ពលរដ្ឋក្នុងស្រុកកូនមុំ និងស្រុកលំផាត់ ខេត្តរតនគិរី នឹងទទួលបានស្ពានថ្មី ដើម្បីធ្វើដំណើរទៅប្រកបរបររកស៊ីផ្សេងៗ

ប្រជាពលរដ្ឋចំនួន២ឃុំ គឺឃុំសិរិមង្គល និងឃុំជ័យឧត្តមនៅស្រុកកូនមុំ និងស្រុកលំផាត់ របស់ខេត្តរតនគិរី ជួបការលំបាកក្នុងការឆ្លងកាត់អូរទទឹង ដោយត្រូវបង់ថ្លៃទូកដរ ជួនកាលឈឺពោះសម្រាលកូន ទៅមិនទាន់ឆ្លងទន្លេនៅផ្ទះក៏មាន ហើយការដឹកជញ្ជូនដំណាំកសិផល ទៅលក់នៅទីផ្សារក៏ មិនស្រួលដោយត្រូវបង់ថ្លៃទូកដរអស់ប្រាក់ច្រើន។ ឯសិស្សសាលា ក៏ពិបាកទៅរៀនសូត្រ។

ដោយមើលឃើញពីការលំបាករបស់ប្រជាពលរដ្ឋនេះ លោក ញ៉ែម សំអឿន អភិបាលខេត្តរតនគិរី បានដាក់សំណើជូនសម្តេចធិបតី ហ៊ុន ម៉ាណែត នៅក្នុងពិធីសម្ពោធទំនប់ អូរទេ នៅខេត្តមណ្ឌលគីរី។ សម្តេច នាយករដ្ឋមន្រ្តីក៏បានបញ្ជាឱ្យកងវិស្វកម្ម និងក្រសួងអភិវឌ្ឍន៍ជនបទ ចុះសិក្សាស្រាវជ្រាវនៅមាត់អូរ  ដើម្បីកសាងស្ពានដែកបណ្តោយ ២៦ ម៉ែត្រ ទទឹង ៤ ម៉ែត្រ  ជូនប្រជាពលរដ្ឋក្នុងភូមិ ចាប់ភូមិសាមខា ឃុំជ័យឧត្ដមនៅជាប់ភូមិនាងដី ស្ថិតក្នុងឃុំកូនមុំ ក្នុងការជួយសម្រាលដល់ការធ្វើដំណើរក្នុងការប្រកបមុខរបរចិញ្ចឹមជីវិត។  

លោក នូ ថេ អភិបាលស្រុកលំផាត់ បានមានប្រសាសន៍ថា ក្រុមការងារសាងសង់ស្ពានបានមកដល់ទីកន្លែងស្ពានដែលត្រូវធ្វើរួចរាល់ហើយ ដើម្បីរៀបចំគ្រឿងចក្រ សាងសង់ស្ពាននេះ។ ចំណែក តំណាងប្រជាជនទាំង២ភូមិ បានសម្តែងអំណរគុណ និងថ្លែងការអរគុណជូនចំពោះសម្តេចធិបតី ហ៊ុន ម៉ាណែត ថ្នាក់ដឹកនាំខេត្ត ដែលបានជួយបំពេញក្តីស្រមៃរបស់គាត់។ មួយទៀត វាជាតម្រូវការរបស់ពួកគាត់ ពីព្រោះពីមុនមានលំបាកយ៉ាងខ្លាំង សម្រាប់ធ្វើដំណើរទៅមកឆ្លងពីភូមិមួយទៅភូមិមួយ និងទៅកាន់ទីផ្សារ លក់ដំឡូង ស្រូវអង្ករ ដើម្បីចិញ្ចឹមជីវិត៕

ដោយ៖ ខៀវ ចាប