រុស្ស៊ី ប្រកាសត្រៀមពិភាក្សាជាមួយលោក ត្រាំ ដើម្បីបញ្ចប់សង្គ្រាមអ៊ុយក្រែន

ក្នុងសន្និសីទកាសែតតាមអនឡាញជាមួយក្រុមអ្នកសារព័ត៌មានទាំងជាតិនិងអន្តរជាតិនៅថ្ងៃព្រហស្បតិ៍ទី២៦ខែធ្នូឆ្នាំ២០២៤, រដ្ឋមន្ត្រីការបរទេសរុស្ស៊ីលោក Sergey Lavrov បានបញ្ជាក់យ៉ាងច្បាស់ថា ទីក្រុងមូស្គូ បានត្រៀមខ្លួនរួចជាស្រេចដើម្បីពិភាក្សាជាមួយប្រធានាធិបតីជាប់ឆ្នោតអាមេរិក Donald Trump ស្តីពីការបញ្ចប់សង្គ្រាមអ៊ុយក្រែន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Lavrov លើកឡើងថា រុស្ស៊ីបើកចិត្តចំពោះការពិគ្រោះគ្នាជាមួយរដ្ឋបាលថ្មីអាមេរិក លើបញ្ហាសង្គ្រាមអ៊ុយក្រែន ហើយក៏សង្ឃឹមដែរថា ក្រុមរបស់លោក Trump រួមទាំងប្រេសិតពិសេសទទួលបន្ទុកដោះស្រាយសង្គ្រាមនេះគឺលោក Keith Kellogg ផងដែរនោះ នឹងជ្រាបកាន់តែច្បាស់អំពីឫសគល់នៃជម្លោះនេះ។

ជុំវិញការចរចាសន្តិភាពនេះដែរ រុស្ស៊ីធ្លាប់បានដាក់លក្ខខណ្ឌទៅអ៊ុយក្រែនរួចហើយ កាលពីខែតុលា ដោយបញ្ជាក់ថា បើទីក្រុងកៀវ ពិតជាចង់ចរចាសន្តិភាពមែន ទី១ត្រូវឈប់ព្យាយាមចូលជាសមាជិកអង្គការណាតូទៀតទៅ ហើយត្រូវដកទ័ពចេញពីទឹកដីដែលរុស្ស៊ីកាន់កាប់។

អ្នកនាំពាក្យវិមានក្រឹមឡាំងលោក Dmitry Peskov បានសំដៅចំៗទៅលក្ខខណ្ឌដែលលោកប្រធានាធិបតី វ្ល៉ាឌីមៀរ ពូទីន លើកឡើងនៅដើមឆ្នាំនេះឲ្យអ៊ុយក្រែនដកទ័ពទាំងអស់ចេញពីទឹកដីរុស្ស៊ី ដូចជាសាធារណរដ្ឋប្រជាមានិត Lugansk ក៏ដូចជាតំបន់ Kherson និង Zaporozhye។ លោកប្រាប់អ្នកសារព័ត៌មានថា «លក្ខខណ្ឌជាមូលដ្ឋានសម្រាប់កិច្ចពិភាក្សា គឺស្ថិតនៅក្នុងគំនិតផ្តួចផ្តើមសន្តិភាពរបស់លោកប្រធានាធិបតីសុទ្ធសាធ»។

ដោយឡែក កាលពីសប្តាហ៍មុន លោក Kellogg ក៏បានបង្ហាញពីជំនឿចិត្តយ៉ាងមុតមាំដែរថា សង្គ្រាមនេះនឹងចប់ត្រឹមប៉ុន្មានខែទៀតប៉ុណ្ណោះ ពោលគឺនៅពេលលោក Trump ចូលកាន់តំណែង។

យ៉ាងណាក្តី ក្នុងកិច្ចសម្ភាសនោះ លោក Keith នៅតែមិនបញ្ជាក់ថាតើ សង្គ្រាមនឹងបញ្ចប់ដោយរបៀបណា ឬថាតើរដ្ឋបាលថ្មីរបស់សហរដ្ឋអាមេរិក នឹងមានវិធីសាស្រ្តអ្វី ប៉ុន្តែបុរសម្នាក់នេះ ត្រូវបានគេដាក់ក្តីសង្ឃឹមខ្លាំងបំផុតថា គាត់មានសមត្ថភាពដោះស្រាយជម្លោះបាន៕

អត្ថបទ៖ សុខ សុវណ្ណ

ចុចអាន៖ អាមេរិក៖ ប៉ុន្មានខែទៀត សង្គ្រាមរុស្ស៊ី-អ៊ុយក្រែន នឹងចប់