ចិន​ដាក់​ដំណើរការ​នាវាចម្បាំង​​ថ្មី​​ទំនើប​ទម្ងន់​៤ម៉ឺន​តោន​​​​​បម្រើវិស័យយោធា​

ប្រទេសចិនបាន​ដាក់​ឲ្យ​ដំណើរការនាវាចម្បាំងលើផ្ទៃទឹកជំនាន់ក្រោយដំបូងរបស់ខ្លួន ដោយបានបន្ថែមនាវាចម្បាំងទំនើបៗដ៏មានអានុភាពដល់កងទ័ពជើងទឹកដែលកំពុងពង្រីកខ្លួនយ៉ាងឆាប់រហ័សរបស់ប្រទេសនេះ ខណៈដែលខ្លួនកំពុងប្រកួតប្រជែងអំណាចយោធាជាមួយសហរដ្ឋអាមេរិក។ នេះបើយោងតាមការចេញផ្សាយរបស់សារព័ត៌មាន​CNNនៅថ្ងៃទី២៨ខែធ្នូនេះ។

កងនាវាចរកងទ័ពរំដោះប្រជាជនចិន (PLAN) បាននិយាយនៅក្នុងសេចក្តីថ្លែងការណ៍មួយថា នាវាចម្បាំង Type 076 បានចូលទឹកកាលពីថ្ងៃសុក្រក្នុងពិធីបើកសម្ពោធនៅកន្លែងផលិតកប៉ាល់ក្នុងទីក្រុងសៀងហៃ។ ដោយដាក់ឈ្មោះតាមខេត្ត Sichuan ភាគនិរតីនៃប្រទេសចិននាវានេះត្រូវបានសាទរថាជា «ទ្រព្យសម្បត្តិដ៏សំខាន់» សម្រាប់ជំរុញការផ្លាស់ប្តូររបស់កងទ័ពជើងទឹក និងបង្កើនសមត្ថភាពប្រតិបត្តិការរយៈចម្ងាយឆ្ងាយរបស់ខ្លួន។

នាវាទម្ងន់ជាង ៤០០០០ តោន នេះស្ថិតក្នុងចំណោមកនាវាចម្បាំងដ៏ធំបំផុតរបស់ពិភពលោក ។ PLAN បានបន្ថែមថា អ្វីដែលគួរឲ្យកត់សម្គាល់បំផុតនោះ វាប្រើប្រាស់ប្រព័ន្ធ catapult អេឡិចត្រូម៉ាញេទិក ដែលអនុញ្ញាតឱ្យវាផ្ទុកយន្តហោះដែលមានស្លាបថេរ រួមជាមួយនឹងឧទ្ធម្ភាគចក្រ និងយាន amphibious។

ប្រព័ន្ធ catapult អេឡិចត្រូម៉ាញេទិកនឹងអនុញ្ញាតឱ្យ Type 076 បាញ់បង្ហោះយន្តហោះដែលមានទំហំធំ និងធ្ងន់ជាងវាដោយគ្មានបច្ចេកវិទ្យា ខណៈមានតែនាវាចម្បាំងមួយគ្រឿងទៀតដែលបម្រើការនៅទូទាំងពិភពលោក គឺនាវាផ្ទុកយន្តហោះថ្មីបំផុតរបស់កងទ័ពជើងទឹកអាមេរិក USS Gerald R Ford ដែលប្រើប្រាស់ប្រព័ន្ធអេឡិចត្រូម៉ាញេទិកនេះ។យ៉ាងណានាវា​ផ្ទុក​យន្តហោះ​ថ្មី​បំផុត​របស់​ចិន Fujian ដែល​ស្ថិត​ក្នុង​ការ​សាកល្បង​ក្នុង​សមុទ្រ ហើយ​មិន​ទាន់​ត្រូវ​បាន​គេ​ដាក់​ឱ្យ​ដំណើរការ​នោះ​ក៏​មាន​ប្រព័ន្ធ​អេឡិចត្រូម៉ាញេទិក​ផង​ដែរ។

ចំពោះសមត្ថភាពផ្សេងទៀតរបស់ នាវាចម្បាំងType 076 ត្រូវបានគេរំពឹងថានឹងមានការបំពេញបន្ថែមនៃឧទ្ធម្ភាគចក្រ និងយាន amphibious ដែលនឹងមានសមត្ថភាពដាក់ពង្រាយកងទ័ពជើងទឹក ច្រើនជាង ១០០០នាក់។

គួរបញ្ជាក់ថាប្រទេសចិនដែលមានកម្លាំងទ័ពជើងទឹកដ៏ធំបំផុតនៅលើពិភពលោកកំពុងសាងសង់នាវាផ្ទុកយន្តហោះ និងនាវាចម្បាំងធំៗក្នុងល្បឿនដ៏គួរឱ្យភ្ញាក់ផ្អើលមួយ ខណៈដែលប្រទេសនេះកំពុងពង្រីកអំណាចឲ្យបានឆ្ងាយពីច្រាំងសមុទ្ររបស់ខ្លួន និងតាមទាន់ឧត្តមភាពយោធារបស់សហរដ្ឋអាមេរិក៕

អត្ថបទ៖​ ប៊ុន សុភាព