កុមារអាមេរិក៣ម៉ឺននាក់រងផលប៉ះពាល់នៅ​រដ្ឋ​២១​​ ដោយសារការបាញ់ប្រហារក្នុងសាលារៀនក្នុងឆ្នាំ២០២៤

កុមារ៣១០០០នាក់រងផលប៉ះពាល់នៅទូទាំងរដ្ឋចំនួន២១ ដោយសារការបាញ់ប្រហារនៅក្នុងសាលារៀនក្នុងសហរដ្ឋ​អាមេរិកក្នុងឆ្នាំ២០២៤។ នេះបើយោងតាមកាសែត Washington Post បានរាយការណ៍កាលពីថ្ងៃពុធដោយដកស្រង់កម្មវិធីតាមដានការបាញ់ប្រហារនៅក្នុងសាលារៀន។

របាយ​ការណ៍​ បាន​កត់​សម្គាល់ ​ថា ​ការ​បាញ់​ប្រហារ​នៅ​តាម​សាលារៀន​បាន​កើនឡើង ខណៈកាំភ្លើង​ត្រូវ​បាន​គេ​នាំយក​​ទៅ​សាលារៀន​​ស្ទើរ​រាល់​ថ្ងៃ។ របាយការណ៍ បាននិយាយថា មនុស្សសរុបចំនួន១៣នាក់ត្រូវបានសម្លាប់នៅក្នុងការបាញ់ប្រហារនៅសាលារៀនចាប់តាំងពីដើមឆ្នាំនេះ រួមទាំងសិស្សជំទង់ និងគ្រូបង្រៀនម្នាក់ដែលត្រូវបានសម្លាប់នៅសាលា Abundant Life Christian School កាលពីថ្ងៃចន្ទ ហើយជិត​៥០នាក់ផ្សេងទៀតត្រូវបានបាញ់នៅឆ្នាំនេះ ប៉ុន្តែបានរួចជីវិត។ រដ្ឋសរុបចំនួន២១ បានជួបប្រទះការបាញ់ប្រហារនៅសាលារៀនក្នុងឆ្នាំនេះ។

ទន្ទឹមនឹងនេះ មានការបាញ់ប្រហារនៅសាលាចំនួន៤២៦ចាប់តាំងពីការសម្លាប់រង្គាលនៅ Columbine High កាលពីថ្ងៃទី ២០ ខែមេសា ឆ្នាំ១៩៩៩ ដែលក្នុងនោះសិស្ស១២នាក់ និងគ្រូបង្រៀនម្នាក់ត្រូវបានសម្លាប់។ មនុស្សប្រហែល ២១៥​​នាក់ រួមទាំងកុមារនិងអ្នកអប់រំ ត្រូវបានសម្លាប់នៅក្នុងការបាញ់ប្រហារនៅសាលារៀនហើយជិត៥០០នាក់ផ្សេងទៀត​បានរងរបួស។ ក្នុងនោះ៨៦ ភាគរយនៃអាវុធដែលប្រើក្នុងការបាញ់ប្រហារនៅសាលាមានប្រភពចេញពីផ្ទះរបស់មិត្តភក្តិ សាច់ញាតិ ឬឪពុកម្តាយ ក្នុងករណីដែលប្រភពនៃកាំភ្លើងអាចកំណត់បាន។

លើសពីនេះរបាយការណ៍បានកត់សម្គាល់ថា៖​«ជាងពាក់កណ្តាលនៃការបាញ់ប្រហារនៅសាលារៀននៅសហរដ្ឋអាមេរិក ត្រូវបានអនុវត្តដោយកុមារ ហើយគ្មាននរណាម្នាក់អាចធ្វើទៅរួចទេ ប្រសិនបើកុមារទាំងនោះមិនមានអាវុធប្រើប្រាស់»៕

អត្ថបទ៖ ប៊ុន សុភាព