វៀតណាម នឹងជួបព្យុះភ្លៀងនៅថ្ងៃបុណ្យណូអែល

មជ្ឈមណ្ឌលឧតុនិយមវៀតណាមព្រមានថា នៅថ្ងៃបុណ្យណូអែលខាងមុខ តំបន់ភាគខាងត្បូងនិងកណ្តាលប្រទេស នឹងជួបព្យុះភ្លៀងយ៉ាងខ្លាំង។ នេះបើតាមការចុះផ្សាយរបស់ VN Express កាលពីថ្ងៃអាទិត្យទី២២ខែធ្នូឆ្នាំ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការព្យាករ, ព្យុះភ្លៀងនេះគឺបណ្តាលមកពីប្រព័ន្ធព្យុះត្រូពិក ដែលខិតមកជិតប្រជុំកោះ Spratly និងជះឥទ្ធិពលដល់ឆ្នេរសមុទ្រវៀតណាមចាប់ពី ខេត្ត Phu Yen ដល់ខេត្ត Ca Mau។

បញ្ហាអាកាសធាតុនេះ ចាប់ផ្តើមជះឥទ្ធិពលដល់ប្រទេសវៀតណាម ជាបណ្តើរៗហើយ ដោយនៅព្រឹកថ្ងៃចន្ទ វានាំមកជាមួយកម្លាំងខ្យល់បក់ពី ៦២ទៅ៧៤គីឡូម៉ែត្រក្នុងមួយម៉ោង ឬអាចមានខ្យល់កន្ត្រាក់កម្លាំង ៨៨គីឡូម៉ែត្រក្នុងមួយម៉ោង ហើយវានឹងឈានដល់ចំណុចខ្ពស់ បង្កឲ្យមានព្យុះភ្លៀងខ្លាំងនៅតំបន់មួយចំនួន រួមទាំងទីក្រុងហូជីមិញផងដែរ ចាប់ពីរាត្រីថ្ងៃទី២៣ដល់ទី២៦ខែធ្នូ។

ទឹកភ្លៀងត្រូវគេព្យាករថា នឹងធ្លាក់ចុះ​ក្នុង​កម្រិត​ពី ១០០ទៅ៣០០មិល្លីម៉ែត្រ នៅថ្ងៃទី២៤ដល់២៥ខែធ្នូ ហើយភ្លៀងនឹងធ្លាក់រាយប៉ាយដល់ប៉ែកខាងកើតនិងខាងលិច និងតំបន់ខ្ពង់រាបភាគកណ្តាល។

សូមបញ្ជាក់ថា ចាប់តាំង​ពី​ដើម​ឆ្នាំ​មក សមុទ្រចិនខាងត្បូងបានបង្កើត​ខ្យល់​ព្យុះ​ចំនួន៩ ដោយក្នុងនោះ ព្យុះព្រះភិរុណ យ៉ាកជី ស៊ូលិក ត្រាមី និង យិនស៊ីង បានប៉ះពាល់ដោយផ្ទាល់ដល់ដីគោករបស់វៀតណាមយ៉ាងធ្ងន់ធ្ងរ។

ជាពិសេសព្យុះទីហ្វុង យ៉ាកជី ដែលបោកបក់លើភាគខាងជើង ធ្វើឲ្យប៉ះពាល់ដល់ទីក្រុង និងខេត្តចំនួន ២៥រួមទាំងរដ្ឋធានីហាណូយ និងតំបន់ទេសចរណ៍ ព្រមទាំងមជ្ឈមណ្ឌលឧស្សាហកម្មជាច្រើនផងដែរ ដោយសម្លាប់មនុស្សរាប់រយនាក់៕

អត្ថបទ៖ សុខ សុវណ្ណ

ចុចអាន៖ ព្យុះភ្លៀងធ្ងន់ធ្ងរ ផ្តាច់ជីវិតមនុស្ស ៥១នាក់ នៅអេស្ប៉ាញ