ក្រុមហ៊ុន​អាមេរិក​ចំនួន​៧ រង​ទណ្ឌកម្ម​ចិន ក្រោយ​លក់​សព្វាវុធ​ឲ្យ​តៃវ៉ាន់

កាល​ពី​ថ្ងៃ​សុក្រ​ទី​២៧​ខែ​ធ្នូ​ឆ្នាំ​២០២៤ ប្រទេស​ចិន​បាន​ដាក់​ទណ្ឌកម្ម​លើ​ក្រុមហ៊ុន​យោធា​អាមេរិក​ចំនួន​​៧ ​និង​នាយក​ប្រតិបត្តិ​ជាន់ខ្ពស់​របស់​ពួកគេ​ ជុំវិញ​ការ​លក់​សព្វាវុធ​ទៅ​ឲ្យ​តៃវ៉ាន់​។

នៅក្នុងសេចក្តីថ្លែងការណ៍មួយ ក្រសួងការបរទេសចិនបាននិយាយថា ការប្រកាសនាពេលថ្មីៗនេះរបស់ទីក្រុងវ៉ាស៊ីនតោន អំពីជំនួយផ្នែកយោធា និងការលក់អាវុធយ៉ាងសន្ធឹកសន្ធាប់ដល់តៃវ៉ាន់ បានរំលោភលើគោលការណ៍ចិនតែមួយ និងសេចក្តីថ្លែងការណ៍រួមចំនួនបី​រវាង​ចិន​និង​សហរដ្ឋ​អាមេរិក។

ក្រុមហ៊ុនដែលត្រូវបានទទួលទណ្ឌកម្ម មាន​ដូចជា ក្រុមហ៊ុន Insitu Inc., Hudson Technologies Co., Saronic Technologies Inc., Raytheon Canada, Raytheon Australia, Aerkomm Inc. និង Oceaneering International Inc.។

ក្រសួងចិន បាន​ប្រកាស​ថា៖ «ទាំងនេះ​បាន​បំពានយ៉ាងធ្ងន់ធ្ងរលើគោលការណ៍ចិនតែមួយ និងសេចក្តីថ្លែងការណ៍រួមបី​រវាង​ចិន-អាមេរិក ជ្រៀតជ្រែកក្នុងកិច្ចការផ្ទៃក្នុងរបស់ចិន និងធ្វើ​ឲ្យ​ប៉ះពាល់ដល់អធិបតេយ្យភាព និងបូរណភាពទឹកដីរបស់ចិន»។

រដ្ឋាភិបាល​ក្រុង​ប៉េកាំង បានបង្កកទ្រព្យសម្បត្តិ ចលនវត្ថុ និងអចលនវត្ថុរបស់ក្រុមហ៊ុនទាំងនេះនៅក្នុង​​ទឹក​ដី​ប្រទេសចិន ហើយបានរារាំងអង្គការ និងបុគ្គលទាំងអស់​របស់​ខ្លួន​មិន​ឲ្យ​ចូលរួម​ក្នុងប្រតិបត្តិការ កិច្ចសហការ ឬស​កម្មភាពផ្សេងទៀតជាមួយ​ក្រុមហ៊ុន​ទាំង​នោះ​ទៀត​ឡើយ។

វា​មិន​មែន​ជា​លើក​ដំបូង​ទេ​ ដែល​មហាយក្ស​ចិន​បាន​អនុវត្ត​ការ​ដាក់​ទណ្ឌកម្ម​បែប​នេះ។ កាលពីថ្ងៃទី​៥​​ធ្នូ ចិនបានដាក់ទណ្ឌកម្មលើក្រុមហ៊ុនការពារជាតិអាមេរិកយ៉ាងហោចណាស់ចំនួន​១៣​ និងនាយកប្រតិបត្តិចំនួន​៦​នាក់ ជុំវិញការលក់អាវុធទៅ​ឲ្យ​តៃវ៉ាន់។

កាល​ពី​សប្តាហ៍​មុន សេតវិមាន​បាន​ប្រកាស​ជំនួយ​យោធា​ដែល​មាន​តម្លៃ ៥៧១,៣​លាន​ដុល្លារ និង​បាន​អនុម័ត​​ការ​លក់​អាវុធ​​តម្លៃ ២៩៥​លាន​ដុល្លារ​ទៅ​ឲ្យ​តៃវ៉ាន់៕

ដោយ៖ ឈាង