ព័ត៌មានអន្ដរជាតិ

អ្នកកាសែត៥នាក់ស្លាប់ក្នុងការវាយប្រហាររបស់អ៊ីស្រាអែលនៅជិតមន្ទីរពេទ្យហ្គាហ្សា

បានផុស

៣ ខែ មុន

នៅ

ថ្ងៃព្រហស្បតិ៍ ២៦ ធ្នូ ២០២៤

ដោយ

អ្នកកាសែត៥នាក់ត្រូវបានសម្លាប់នៅក្នុងការវាយប្រហាររបស់អ៊ីស្រាអែលនៅតំបន់ជុំវិញមន្ទីរពេទ្យមួយនៅកណ្តាលតំបន់ហ្គាហ្សា។ នេះបើយោងតាមការចេញផ្សាយរបស់សារព័ត៌មាន AP នៅថ្ងៃទី២៦ខែធ្នូនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អាជ្ញាធរប៉ាឡេស្ទីន និងរបាយការណ៍ប្រព័ន្ធផ្សព្វផ្សាយ បានឱ្យដឹងថា អ្នកកាសែតនៃសារព័ត៌មានប៉ុស្តិ៍ Al-Quds Today ដែលកំពុងរាយការណ៍អំពីព្រឹត្តិការណ៍នៅជិតមន្ទីរពេទ្យ al-Awda មានទីតាំងនៅជំរុំជនភៀសខ្លួន Nuseirat ត្រូវបានវាយប្រហារដោយការវាយប្រហារតាមអាកាសរបស់អ៊ីស្រាអែល ចំរថយន្តរបស់ពួកគេ។

វីដេអូពីកន្លែងកើតហេតុដែលបានផ្សព្វផ្សាយតាមបណ្តាញសង្គម បង្ហាញថា រថយន្តមួយគ្រឿងបានឆាបឆេះយ៉ាងសន្ធោសន្ធៅ។

អ្នកកាសែតដែលបានស្លាប់ទាំងនោះ មានឈ្មោះ Fadi Hassouna, Ibrahim al-Sheikh Ali, Mohammed al-Ladah, Faisal Abu al-Qumsan និង Ayman al-Jadi។ ខណៈលោក Ayman al-Jadi បានរង់ចាំប្រពន្ធរបស់គាត់នៅមុខមន្ទីរពេទ្យដើម្បីសំរាលកូនដំបូងរបស់ពួកគេ។

បណ្តាញព័ត៌មាន Quds បាននិយាយថា ក្រុមការពារជនស៊ីវិលបានទាញយកសាកសពជនរងគ្រោះ និងពន្លត់ភ្លើងនៅកន្លែងកើតហេតុ។ ហើយបន្ទាប់ពីការវាយប្រហារនេះមិនមានការអត្ថាធិប្បាយភ្លាមៗពីខាងអ៊ីស្រាអែលទេនោះទេ។

ពាក់ព័ន្ធបញ្ហានេះគណៈកម្មាធិការការពារអ្នកកាសែត (CPJ) នៅដើមខែនេះបានថ្កោលទោសការសម្លាប់អ្នកកាសែតប៉ាឡេស្ទីនបួននាក់របស់អ៊ីស្រាអែលក្នុងរយៈពេលមួយសប្តាហ៍ ដោយអំពាវនាវឱ្យសហគមន៍អន្តរជាតិទទួលខុសត្រូវចំពោះការវាយប្រហាររបស់ខ្លួនប្រឆាំងនឹងប្រព័ន្ធផ្សព្វផ្សាយ។

យោងតាម CPJ បានឱ្យដឹងថា អ្នកកាសែតយ៉ាងហោចណាស់ ១៤១ នាក់ត្រូវបានសម្លាប់នៅក្នុងសង្គ្រាមរបស់អ៊ីស្រាអែលនៅហ្គាហ្សាចាប់តាំងពីថ្ងៃទី ៧ខែតុលាឆ្នាំ២០២៣៕