ថៃ ឲ្យ​ពលរដ្ឋ​ឈប់​៥​ថ្ងៃ​ឆ្លង​ឆ្នាំ និង​រំពឹង​ទាញ​ចំណូល ១,៨​ពាន់​លាន​ដុល្លារ​ពី​ទេសចរណ៍

កំណើន​ទេសចរណ៍​​នា​អំឡុង​ពិធី​បុណ្យ​ឆ្លង​ឆ្នាំ​ថ្មី​នៅ​ប្រទេស​ថៃ ត្រូវ​បាន​គេ​​​រំពឹង​ថា​នឹង​បង្កើត​ចំណូល​ប្រមាណ ១,៨​ពាន់​លាន​ដុល្លារ ខណៈ​រដ្ឋាភិបាល​ប្រទេសសេដ្ឋកិច្ចធំជាងគេទីពីរនៅអាស៊ីអាគ្នេយ៍​នេះ បាន​ប្រកាស​ថ្ងៃ​ឈប់​សម្រាក​​នៅ​ទូទាំង​ប្រទេស​រយៈពេល​៥​ថ្ងៃ រាប់​ចាប់​ពី​ថ្ងៃទី​២៨​ខែ​ធ្នូ​​ឆ្នាំ​២០២៤​ដល់​ថ្ងៃ​ទី​១​ខែ​មករា​ឆ្នាំ​២០២៥។

ប្រធាន​មន្ទីរ​ទេសចរណ៍​ លោក Thapanee Kiatphaibool បាននិយាយថា ចំនួនភ្ញៀវទេសចរបរទេសក្នុងអំឡុងពេលចូលឆ្នាំថ្មីឆ្នាំ​២០២៥ ត្រូវបានប៉ាន់ប្រមាណថាមាន ១,៥៦​លាននាក់ កើន​ឡើង ១៦% ដែលបង្កើតប្រាក់ចំណូលប្រមាណ ៤៥​ពាន់លាន​បាត កើន​ឡើង ២០%។

ទេសចរណ៍​ក្នុងស្រុក​នឹង​ចូលរួម​ចំណែក​ធំ​នៅ​ក្នុង​កំណើន​នេះ ដោយមានភ្ញៀវ​ជាតិ​ថៃ​ប្រមាណ ៤,៤១​លាននាក់ កើនឡើង ២៩% បើធៀបនឹងរយៈពេលដូចគ្នាកាលពីឆ្នាំមុន។ ពួកគេនឹងបង្កើតប្រាក់​​ចំណូល​សម្រាប់​វិស័យ​​ទេសចរណ៍ចំនួន ១៧ពាន់លានបាត កើនឡើង ៣០%។

កត្តាជាច្រើន ត្រូវបានគេរំពឹងថានឹងជំរុញកំណើននេះ ​ដូចជា «ភាពងាយស្រួលនៃការធ្វើដំណើរ» រួមទាំងការលើកលែងទិដ្ឋាការសម្រាប់ប្រទេសចំនួន​៩៣ និងនីតិវិធីចូល​ប្រទេស​ដែលមានលក្ខណៈងាយស្រួល។

លោក Kiatphaibool បាន​ប្រាប់​ថា ការបើកដំណើរការផ្លូវហោះហើរថ្មីយ៉ាងហោចណាស់ចំនួន៣០​ ពីទីផ្សារសំខាន់ៗដូចជា ចិន កូរ៉េខាងត្បូង តៃវ៉ាន់ ឥណ្ឌា ស្កែនឌីណាវៀ និងបារាំង នឹងពង្រឹងភាពងាយស្រួលបន្ថែមទៀត។

ការកើនឡើងប្រជាប្រិយភាពរបស់ថៃជាទិសដៅចូលឆ្នាំថ្មី ក៏ជាកត្តាជំរុញដ៏សំខាន់ផងដែរ។ ថៃ ត្រូវបានទទួលស្គាល់ដោយប្រព័ន្ធផ្សព្វផ្សាយពិភពលោក ដូចជា Condé Nast Traveler ដែលបានចាត់ចំណាត់ថ្នាក់​ក្នុងចំណោមកន្លែងល្អបំផុតទាំង​២០ របស់ពិភពលោកសម្រាប់ពិធីបុណ្យចូលឆ្នាំថ្មី។

មួយ​វិញ​ទៀត ដើម្បីដោះស្រាយកង្វល់អំពីតម្លៃសំបុត្រយន្តហោះខ្ពស់ រដ្ឋាភិបាល​ថៃ​កំពុងសហការជាមួយក្រុមហ៊ុនអាកាសចរណ៍ចំនួន​៦ ផ្តល់ការបញ្ចុះតម្លៃ ៣០% លើផ្លូវទេសចរណ៍ពេញនិយម រួមមាន Chiang Mai, Chiang Rai, Krabi, Phuket, Samui, Udon Thani, Ubon Ratchathani និង Khon Kaen៕

ដោយ៖ ឈាង