ព័ត៌មានអន្ដរជាតិ

បទឈប់បាញ់ត្រូវពន្យារម្ដងទៀត ខណៈអ៊ីស្រាអែលនិងហាម៉ាសបន្ទោសគ្នាទៅវិញទៅមក

បានផុស

៣ ខែ មុន

នៅ

ថ្ងៃព្រហស្បតិ៍ ២៦ ធ្នូ ២០២៤

ដោយ

Chheang

អ៊ីស្រាអែល និងក្រុមហាម៉ាស កាលពីថ្ងៃព្រហស្បតិ៍ទី២៥ខែធ្នូឆ្នាំ២០២៤ បានចោទប្រកាន់គ្នាទៅវិញទៅមកថាបានធ្វើឲ្យមានការអាក់ខានដល់បទឈប់បាញ់ ខណៈដែលភាគីទាំងពីរកាន់តែខិតជិតទៅដល់កិច្ចព្រមព្រៀងដែលអាចបញ្ចប់ភ្លើងសង្រ្គាមរយៈពេល១៤ខែនៅតំបន់ហ្គាហ្សា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមសកម្មប្រយុទ្ធប៉ាឡេស្ទីន បាននិយាយថា អ៊ីស្រាអែលបានដាក់លក្ខខណ្ឌថ្មីបន្ថែមទៀត ចំណែកឯនាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ បានចោទប្រកាន់ហាម៉ាសថាបានច្រានចោលនូវអ្វីដែលបានព្រមព្រៀងគ្នាពីមុនរួចមកហើយ។

ក្រុមហាម៉ាស បានលើកឡើងថា៖ «អ្នកឈ្លានពានបានកំណត់លក្ខខណ្ឌថ្មីទាក់ទងនឹងការដកទ័ព បទឈប់បាញ់ អ្នកទោស និងការវិលត្រឡប់មកវិញនៃជនភៀសខ្លួន ដែលធ្វើឲ្យមានការពន្យារពេលក្នុងការឈានទៅដល់កិច្ចព្រមព្រៀង»។

ហាម៉ាស បានបន្ថែមថា ខ្លួនកំពុងបង្ហាញពីភាពបត់បែន ហើយថាការចរចាដែលសម្រុះសម្រួលដោយកាតា និងអេហ្ស៊ីប គឺជារឿងប្រាកដប្រជាមួយ។

លោក Netanyahu បានប្រឆាំងដោយនិយាយនៅក្នុងសេចក្តីថ្លែងការណ៍មួយថា៖ «អង្គការភេរវករ ហាម៉ាស នៅតែបន្តនិយាយកុហក ហើយកំពុងតែច្រានចោលនូវការព្រមព្រៀងគ្នាដែលបានសម្រេចរួចមកហើយ និងកំពុងបន្តបង្កើតការលំបាកដល់កិច្ចចរចា»។

យ៉ាងណាមិញ មេដឹកនាំអ៊ីស្រាអែល បានបន្ថែមថា អ៊ីស្រាអែលនឹងបន្តកិច្ចខិតខំប្រឹងប្រែងឥតឈប់ឈរ ដើម្បីនាំយកចំណាប់ខ្មាំងមកវិញទាល់តែបាន។

គួរបញ្ជាក់ថា ក្រុមហាម៉ាស កំពុងទាមទារឲ្យបញ្ចប់សង្គ្រាម ខណៈដែលអ៊ីស្រាអែល អះអាងថា ខ្លួនចង់បញ្ចប់ការគ្រប់គ្រងរបស់ក្រុមហាម៉ាសជាមុនសិន ដើម្បីធានាថាវានឹងលែងបង្កការគំរាមកំហែងដល់ជនជាតិអ៊ីស្រាអែលទៀតហើយ។

ក្នុងអំឡុងពេលនៃការវាយប្រហារកាលពីថ្ងៃទី៧ខែតុលាឆ្នាំ២០២៣ ទៅលើភាគខាងត្បូងប្រទេសអ៊ីស្រាអែល ក្រុមហាម៉ាសបានចាប់ខ្លួនមនុស្សប្រហែល ២៥០នាក់ធ្វើជាចំណាប់ខ្មាំង ហើយបាននាំពួកគេទៅកាន់តំបន់ហ្គាហ្សា។

បទឈប់បាញ់ពីមុនក្នុងខែវិច្ឆិកាឆ្នាំ២០២៣ បានរំដោះចំណាប់ខ្មាំងជាង ១០០នាក់។ អ៊ីស្រាអែល ប្រាប់ថា ចំណាប់ខ្មាំងប្រហែល ១០០នាក់ទៀតនៅតែស្ថិតក្នុងតំបន់ហ្គាហ្សា ដែលយ៉ាងហោចណាស់មួយភាគបីនៃពួកគេត្រូវបានសម្លាប់ក្នុងអំឡុងពេលការវាយប្រហារ ឬស្លាប់នៅក្នុងការជាប់ឃុំឃាំង៕

ដោយ៖ ឈាង

Related Topics:សង្គ្រាមអ៊ីស្រាអែល-ប៉ាឡេស្ទីន