ទឹកជំនន់និងបំណាក់ដីកំពុងវាយប្រហារតំបន់​ជា​ច្រើន​​​នៅ​ឥណ្ឌូណេស៊ី

ទឹកជំនន់ និងបំណាក់ដី​​កំពុង​វាយប្រហារតំបន់ផ្សេងៗនៅទូទាំងប្រទេសឥណ្ឌូណេស៊ីចាប់តាំង​ពី​​សប្តាហ៍កន្លងទៅនេះ ខណៈដែលមនុស្សរាប់លាននាក់រៀបចំខ្លួនដើម្បីសម្រុកទៅកាន់គោលដៅទេសចរណ៍ពេញនិយមសម្រាប់ថ្ងៃ​ឈប់​សម្រាក​បុណ្យណូអែលនិងឆ្នាំថ្មី។

យ៉ាងហោចណាស់មនុស្ស ១២០០០ នាក់ដែលរស់នៅក្បែរឆ្នេរសមុទ្រភាគខាងជើងនៃទីក្រុងJakartaបានរងផលប៉ះពាល់ដោយទឹកជំនន់ ដោយទឹកជំនន់​បានឈានដល់ជម្រៅរហូតដល់១​ម៉ែត្រនៅក្នុងតំបន់ជាច្រើន។ ជំនន់ទឹកភ្លៀងបានវាយ​ប្រហារ​អ្នកស្រុកនៅ Pademangan, Penjaringan, Cilincing និង Tanjung Priok ទាំងអស់នៅក្នុងក្រុង Jakarta ខាងជើង។

ផ្ទះរាប់រយខ្នងនៅជុំវិញកំពង់ផែ Muara Angke ក្នុងរដ្ឋ Penjaringan បាន​ជួបប្រទះនឹងការជន់លិចតាមឆ្នេរសមុទ្ររៀងរាល់ព្រឹកអស់រយៈពេលជាងមួយសប្តាហ៍ដោយរំខានដល់ចរាចរណ៍ និងសេវាកម្មដឹកជញ្ជូនអ្នកដំណើរ។

រដ្ឋបាលក្រុង​ Jakarta ខាងជើង បានក៏ដាក់ពង្រាយបុគ្គលិករាប់សិបនាក់ និងម៉ាស៊ីនបូមទឹកជាច្រើនគ្រឿង ដើម្បីកាត់បន្ថយទឹកជំនន់។ ទីភ្នាក់ងារឧតុនិយម អាកាសធាតុ និងភូគព្ភសាស្ត្រ (BMKG) ក៏បានអនុវត្តកិច្ចខិតខំប្រឹងប្រែងកែប្រែអាកាសធាតុ ដើម្បីកាត់បន្ថយកម្រិតភ្លៀងធ្លាក់ចន្លោះពី ១៣​ទៅ​៦៧​ភាគរយផងដែរ។

រដ្ឋបាលក្រុងហ្សាកាតា និងរដ្ឋាភិបាលកណ្តាលបាននឹងកំពុងសាងសង់ទំនប់ទឹកសមុទ្រចម្ងាយ ២២ គីឡូម៉ែត្រក្នុងទីក្រុងហ្សាកាតាខាងជើងក្នុងរយៈពេលប៉ុន្មានឆ្នាំចុងក្រោយនេះ ដើម្បីការពារទឹកជំនន់តាមឆ្នេរសមុទ្រ។

ទឹកជំនន់ ក៏បានវាយប្រហារផ្ទះរាប់ពាន់ខ្នងនៅក្នុងខេត្ត Karawang ភាគខាងលិច Java ចាប់​តាំង​ពីសប្តាហ៍មុន ដោយ​ទឹកបានជន់លិចក្នុងជម្រៅប្រហែល​២០ទៅ៤០​សង់ទីម៉ែត្រ។ យ៉ាងហោចណាស់ ៥៤០០ គ្រួសារនៅក្នុងស្រុកចំនួន ៩ ត្រូវបានរងផលប៉ះពាល់ រួមទាំងនៅក្នុងស្រុក Tirtajaya, Cibuaya, Cipedes, Cilebar, Tempuran, Pakis Jaya និងស្រុក Batujaya។

យោងតាមទីភ្នាក់ងារកាត់បន្ថយគ្រោះមហន្តរាយ Karawang (BPBD) ជំនន់ទឹកភ្លៀងបានជន់លិចសាលារៀនចំនួន២ វិហារឥស្លាមចំនួន​៣និងអាងចិញ្ចឹមត្រីនៅមាត់សមុទ្រប្រហែល១០០០​ហិកតា។ ទឹកជំនន់នេះ ក៏បានធ្វើឱ្យប្រជាពលរដ្ឋ​នៅតំបន់នោះ ដែលភាគច្រើនប្រកបមុខរបរជាអ្នកនេសាទ ឬគ្រប់គ្រងកសិដ្ឋានចិញ្ចឹមត្រីតាមមាត់សមុទ្រ បាត់បង់ប្រភព​ចំណូល​ផងដែរ។

ក្រសួងធនធានទឹក និងឧតុនិយមឥណ្ឌូណេស៊ី បានព្រមានថា តំបន់ភាគច្រើននៃប្រទេសនេះកំពុងឈានចូលដល់រដូវវស្សា ហើយបានព្យាករណ៍ថា នឹងមានការកើនឡើងនូវកម្រិតទឹកភ្លៀង ២០​ភាគរយ ដោយសារតែឥទ្ធិពល La Niña ខ្សោយ ដែលជាធម្មតានាំមកនូវរដូវវស្សាដែលមានភ្លៀងធ្លាក់ខ្លាំងដល់ប្រទេសនេះ។ រដូវវស្សានេះត្រូវបានគេរំពឹងថានឹងឡើងដ​ល់កំពូលនៅចុងខែធ្នូសម្រាប់ផ្នែកភាគច្រើននៃកោះស៊ូម៉ាត្រា និងភាគខាងត្បូងកោះJava៕

អត្ថបទ៖ ប៊ុន សុភាព