លោក បៃដិន ថ្កោលទោស​រុស្ស៊ី​ដែល​វាយ​ប្រហារ​អ៊ុយក្រែន​ចំ​ថ្ងៃ​បុណ្យ​ណូអែល

ប្រធានាធិបតី​អាមេរិក លោក ចូ បៃដិន បានថ្កោលទោសយ៉ាងខ្លាំងចំពោះការវាយប្រហារដោយ​មីស៊ីល និងយន្តហោះគ្មានមនុស្សបើករបស់រុស្ស៊ី​ទៅ​លើអ៊ុយក្រែន ដែលបានកំណត់គោលដៅលើហេដ្ឋារចនាសម្ព័ន្ធថាមពលសំខាន់ៗក្នុងអំឡុងពេលបុណ្យណូអែល។

លោក បៃដិន បាន​លើក​ឡើង​កាល​ពី​ថ្ងៃ​ពុធ​ទី​២៥​ធ្នូ​ថា សហគមន៍អន្តរជាតិត្រូវតែបន្តឈរជាមួយអ៊ុយក្រែន ក្នុងការប្រយុទ្ធប្រឆាំងនឹងការឈ្លានពានរបស់រុស្ស៊ី។ លោកក៏បាននិយាយផងដែរថា ក្រសួងការពារជាតិអាមេរិក នឹងបង្កើនការចែកចាយសព្វាវុធទៅកាន់អ៊ុយក្រែន។

សេចក្តីថ្លែងការណ៍​របស់​លោក បៃដិន បាន​រៀបរាប់​ថា៖ «នៅដើមថ្ងៃបុណ្យណូអែល រុស្ស៊ីបានបាញ់បង្ហោះ​មីស៊ីល និងយន្តហោះគ្មានមនុស្សបើក ប្រឆាំងនឹងទីក្រុង​របស់​អ៊ុយក្រែន និងហេដ្ឋារចនាសម្ព័ន្ធថាមពលសំខាន់ៗ។ គោលបំណងនៃការវាយប្រហារដ៏ក្ដៅគគុកនេះ គឺដើម្បីកាត់ផ្តាច់ការ​ប្រើប្រាស់កម្ដៅ និងអគ្គិសនីរបស់ប្រជាជនអ៊ុយក្រែនក្នុងអំឡុងរដូវរងា និងធ្វើ​ឲ្យ​ប៉ះពាល់ដល់សុវត្ថិភាពនៃបណ្តាញអគ្គិសនីរបស់ខ្លួន»។

លោក បៃដិន បាន​បន្ថែម​ថា៖ «ខ្ញុំសូមបញ្ជាក់ឲ្យច្បាស់ ប្រជាជនអ៊ុយក្រែនសមនឹងរស់នៅដោយសន្តិភាព និងសុវត្ថិភាព ហើយសហរដ្ឋអាមេរិក និងសហគមន៍អន្តរជាតិត្រូវតែបន្តឈរជាមួយអ៊ុយក្រែនរហូតដល់​ឈ្នះលើការឈ្លានពានរបស់រុស្ស៊ី»។

ប្រធានាធិបតីអ៊ុយក្រែនលោក វ្ល៉ាឌីមៀរ ហ្សេលេនស្គី បានហៅការវាយប្រហាររបស់រុស្ស៊ីនៅថ្ងៃបុណ្យណូអែលថាជាទង្វើអមនុស្សធម៌បំផុត។ ប្រមុខរដ្ឋាភិបាលទីក្រុងកៀវ ថ្កោលទោសថា៖ «លោកពូទីន រើសយកថ្ងៃបុណ្យណូអែលសម្រាប់ការវាយប្រហារ។ តើមានអ្វីអមនុស្សធម៌ជាងនេះទៀត? មីស៊ីលជាង៧០គ្រាប់ រួមទាំងគ្រាប់ផ្លោងនិងយន្តហោះគ្មានមនុស្សបើកជាង១០០គ្រឿងផងដែរ។ គោលដៅគឺវិស័យថាមពលរបស់យើង ពួកគេបន្តប្រយុទ្ធដើម្បីផ្ដាច់ភ្លើងនៅអ៊ុយក្រែន»។

សូម​បញ្ជាក់​ថា ចាប់តាំងពីការឈ្លានពានពេញពេញ​ទំហឹង​របស់រុស្ស៊ី​ទៅ​លើអ៊ុយក្រែនក្នុងឆ្នាំ​២០២២ សហរដ្ឋ​អាមេរិកបានសន្យាផ្តល់ជំនួយចំនួន ១៧៥​ពាន់លានដុល្លារសម្រាប់​រដ្ឋាភិបាល​ក្រុង​កៀវ៕

ដោយ៖ ឈាង