UN៖ មនុស្ស​ជាង​៧០០​នាក់​ត្រូវ​បាន​សម្លាប់​ក្នុងប្រទេសស៊ូដង់

យោងតាមការ​ផ្សាយ​របស់​​សារព័ត៌មាន Al Jazeera មនុស្សជាង៧០០នាក់ត្រូវបានសម្លាប់នៅក្នុងទីក្រុង el-Fasher ក្នុង​​រដ្ឋ North Darfur នៃប្រទេសស៊ូដង់ ចាប់តាំងពីខែឧសភាមក និងបានអំពាវនាវដល់កងកម្លាំងគាំទ្ររហ័ស (RSF) របស់យោធាបញ្ឈប់ការឡោមព័ទ្ធនេះ។

ប្រធានសិទ្ធិមនុស្សរបស់អង្គការសហប្រជាជាតិ បាននិយាយថា «ការឡោមព័ទ្ធ និង ការប្រយុទ្ធគ្នាដោយឥតឈប់ឈរ កំពុង​បំផ្លិចបំផ្លាញជីវិតជារៀងរាល់ថ្ងៃក្នុងទ្រង់ទ្រាយធំ ស្ថានភាព​គួរ​ឲ្យ​បារម្ភ​នេះ​មិន​អាច​បន្ត​បាន​ទេ ដោយកងកម្លាំងគាំទ្ររហ័សត្រូវតែបញ្ចប់ការឡោមព័ទ្ធដ៏អាក្រក់នេះ»។

ការិយាល័យសិទ្ធិមនុស្សរបស់អង្គការសហប្រជាជាតិ បានចងក្រងឯកសារអំពីការស្លាប់របស់ជនស៊ីវិលយ៉ាងហោចណាស់ ៧៨២នាក់ និងជាង​១១៤៣នាក់ បានរងរបួសចាប់តាំងពីខែឧសភា។ ការស្លាប់និងរបួសបានកើតឡើងចំពេលមាន​ការបាញ់ផ្លោងយ៉ាងទៀងទាត់ និងខ្លាំងក្លាដោយ RSF នៃតំបន់លំនៅដ្ឋានដែលមានប្រជាជនច្រើន ក៏ដូចជាការវាយប្រហារតាមអាកាសម្តងទៀតដោយកងកម្លាំងប្រដាប់អាវុធស៊ូដង់ ខណៈការវាយប្រហារបែបនេះទៅលើជនស៊ីវិលអាចស្មើនឹងឧក្រិដ្ឋកម្មសង្គ្រាម។

ទោះបីជាយ៉ាងណាភាគីជម្លោះទាំងពីរបានបដិសេធម្តងហើយម្តងទៀតអំពីចេតនាវាយប្រហារជនស៊ីវិល ហើយបានចោទប្រកាន់គ្នាទៅវិញទៅមក។ កងទ័ពស៊ូដង់ក្រោមការដឹកនាំរបស់ឧត្តមសេនីយ Abdel Fattah al-Burhan និង RSF ដែលដឹកនាំដោយអតីតអនុប្រធានរបស់គាត់គឺលោក Mohamed Hamdan Dagalo ត្រូវបានជាប់គាំងក្នុងជម្លោះអស់រយៈពេលជាង១៨ខែមកហើយ។ សង្រ្គាមបានបង្កឱ្យមានវិបត្តិមនុស្សធម៌កាន់តែធ្ងន់ធ្ងរ ដោយមនុស្សជាង ១២ លាននាក់ត្រូវបានជម្លៀសចេញពីផ្ទះរបស់ពួកគេ បណ្ដាលឲ្យទីភ្នាក់ងារអង្គការសហប្រជាជាតិបានជួបការលំបាកក្នុងការផ្តល់ជំនួយ។

គួរបញ្ជាក់ ថា ទីក្រុងEl-Fasher គឺជាសមរភូមិជួរមុខដ៏សកម្មបំផុតមួយរវាង RSF និងកងទ័ពស៊ូដង់ និងសម្ព័ន្ធមិត្តរបស់ខ្លួន ដែលកំពុងប្រយុទ្ធដើម្បីរក្សាជំហរចុងក្រោយនៅក្នុងតំបន់ Darfur។ ក្រុមអ្នកសង្កេតការណ៍ភ័យខ្លាចថា ជ័យជម្នះរបស់ RSF នៅទីនោះអាចនាំមកនូវការសងសឹកពីជនជាតិភាគតិច ដូចដែលបានកើតឡើងនៅ West Darfur កាលពីឆ្នាំមុន៕

អត្ថបទ៖ ប៊ុន សុភាព