បង់ក្លាដែសស្នើឲ្យឥណ្ឌាធ្វើ​បត្យាប័ន​អតីតនាយករដ្ឋមន្ត្រី Hasina

អាជ្ញាធរ​​បង់ក្លាដែស​បាន​ស្នើប្រទេស​ឥណ្ឌាឲ្យធ្វើ​បត្យាប័ន​អតីត​នាយក​រដ្ឋមន្ត្រី​ លោកស្រី Sheikh Hasina ដែល​បាន​ភៀស​ខ្លួន​ទៅ​ក្រុង New Delhi ក្នុង​ខែ​សីហា ត្រឡប់​មក​ប្រទេស​ខ្លួនវិញ​ដើម្បី​ដំណើរការ​តុលាការ។ នេះបើយោងតាមការចេញផ្សាយរបស់សារព័ត៌មាន​ Al Jazeera នៅថ្ងៃទី២៤ខែធ្នូនេះ។

ប្រមុខ​ស្តីទី​នៃ​ក្រសួង​ការ​បរទេស​ប្រទេស​បង់ក្លាដែស លោក Touhid Hossain បានប្រាប់អ្នកយកព័ត៌មានកាលពីថ្ងៃចន្ទ ដោយសំដៅទៅលើការឆ្លើយឆ្លងការទូតរវាងប្រទេសទាំងពីរថា «យើងបានផ្ញើលិខិតមួយទៅកាន់រដ្ឋាភិបាលឥណ្ឌាដោយនិយាយថា រដ្ឋាភិបាលបង់ក្លាដែសចង់ឱ្យលោកស្រី Hasina ត្រលប់មកប្រទេសបង់ក្លាដែសវិញ សម្រាប់ដំណើរការតុលាការ»។ ទោះយ៉ាងណាលោក Hossain មិន​បាន​បញ្ជាក់​លម្អិត​អំពី​ដំណើរការ​របស់​តុលាការ​ទេ។

គួរបញ្ជាក់ថា ទំនាក់ទំនងរវាងប្រទេសជិតខាងអាស៊ីខាងត្បូងទាំងពីរនេះ ដែលមានទំនាក់ទំនងពាណិជ្ជកម្ម និងវប្បធម៌រឹងមាំ បានរអាក់រអួលចាប់តាំងពីលោកស្រី Hasina ត្រូវបានគេទម្លាក់បន្ទាប់ពីការតវ៉ាដោយហិង្សាប្រឆាំងនឹងការគ្រប់គ្រងរបស់លោកស្រីហើយលោកស្រីបានភៀសខ្លួនឆ្លងកាត់ព្រំដែន។

សំណើរបស់ទីក្រុង Dhaka ទៅកាន់ទីក្រុង New Delhi នេះបានកើតឡើងពីរសប្តាហ៍បន្ទាប់ពីរដ្ឋមន្ត្រីការបរទេសឥណ្ឌាបានធ្វើទស្សនកិច្ចនៅប្រទេសបង់ក្លាដែស ដែលប្រទេសទាំងពីរបាននិយាយថា ពួកគេសង្ឃឹមថានឹងកែសម្រួលទំនាក់ទំនង។

ប្រមុខរដ្ឋាភិបាលបណ្តោះអាសន្នរបស់ប្រទេសបង់ក្លាដែស ម្ចាស់ជ័យលាភីណូបែលលោក Muhammad Yunus បានទាមទារឱ្យឥណ្ឌាបញ្ជូន Hasina ត្រឡប់មកវិញដើម្បីឱ្យប្រទេសបង់ក្លាដែសដំណើរតាមច្បាប់ចំពោះឧក្រិដ្ឋកម្មប្រឆាំងនឹងបាតុករ និងគូប្រជែងរបស់លោកស្រីនិងឧក្រិដ្ឋកម្មដែលលោកស្រីបានប្រព្រឹត្តក្នុងអំឡុងពេលកាន់តំណែងរយៈពេល១៥ ឆ្នាំកន្លងមក។ លោកYunus ក៏​មិន​សប្បាយចិត្ត​ជាមួយលោកស្រី Hasina ដែល​បាន​រិះគន់​រដ្ឋបាល​របស់​គាត់​ពី​ទីក្រុង New Delhiផងដែរ។

លោកស្រី Hasina ប្រឈមមុខនឹងការចោទប្រកាន់ជាច្រើន រួមទាំងឧក្រិដ្ឋកម្មប្រឆាំងមនុស្សជាតិ អំពើប្រល័យពូជសាសន៍ និងឃាតកម្ម ក្នុងចំណោមរឿងផ្សេងទៀត។ សម្ព័ន្ធមិត្តរាប់សិបនាក់របស់លោកស្រី Hasina ត្រូវបានចាប់ខ្លួនចាប់តាំងពីរបបរបស់លោកស្រីដួលរលំនៅក្នុងខែសីហា ដោយចោទប្រកាន់ថាមានជាប់ពាក់ព័ន្ធក្នុងការបង្ក្រាបរបស់ប៉ូលិសដែលបានសម្លាប់មនុស្សជាង ៧៥០ នាក់ ដែលភាគច្រើនជាយុវជនក្នុងអំឡុងពេលចលាចលដែលនាំទៅដល់ការដកលោកស្រីចេញ។

ជាមួយគ្នានេះតុលាការឧក្រិដ្ឋកម្មអន្តរជាតិដែលមានមូលដ្ឋាននៅទីក្រុង Dhaka បានចេញដីកាចាប់ខ្លួនលោកស្រី និងជំនួយការជិតស្និទ្ធរបស់លោកស្រី ហើយរដ្ឋាភិបាលបានស្វែងរកជំនួយពីអង្គការប៉ូលីសអន្តរជាតិ Interpol សម្រាប់ការចាប់ខ្លួននេះផងដែរ៕

អត្ថបទ៖ ប៊ុន សុភាព