរបស់កូរ៉េខាងជើង»។

ពាក់ព័ន្ធ​នឹង​​​​ការ​អត្ថាធិប្បាយ​របស់លោកស្រី Linda លោក Vassily Nebenzia ឯកអគ្គរដ្ឋទូត​រុស្ស៊ី​ប្រចាំ​អង្គការសហប្រជាជាតិ មិន​បាន​និយាយ​អំពី​កម្មវិធីនុយក្លេអ៊ែររបស់កូរ៉េខាងជើងទេ នៅពេលលោកធ្វើ​ការ​ថ្លែងទៅកាន់ក្រុមប្រឹក្សាសន្តិសុខ។ ប៉ុន្តែ​លោកបានការពារកិច្ចសហប្រតិបត្តិការដែលកំពុងកើនឡើងរវាងទីក្រុងមូស្គូ និងទីក្រុងព្យុងយ៉ាង ថា​ជាសិទ្ធិអធិបតេយ្យភាពរបស់រុស្ស៊ី។

លោកបានរៀបរាប់​ថា៖ «កិច្ចសហប្រតិបត្តិការរបស់រុស្ស៊ីជាមួយកូរ៉េខាងជើង គឺស្របតាមច្បាប់អន្តរជាតិ មិនមែនបំពាននោះទេ។ នេះមិនសំដៅប្រឆាំងនឹងប្រទេសទីបីណាមួយទេ។ វាមិនបង្កការគំរាមកំហែងដល់រដ្ឋនៅក្នុងតំបន់ ឬសហគមន៍អន្តរជាតិទេ ហើយគ្មានការសង្ស័យទេ យើងនឹងបន្តអភិវឌ្ឍកិច្ចសហប្រតិបត្តិការបែបនេះ»។

សូម​បញ្ជាក់​ថា កូរ៉េខាងជើង បានស្ថិតនៅក្រោមការដាក់ទណ្ឌកម្មរបស់ក្រុមប្រឹក្សាសន្តិសុខអង្គការសហប្រជាជាតិចាប់តាំងពីឆ្នាំ​២០០៦ ហើយវិធានការនេះត្រូវបានពង្រឹងជាលំដាប់​អស់​រយៈពេលជាច្រើនឆ្នាំ ក្នុងគោលបំណងបញ្ឈប់ការអភិវឌ្ឍ​អាវុធនុយក្លេអ៊ែរ និងមីស៊ីល​ប៉ាលិស្ទិក​របស់ទីក្រុងព្យុងយ៉ាង៕

ដោយ៖ ឈាង