ខ្មាន់កាំភ្លើងបាញ់សម្លាប់មនុស្សយ៉ាងរង្គាលនៅថ្ងៃចូលឆ្នាំថ្មី ក្នុងប្រទេស ម៉ុងតេណេហ្គ្រោ

បើកទំព័រឆ្នាំថ្មីហាក់មិនសូវល្អឡើយសម្រាប់បស្ចិមប្រទេស ដោយការវាយប្រហារភេរវកម្មនៅអាមេរិក បណ្តាលឲ្យមនុស្ស១៦នាក់បាត់បង់ជីវិត ចំណែកនៅប្រទេសម៉ុងតេណេហ្គ្រោឯណោះ ក៏មានការបាញ់សម្លាប់រង្គាល ផ្តាច់ជីវិតមនុស្សចំនួន១០នាក់ផងដែរក្នុងទីក្រុង Cetinje។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមសេចក្តីរាយការណ៍របស់ RT នៅថ្ងៃទី១ខែមករាឆ្នាំ២០២៥, ខ្មាន់កាំភ្លើងឈ្មោះ អាឡិចសាន់ឌើ ម៉ាទីណូវិច (Aleksandar Martinović) បានទាស់សម្តីជាមួយភ្ញៀវផ្សេងទៀតនៅក្នុងបារ៍មួយ ឈានដល់ការផ្ទុះអាវុធ បាញ់រះសម្លាប់មនុស្សយ៉ាងរង្គាលតែម្តង រួចក៏ធ្វើអត្តឃាតតាមក្រោយ។

រដ្ឋមន្ត្រីក្រសួងមហាផ្ទៃម៉ុងតេណេហ្គ្រោ លោក Danilo Saranovic បញ្ជាក់ថា ក្នុងចំណោមអ្នកស្លាប់ ក៏មានសមាជិកគ្រួសាររបស់គាត់, ម្ចាស់ហាងនិងកូនៗ ហើយក្រៅពីអ្នកស្លាប់ នៅមានមនុស្ស៤នាក់ទៀត រងរបួសធ្ងន់។

តាមកំណត់ត្រារបស់ប៉ូលិស, ខ្មាន់កាំភ្លើងវ័យ៤៥ឆ្នាំ ក៏ធ្លាប់ត្រូវចាប់ខ្លួនដែរពាក់ព័ន្ធការកាន់កាប់អាវុធ ហើយសារព័ត៌មានក្នុងស្រុកបានចុះផ្សាយព្រោងព្រាតថា បុរសម្នាក់ម្នាក់នេះអាកប្បកិរិយាខុសប្រក្រតី។

ទោះបីជាយ៉ាងណាក៏ដោយ ប៉ូលិសកំពុងបើកការស៊ើបអង្កេតជាបន្តលើករណីនេះ ខណៈរដ្ឋាភិបាល បានប្រកាសកាន់ទុក្ខថ្នាក់ជាតិរយៈពេល៣ថ្ងៃ គិតចាប់ពីថ្ងៃព្រហស្បតិ៍ទៅ។

ជាមួយប្រជាជនជាង ៦៣ម៉ឺននាក់, ម៉ុងតេណេហ្គ្រោ ជាប្រទេសដែលសម្បូរទៅដោយកាំភ្លើង ក៏ព្រោះតែលំហូរអាវុធក្នុងអំឡុងពេលមានសង្គ្រាមកាលពីអតីត។

សូមបញ្ជាក់ថា នេះ​ជា​ការ​បាញ់​ប្រហារសម្លាប់រង្គាល​លើក​ទី​ពីរ​នៅទីក្រុង Cetinje ក្នុង​រយៈ​ពេល​បី​ឆ្នាំ ដោយកាលពីខែសីហាឆ្នាំ២០២២ ខ្មាន់កាំភ្លើងក៏សម្លាប់មនុស្ស១០នាក់ផងដែរ៕

អត្ថបទ៖ សុខ សុវណ្ណ

ចុចអាន៖ ទីបំផុត ជនសង្ស័យជាខ្មាន់កាំភ្លើង បាញ់សម្លាប់រង្គាលនៅអាមេរិក ត្រូវបានរកឃើញ ស្លាប់