ព័ត៌មានអន្ដរជាតិ

ស៊ីរី ប្រាប់ឲ្យអ៊ីរ៉ង់នៅស្ងៀម កុំបង្កចលាចលទៀត

បានផុស

២ ខែ មុន

នៅ

ថ្ងៃពុធ ២៥ ធ្នូ ២០២៤

ដោយ

Chheang

ទើបឡើងកាន់តំណែងថ្មីថ្មោង លោក Assad Hassan al-Shibani រដ្ឋមន្ត្រីការបរទេសស៊ីរី បានផ្ដែផ្ដាំទៅប្រទេសអ៊ីរ៉ង់ កុំឲ្យចេះលូកដៃកិច្ចការផ្ទៃក្នុង និងបង្កភាពចលាចលនៅក្នុងប្រទេសស៊ីរីតទៅទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សារបង្ហោះនៅលើបណ្ដាញសង្គម X កាលពីថ្ងៃទី២៤ខែធ្នូឆ្នាំ២០២៤ របស់លោក Shibani បានរៀបរាប់ថា៖ «អ៊ីរ៉ង់ត្រូវតែគោរពឆន្ទៈរបស់ប្រជាជនស៊ីរី និងអធិបតេយ្យភាព និងសន្តិសុខរបស់ប្រទេស។ យើងព្រមានពួកគេពីការរីករាលដាលភាពចលាចលនៅក្នុងប្រទេសស៊ីរី ហើយយើងធ្វើឲ្យពួកគេទទួលខុសត្រូវចំពោះផលប៉ះពាល់នៃការលើកឡើងចុងក្រោយនេះ»។

សេចក្ដីថ្លែងការណ៍របស់រដ្ឋមន្ត្រីការបរទេសស៊ីរី ធ្វើឡើងដើម្បីជាការឆ្លើយតបនឹងសុន្ទរកថាមួយតាមទូរទស្សន៍កាលពីថ្ងៃអាទិត្យរបស់មេដឹកនាំកំពូលរបស់អ៊ីរ៉ង់ លោក Ayatollah Ali Khamenei។

លោក Khamenei បានអំពាវនាវដល់យុវជនស៊ីរីឲ្យងើបឈរប្រឆាំងនឹងរដ្ឋាភិបាលថ្មីនៅក្នុងប្រទេស ដោយបន្ថែមថា៖ «យើងព្យាករថា ក្រុមខ្លាំង និងគួរឲ្យគោរពមួយ នឹងលេចឡើងនៅក្នុងប្រទេសស៊ីរី ពីព្រោះសព្វថ្ងៃនេះ យុវជនស៊ីរីមិនមានអ្វីត្រូវបាត់បង់នោះទេ។ សាលារៀន សាកលវិទ្យាល័យ ផ្ទះសម្បែង និងផ្លូវថ្នល់របស់ពួកគេសុទ្ធតែមិនមានសុវត្ថិភាព។ ដូច្នេះ ពួកគេត្រូវតែឈរយ៉ាងរឹងមាំជាមួយនឹងការប្ដេជ្ញាចិត្តប្រឆាំងនឹងអ្នករៀបចំផែនការ និងអ្នកបង្កភាពអសន្តិសុខ ហើយអាចយកឈ្នះលើពួកគេបាន»។

ក្រុមឧទ្ទាមស៊ីរី បានទម្លាក់លោកប្រធានាធិបតី Bashar al-Assad កាលពីថ្ងៃទី៨ធ្នូ បន្ទាប់ពីសង្គ្រាមស៊ីវិលអស់រយៈពេល១៣ឆ្នាំ។

អ៊ីរ៉ង់ កន្លងមកបានចំណាយប្រាក់រាប់ពាន់លានដុល្លារ ដើម្បីគាំទ្រលោក Assad នៅអំឡុងពេលសង្រ្គាម ហើយបានដាក់ពង្រាយកងឆ្មាំបដិវត្តន៍របស់ខ្លួនទៅកាន់ស៊ីរីជួយសម្ព័ន្ធមិត្តរក្សាអំណាច។

ការផ្តួលរំលំលោក Assad ត្រូវបានគេមើលឃើញថាជាការវាយប្រហារដ៏ធំមួយចំពោះសម្ព័ន្ធមិត្តនយោបាយ និងយោធា របស់អ៊ីរ៉ង់ ដែលប្រឆាំងនឹងឥទ្ធិពលរបស់អ៊ីស្រាអែល និងសហរដ្ឋអាមេរិកនៅមជ្ឈិមបូព៌ា៕

ដោយ៖ ឈាង