ព័ត៌មានអន្ដរជាតិ

អ៊ុយក្រែន៖ រឿងដែល ត្រាំ សន្យាបញ្ចប់សង្គ្រាម «ពុំអាចស្មានត្រូវទេ»

បានផុស

៣ ខែ មុន

នៅ

ថ្ងៃសុក្រ ៣ មករា ២០២៥

ដោយ

Chheang

មេដឹកនាំអ៊ុយក្រែន បានប្រកាសថា ការសន្យារបស់លោក ដូណាល់ ត្រាំ ដែលថានឹងបញ្ចប់សង្គ្រាមក្នុងរយៈពេលត្រឹម២៤ម៉ោងនៅពេលចូលកាន់តំណែងជាប្រធានាធិបតីអាមេរិកនាថ្ងៃទី២០ខែមករាខាងមុខ គឺជារឿងដែល «ពុំអាចស្មានត្រូវនោះទេ»។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមការចុះផ្សាយរបស់សារព័ត៌មាន AFP កាលពីថ្ងៃទី២ខែមករាឆ្នាំ២០២៥ លោក Volodymyr Zelensky បាននិយាយនៅក្នុងបទសម្ភាសន៍ជាមួយទូរទស្សន៍អ៊ុយក្រែនថា លោក ត្រាំ ពិតជាមានគោលបំណងចង់បញ្ចប់សង្គ្រាមដែលមានអាយុកាលជិត៣ឆ្នាំរវាងអ៊ុយក្រែននិងរុស្ស៊ីពិតប្រាកដមែន។ យ៉ាងណា ការដែលអាចទៅរួច ឬមិនទៅរួច គឺគ្រប់គ្នាមិនអាចទាយដឹងមុននោះទេ។

កន្លងមក អ៊ុយក្រែន មានការព្រួយបារម្ភថា លោក ត្រាំ នឹងអាចឲ្យខ្លួនបោះបង់ចោលនូវទឹកដីផ្នែកខ្លះ ដើម្បីប្ដូរយកសន្ដិភាពពីរុស្ស៊ី។

មេដឹកនាំអ៊ុយក្រែន បានព្យាយាមកសាងទំនាក់ទំនងជាមួយលោក ត្រាំ ចាប់តាំងពីការបោះឆ្នោតនៅសហរដ្ឋអាមេរិកកាលពីខែវិច្ឆិកាឆ្នាំ២០២៤ ចំពេលមានការភ័យខ្លាចថា គណបក្សសាធារណរដ្ឋរបស់ប្រធានាធិបតីទើបជាប់ឆ្នោតរូបនេះអាចកាត់បន្ថយ ឬបញ្ឈប់ជំនួយយោធាទាំងស្រុងតែម្ដងសម្រាប់អ៊ុយក្រែន។

លោក Zelensky ក៏បានបង្ហាញក្ដីសង្ឃឹមដែរថា រដ្ឋបាលរបស់លោក ត្រាំ នឹងអាចបង្កើតទំនាក់ទំនងឆាប់រហ័សជាមួយរុស្ស៊ី។

ប្រធានាធិបតីរុស្ស៊ី លោក វ្ល៉ាឌីមៀរ ពូទីន ធ្លាប់បានលើកឡើងថា ទីក្រុងមូស្គូបើកចំហសម្រាប់កិច្ចពិភាក្សា ប៉ុន្តែពួកគេត្រូវតែគិតគូរពីផលប្រយោជន៍របស់រុស្ស៊ីនៅក្នុងសង្គ្រាម និងការកាត់យកទឹកដីនៅក្នុងតំបន់ចំនួន៤របស់អ៊ុយក្រែន៕

ដោយ៖ ឈាង