ព័ត៌មានអន្ដរជាតិ

កូរ៉េខាងត្បូង៖ ក្រុងព្យុងយ៉ាងកំពុងត្រៀមបញ្ជូនដ្រូន និងទ័ពឲ្យរុស្ស៊ីទៀតហើយ

បានផុស

៣៣ វិនាទី មុន

នៅ

ថ្ងៃចន្ទ ២៣ ធ្នូ ២០២៤

ដោយ

Chheang

យោធាកូរ៉េខាងត្បូង បានកត់សម្គាល់ថា ប្រទេសកូរ៉េខាងជើង កំពុងតែត្រៀមបញ្ជូនកងកម្លាំង និងសព្វាវុធបន្ថែមទៀតទៅឲ្យសម្ព័ន្ធមិត្តរុស្ស៊ី នៅក្នុងសង្គ្រាមប្រឆាំងនឹងអ៊ុយក្រែន។

លោក គីម ជុងអ៊ុន ចុះត្រួតពិនិត្យដ្រូនអត្តឃាត កាលពីខែវិច្ឆិកាឆ្នាំ២០២៤ (រូបភាព៖ KCNA)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អគ្គសេនាធិការចម្រុះរបស់កូរ៉េខាងត្បូង (JCS) បានលើកឡើងនៅថ្ងៃទី២៣ខែធ្នូឆ្នាំ២០២៤ថា កូរ៉េខាងជើងកន្លងមកបានបញ្ជូនប្រព័ន្ធបាញ់គ្រាប់ប្រវែង ១៧០មិល្លិម៉ែត្រ និងប្រព័ន្ធបាញ់រ៉ុកកែតប្រវែង ២៤០មិល្លិម៉ែត្រ ទៅឲ្យរុស្ស៊ីរួចមកហើយ បច្ចុប្បន្នរដ្ឋាភិបាលក្រុងព្យុងយ៉ាង កំពុងសម្ងំផលិតដ្រូនអត្តឃាតច្រើនគ្រឿងទៀតសម្រាប់ដឹកទៅក្រុងមូស្គូ។

កាលពីខែវិច្ឆិកា លោក គីម ជុងអ៊ុន មេដឹកនាំកូរ៉េខាងជើង បានសាកល្បងដ្រូនអត្តឃាតរបស់ខ្លួនដោយជោគជ័យ។

មន្ត្រី JCS បាននិយាយថា៖ «ដ្រូនអត្តឃាត គឺជាកិច្ចការមួយដែលលោក គីម ជុងអ៊ុន បានផ្តោតលើ» ដោយបន្ថែមថា កូរ៉េខាងជើងបានបង្ហាញពីចេតនារបស់ខ្លួនក្នុងការផ្តល់ដ្រូនទាំងនោះឲ្យទៅរុស្ស៊ី។

ដ្រូនបែបនេះ ត្រូវបានប្រើប្រាស់យ៉ាងច្រើននៅក្នុងសង្គ្រាមអ៊ុយក្រែន ហើយលោក គីម បានបញ្ជាឲ្យផលិតសព្វាវុធដែនអាកាស និងការធ្វើបច្ចុប្បន្នភាពនៃទ្រឹស្តី និងការអប់រំយោធា ដោយលើកឡើងពីការប្រកួតប្រជែងជាសកលកាន់តែខ្លាំងឡើង។

សូមបញ្ជាក់ថា កូរ៉េខាងត្បូង សហរដ្ឋអាមេរិក និងអ៊ុយក្រែន បាននិយាយថា មានទាហានកូរ៉េខាងជើងប្រហែល ១២ ០០០ នាក់ នៅក្នុងទឹកដីរុស្ស៊ី។ JCS បានឲ្យដឹងថា យ៉ាងហោចណាស់ ១ ១០០នាក់ក្នុងចំណោមពួកគេ ត្រូវបានសម្លាប់ ឬរងរបួស។ បើតាមរបាយការណ៍ទីភ្នាក់ងារចារកម្មកូរ៉េខាងត្បូង ទាហានកូរ៉េខាងជើងស្លាប់ប្រហែល ១០០នាក់ និង ១ ០០០នាក់ផ្សេងទៀតបានរងរបួសនៅក្នុងតំបន់ Kursk៕

ដោយ៖ ឈាង

ចុចអាន៖ លោក Zelensky៖ រុស្ស៊ីដុតមុខសាកសពទាហានកូរ៉េខាងជើង ដើម្បីលាក់អត្តសញ្ញាណ (វីដេអូ)