ព័ត៌មានអន្ដរជាតិ

អ៊ុយក្រែន ទទួលបានកញ្ចប់ជំនួយថ្មីទៀតពីអង់គ្លេស តម្លៃ២៨៦លានដុល្លារ

បានផុស

២ ខែ មុន

នៅ

ថ្ងៃព្រហស្បតិ៍ ១៩ ធ្នូ ២០២៤

ដោយ

Chheang

នៅថ្ងៃព្រហស្បតិ៍ទី១៩ខែធ្នូឆ្នាំ២០២៤ ចក្រភពអង់គ្លេស បានប្រកាសកញ្ចប់ជំនួយយោធាថ្មីមួយដែលមានតម្លៃ ២២៥លានផោន ឬស្មើនឹង ២៨៦លានដុល្លារ ដល់អ៊ុយក្រែន ដែលជាផ្នែកមួយនៃការគាំទ្របន្តរបស់ខ្លួនក្នុងការប្រយុទ្ធប្រឆាំងនឹងការឈ្លានពានពីរុស្ស៊ី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កញ្ចប់ជំនួយថ្មី នឹងផ្តល់ឲ្យអ៊ុយក្រែននូវសម្ភារៈសំខាន់ៗ ដូចជា ដ្រូន ទូក និងប្រព័ន្ធការពារដែនអាកាស សម្រាប់ពង្រឹងសមត្ថភាពការពារជាតិអ៊ុយក្រែនក្នុងឆ្នាំ២០២៥។

ការប្រកាសនេះ ធ្វើឡើងបន្ទាប់ពីដំណើរទស្សនកិច្ចរបស់រដ្ឋមន្ត្រីការពារជាតិចក្រភពអង់គ្លេស លោក John Healey ទៅកាន់ទីក្រុងកៀវ កាលពីថ្ងៃពុធ។ លោក Healey បានសង្កត់ធ្ងន់ថា ការគាំទ្ររបស់អង់គ្លេសចំពោះអ៊ុយក្រែន នឹងរឹងមាំដូចដែក ហើយនឹងបន្តរហូតដល់ឆ្នាំ២០២៥។

លោក Healey បាននិយាយថា៖ «បីឆ្នាំចាប់តាំងពីប្រធានាធិបតីរុស្ស៊ី វ្ល៉ាឌីមៀរ ពូទីន បានបញ្ជាឲ្យឈ្លានពានអ៊ុយក្រែន ជម្រៅនៃការគណនាខុសរបស់គាត់គឺមើលឃើញច្បាស់ជាងពេលណាទាំងអស់។ ប្រជាជនអ៊ុយក្រែនក្លាហានបន្តប្រឆាំង ដោយស្មារតីមិនអាចបំបែកបាន ប៉ុន្តែពួកគេមិនអាចទៅបានតែម្នាក់ឯងឡើយ»។ លោក Healey បានបន្ថែមថា ចក្រភពអង់គ្លេសនឹងប្រកៀកស្មាជាមួយអ៊ុយក្រែន ដើម្បីឲ្យរុស្ស៊ីបរាជ័យក្នុងសង្គ្រាម។

កញ្ចប់ជំនួយថ្មីរបស់អង់គ្លេស មានការបែងចែកដូចជា ៩២លានផោនសម្រាប់សម្ភារៈកងទ័ពជើងទឹក ដូចជា ទូកតូចៗ ដ្រូនឈ្លបការណ៍ និងកប៉ាល់គ្មានមនុស្សបើក, ៦៨លានផោនសម្រាប់ការពារដែនអាកាស រួមទាំងរ៉ាដា និង ៣៩លានផោនសម្រាប់ប្រព័ន្ធបាញ់ទម្លាក់ដ្រូនចំនួន១ពាន់គ្រឿង។

ក្រៅតែពីកញ្ចប់ជំនួយខាងលើ ចក្រភពអង់គ្លេសក៏បានសន្យាផ្ដល់ជូនកម្មវិធីបណ្តុះបណ្តាល សម្រាប់ទាហានអ៊ុយក្រែនផងដែរ។ ចាប់តាំងពីពាក់កណ្តាលឆ្នាំ២០២២មក កម្មវិធីនេះបានបណ្តុះបណ្តាលជនជាតិអ៊ុយក្រែនចំនួន ៥១ ០០០នាក់នៅលើទឹកដីអង់គ្លេស ដោយជួយធានាថា កងកម្លាំងអ៊ុយក្រែនត្រូវបានបំពាក់ និងរៀបចំយ៉ាងល្អ សម្រាប់ការប្រយុទ្ធដែលកំពុងបន្ត៕

ដោយ៖ ឈាង