ខែក្រោយ BRICS នឹងមានដៃគូផ្លូវការ ៩ប្រទេសទៀត ក្នុងនោះមានអាស៊ីអាគ្នេយ៍ ៣ប្រទេសដែរ

តាមការបញ្ជាក់ពីរុស្ស៊ី, ប្រទេសចំនួន៩ នឹងក្លាយជារដ្ឋដៃគូ BRICS ផ្លូវការនៅខែមករាឆ្នាំ២០២៥ ហើយក្នុងចំណោមនោះ ក៏មានប្រទេសនៃតំបន់អាស៊ីអាគ្នេយ៍ចំនួន៣ផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Yuri Ushakov ជំនួយការប្រធានាធិបតីរុស្ស៊ី បានប្រកាសនៅក្នុងសន្និសីទកាសែតកាលពីថ្ងៃចន្ទទី២៣ខែធ្នូឆ្នាំ២០២៤ថា ប្រទេសទាំង៩ ដូចជា បេឡារុស បូលីវី ឥណ្ឌូណេស៊ី កាហ្សាក់ស្ថាន ថៃ គុយបា អ៊ូហ្គង់ដា ម៉ាឡេស៊ី និងអ៊ូសបេគីស្ថាន នឹងក្លាយជាដៃគូផ្លូវការរបស់ BRICS ចាប់ពីថ្ងៃទី១ខែមករាឆ្នាំ២០២៥ទៅ។

តាមពិតឋានៈប្រទេសជាដៃគូថ្មីនេះ ត្រូវបានអនុម័តក្នុងកិច្ចប្រជុំកំពូល BRICS ដែលរុស្ស៊ីរៀបចំធ្វើជាម្ចាស់ផ្ទះនៅទីក្រុង Kazan តាំងតែពីខែតុលាមកម្ល៉េះ។ ឋានៈនេះ អនុញ្ញាតឲ្យប្រទេសទាំងនោះ ចូលរួមជាអចិន្ត្រៃយ៍នៅក្នុងសម័យប្រជុំពិសេសនៃជំនួបកំពូលរបស់ BRICS និងកិច្ចប្រជុំរដ្ឋមន្ត្រីការបរទេស ក៏ដូចជាព្រឹត្តិការណ៍កម្រិតខ្ពស់ផ្សេងទៀត។ មិនត្រឹមប៉ុណ្ណឹងប្រទេសដៃគូ ក៏អាចចែករំលែកឯកសារអំពីលទ្ធផលការងាររបស់ក្រុមផងដែរ។

សូមបញ្ជាក់ថា ដើមឡើយ BRICS មានតែប្រេស៊ីល រុស្ស៊ី ឥណ្ឌា និងចិន ប៉ុណ្ណោះ ដោយត្រូវបានបង្កើតឡើងក្នុងឆ្នាំ២០០៩ ជាក្រុមកិច្ចសហប្រតិបត្តិការសម្រាប់ប្រទេសដែលមានសេដ្ឋកិច្ចកំពុងរីកចម្រើន ហើយមិនយូរប៉ុន្មានក៏មានអាហ្វ្រិកខាងត្បូងចូលរួមនៅឆ្នាំ២០១០។ ក្រោ​យមក ប្លុកនេះបានពង្រីកខ្លួន ដោយបន្ថែមសមាជិកថ្មីៗដូចជាអ៊ីរ៉ង់ អេហ្ស៊ីប អេត្យូពី និងអារ៉ាប់រួម។

BRICS តំណាងឲ្យប្រហែល៤០%នៃចំនួនប្រជាជនពិភពលោក និង១ភាគ៥នៃពាណិជ្ជកម្មសកល ប៉ុន្តែក្រុមនេះ ត្រូវបានបណ្តាប្រទេសលោកខាងលិច ចាត់ទុកជាគូប្រជែងរបស់ប្លុកដែលខ្លួនកំពុងដឹកនាំ តួយ៉ាងដូចជា G7 ជាដើម៕

អត្ថបទ៖ សុខ សុវណ្ណ

ចុចអាន៖ ពូទីន៖ មិនមែន​លោកខាង​លិចទេ តែ​ជា​ BRICS ដែល​ជួយ​ដល់​កំណើន​សេដ្ឋកិច្ចពិភពលោក