ព័ត៌មានអន្ដរជាតិ

ប៉ាគីស្ថានវាយប្រហារក្រុមបះបោរ សម្លាប់មនុស្ស៤៦នាក់ ចូលដល់ដីអាហ្វហ្គានីស្ថានដែលត្រៀមតបតវិញ

បានផុស

១ ខែ មុន

នៅ

ថ្ងៃព្រហស្បតិ៍ ២៦ ធ្នូ ២០២៤

ដោយ

ប្រទេសប៉ាគីស្ថានបានធ្វើការវាយប្រហារតាមអាកាសទៅលើភាគខាងកើតប្រទេសអាហ្វហ្គានីស្ថានសម្លាប់មនុស្សយ៉ាងហោចណាស់ ៤៦នាក់ ភាគច្រើនជាស្ត្រីនិងកុមារ ខណៈទំនាក់ទំនងរបស់ប្រទេសទាំងពីរកាន់តែមានភាពតានតឹង។ នេះបើយោងតាមការចេញផ្សាយរបស់ទីភ្នាក់ងារព័ត៌មាន AP នៅថ្ងៃទី២៦ខែធ្នូនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកនាំពាក្យរងរបស់ក្រុមតាលីបង់គ្រប់គ្រងអាហ្វហ្គានីស្ថាន បានឲ្យដឹងថា មនុស្ស៥០នាក់ រួមទាំងស្ត្រីនិងកុមារបានស្លាប់ និងមនុស្ស៦នាក់ទៀតបានរងរបួសនៅក្នុងការវាយប្រហារនេះ។ អ្នកស្លាប់គឺជាជនភៀសខ្លួនទៅកាន់ប្រទេសអាហ្វហ្គានីស្ថាន ដោយសារតែការវាយលុករបស់ប៉ាគីស្ថាននៅភាគពាយព្យ។

កាតវាយប្រហារនេះ បានកើតឡើងមួយថ្ងៃ បន្ទាប់ពីមន្ត្រីសន្តិសុខប៉ាគីស្ថានដែលនិយាយក្នុងលក្ខខណ្ឌមិនបញ្ចេញឈ្មោះ បានប្រាប់សារព័ត៌មាន The Associated Press ថា ប្រតិបត្តិការកាលពីថ្ងៃអង្គារគឺដើម្បីរុះរើកន្លែងហ្វឹកហ្វឺន និងសម្លាប់ពួកបះបោរនៅ Paktika ។ ការវាយប្រហារនេះក៏បានកើតឡើងប៉ុន្មានម៉ោងបន្ទាប់ពីលោក Mohammad Sadiq តំណាងពិសេសរបស់ប្រទេសប៉ាគីស្ថានប្រចាំអាហ្វហ្គានីស្ថាន បានធ្វើដំណើរទៅកាន់ទីក្រុងកាប៊ុល ដើម្បីពិភាក្សាអំពីបញ្ហាជាច្រើន។

ក្រសួងការបរទេសអាហ្វហ្គានីស្ថាននៅទីក្រុងកាប៊ុល បានកោះហៅបេសកជនប៉ាគីស្ថាន ហើយបានធ្វើការតវ៉ាយ៉ាងខ្លាំងជុំវិញការវាយប្រហារដោយយោធាប៉ាគីស្ថាននេះ។ ក្រសួននេះថា៖«នឹងមិនទទួលយកការរំលោភលើបូរណភាពទឹកដីរបស់ប្រទេសនេះក្នុងកាលៈទេសៈណាក៏ដោយ ហើយប្រទេសនេះបានត្រៀមខ្លួនរួចជាស្រេចដើម្បីការពារឯករាជ្យភាព និងទឹកដីរបស់ខ្លួន» ហើយថា «សកម្មភាពមិនទទួលខុសត្រូវបែបនេះនឹងពិតជាមានផលវិបាក»។

ប៉ាគីស្ថានមិនបានធ្វើអត្ថាធិប្បាយលើការវាយប្រហារចុងក្រោយនេះទេ ប៉ុន្តែយោធាប៉ាគីស្ថានបាននិយាយកាលពីថ្ងៃពុធថា កងកម្លាំងសន្តិសុខបានសម្លាប់ពួកបះបោរ១៣នាក់នៅក្នុងប្រតិបត្តិការស៊ើបការណ៍សម្ងាត់មួយនៅ South Waziristan ដែលជាស្រុកមួយស្ថិតនៅខេត្ត Paktika ភាគខាងកើតប្រទេសអាហ្វហ្គានីស្ថាន។

គួរបញ្ជាក់ថា ប្រទេសប៉ាគីស្ថានមានការវាយប្រហារដោយក្រុមសកម្មប្រយុទ្ធរាប់មិនអស់ក្នុងរយៈពេលពីរទសវត្សរ៍កន្លងមក ប៉ុន្តែមានការកើនឡើងក្នុងរយៈពេលប៉ុន្មានខែថ្មីៗនេះ។ ភាពតានតឹងបានកើនឡើងខ្ពស់ក្នុងខែមីនា ពេលប៉ាគីស្ថាន បានវាយប្រហារលើតំបន់ព្រំដែនក្នុងប្រទេសអាហ្វហ្គានីស្ថាន៕