អាមេរិក​ទម្លាយ​ថា ការពិត​ខ្លួន​មាន​ទ័ព​​នៅ​ស៊ីរី ២ ០០០​នាក់ មិនមែន​ ៩០០​នាក់​ទេ

ក្រោយ​លាក់​បាំង​អស់​ជា​ច្រើន​ឆ្នាំ ហើយ​ប្រាប់​ថា មាន​ទាហាន​​អាមេរិក​ប្រមាណ​តែ ៩០០​នាក់​ប៉ុណ្ណោះ​នៅ​ប្រទេស​ស៊ីរី ឥលូវ​នេះ​មន្ទីរ​បញ្ចកោណ​ បាន​បង្ហើប​ការពិត​ហើយ​ ដោយ​ថា ទាហាន​អាមេរិក​ប្រហែល ២ ០០០​នាក់​កំពុង​ឈរ​ជើង​​នៅ​ទីនោះ។

លោក Pat Ryder អ្នក​នាំពាក្យ​មន្ទីរ​បញ្ចកោណ បាន​ប្រាប់​ឲ្យ​ដឹង​កាល​ពី​ថ្ងៃ​ទី​១៩​ខែ​ធ្នូ​ឆ្នាំ​២០២៤​ថា កង​កម្លាំង​អាមេរិក ៩០០​នាក់ ដូច​ដែល​​បាន​ប្រាប់​សាធារណៈ​កាល​ពី​មុន គឺ​ជា​ទាហាន​ឈរ​ជើង​រយៈពេល​​វែង ខណៈ​​ប្រមាណ ១ ១០០​នាក់​ទៀត​ ត្រូវ​ចាត់​ទុក​ថា​ជា​​កម្លាំង​បណ្ដោះ​អាសន្ន​ប៉ុណ្ណោះ។

លោក​បន្ថែម​ថា ទាហាន​ទាំង ១ ១០០​នាក់ មាន​វត្តមាន​នៅ​លើ​ទឹក​ដី​ស៊ីរី មុន​ការ​ដួល​រលំ​នៃ​របប​លោក Bashar al-Assad ទៅ​ទៀត។ យ៉ាង​ណា​មិញ មន្ត្រី​អាមេរិក​រូប​នេះ មិន​បាន​បញ្ជាក់​ពី​ពេល​វេលា​ច្បាស់លាស់​នោះ​ទេ តែ​បង្ហើប​តឹ្រម​ថា មាន​រយៈពេល​ជា​ច្រើន​ខែ​មក​ហើយ។

អាមេរិក បាន​ចាប់​ផ្ដើម​បញ្ជូន​ទ័ព​ទៅ​កាន់​ស៊ីរី ក្នុង​ឆ្នាំ​២០១៤ ជាមួយ​គោល​បំណង​បង្ក្រាប​ក្រុម​ឧទ្ទាម​ ISIS។ ត្បិត​បង្ក្រាប​ក្រុម​នេះ​បាន​កាល​ពី​ឆ្នាំ​២០១៧ អាមេរិក​មិន​បាន​ដក​វត្តមាន​​​កងកម្លាំង​​របស់​ខ្លួន​ចេញ​ពី​ស៊ីរី​នោះ​ទេ។
​
លោក Ryder បាន​បញ្ជាក់​ថា អាមេរិក​ពុំ​មាន​​ការ​ផ្លាស់ប្ដូរ​គម្រោង​ចំពោះ​វត្តមាន​យោធា​​នៅ​ស៊ីរី​ទេ។ លោក​ថា៖ «មិនមានគម្រោងបញ្ឈប់បេសកកម្ម ‘កម្ចាត់ ISIS’ ទេ។ ខ្ញុំ​មាន​ន័យ​ថា ISIS បន្ត​ធ្វើ ឬ​បង្ក​ការ​គំរាម​កំហែង​​ដ៏​ធំ»៕

ដោយ៖ ឈាង