ព័ត៌មានអន្ដរជាតិ

កំណត់ត្រាសំខាន់ៗជំុវិញលោក Yoon Suk Yeol ប្រធានាធិបតីកូរ៉េខាងត្បូងមុនឈានដល់ការប្រកាសច្បាប់អាជ្ញាសឹក

បានផុស

២ ខែ មុន

នៅ

ថ្ងៃសុក្រ ៣ មករា ២០២៥

ដោយ

លោក Yoon Suk Yeol ប្រធានាធិបតីកូរ៉េខាងត្បូងដែលបានបង្កការភ្ញាក់ផ្អើលយ៉ាងខ្លាំងមិនត្រឹមតែមជ្ឈដ្ឋានប្រទេសកូរ៉េខាងត្បូងប៉ុណ្ណោះទេ ប៉ុន្តែនៅទូទាំងពីភពលោកទាំងមូលតែម្តង ដោយសារតែលោកបានប្រកាសច្បាប់អាជ្ញាសឹកដ៏សែនតក់ក្រហល់ និងមិននឹកស្មានដល់ បង្កការតក់ស្លុត និងភាពចលាចលនៅទូទាំងប្រទេសកូរ៉េខាងត្បូង។

ប្រធានាធិបតីកូរ៉េខាងត្បូង លោក Yoon Suk Yeol ដែលត្រូវសភាបោះឆ្នោតព្យួរអំណាច។ Reuter

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តើ លោក Yoon Suk Yeol មានប្រវត្តិយ៉ាងដូចម្តេច និងមានកំណត់ត្រាអ្វីខ្លះក្នុងនយោបាយកូរ៉េខាងត្បូង?

លោក Yoon Suk Yeol កើតនៅទីក្រុងសេអ៊ូលក្នុងឆ្នាំ១៩៦០ គឺជាអ្នកចំណូលថ្មីក្នុងនយោបាយប្រទេសកូរ៉េខាងត្បូង បន្ទាប់ពីលោកបានចំណាយពេល២៧ឆ្នាំជាអគ្គរដ្ឋអាជ្ញា មុនពេលឈរឈ្មោះជាប្រធានាធិបតី និងឈ្នះការបោះឆ្នោតយ៉ាងប្រផិតប្រផើយកាលឆ្នាំ២០២២លើប្រធានគណបក្សប្រជាធិបតេយ្យបច្ចុប្បន្នលោក Lee Jae-myung។
បន្ទាប់ពីសិក្សាច្បាប់ លោក Yoon បានបន្តក្លាយជាព្រះរាជអាជ្ញាសាធារណៈ និងជាអ្នកប្រឆាំងអំពើពុករលួយដ៏សកម្មមួយរូប ដោយចោទប្រកាន់លើប្រធានាធិបតីមុនៗ លើដំណើរការផ្លូវច្បាប់ដ៏តឹងតែងរបស់ប្រទេសកូរ៉េខាងត្បូង។
ក្នុងឆ្នាំ២០១៩ ខណៈពេលដែលនៅជាអគ្គរដ្ឋអាជ្ញាកូរ៉េខាងត្បូង លោកបានដុតបំផ្លាញលិខិតសម្គាល់ខ្លួនជាមេក្លោងផ្លូវច្បាប់ បន្ទាប់ពីបានចោទប្រកាន់ជំនួយការជាន់ខ្ពស់របស់ប្រធានាធិបតីដែលចាកចេញពីអំណាច គឺលោក Moon Jae-in ក្នុងសំណុំរឿងក្លែងបន្លំ និងសំណូក។
បញ្ហានយោបាយការបរទេសរបស់ប្រធានាធិបតី Yoon Suk Yeol ដោយសារមានទំនោរទៅរកលោកសេរីខ្លាំង ដូចជា គាំទ្រអ៊ុយក្រែនខ្លាំង បង្កើតអរិភាពជាមួយកូរ៉េខាងជើងកាន់តែខ្លាំងឡើង ងាកទៅរកសម្ព័ន្ធមិត្តសេរី មានអាមេរិកនិងបង្ហាញភាពស្និទ្ធស្នាល ជាមួយជប៉ុនដែលជាសត្រូវប្រវត្តិសាស្រ្ត។
ប្រធានាធិបតីកូរ៉េខាងត្បូង លោក Yoon Suk Yeol ជាអ្នកកាន់ច្បាប់អស់រយៈពេល២៧ឆ្នាំជាអគ្គរដ្ឋអាជ្ញាដ៏មានឥទ្ធិពលក្នុងការកាន់សំណុំរឿងរសើបនានាទាក់ទិននឹងនយោបាយ ហើយលោកក៏ជាដើរតួដ៏សំខាន់ជាអ្នកកាន់សំណុំរឿងចោទប្រកាន់ប្រឆាំងអតីតប្រធានាធិបតី២រូបគឺ លោកស្រី Park Geun-hye និង លោក Lee Myung-bak ដោយចោទប្រកាន់ពីបទរំលោភអំណាច។
គ្រាន់តែឈ្នះឆ្នោតមិនបានប៉ុន្មានថ្ងៃផង ប្រធានាធិបតីកូរ៉េខាងត្បូង លោក Yoon Suk Yeol បានប្រកាសដូរការិយាល័យប្រធានាធិបតីពី វិមានបៃតង (Blue House) ទៅកាន់ទីស្តីការក្រសួងការពារជាតិ ដោយចំណាយទឹកប្រាក់សម្រាប់ជុសជុល សាងសង់រហូតដល់៤០លានដុល្លារ ដោយបង្កការជំទាស់យ៉ាងខ្លាំងពីបក្សប្រជាធិបតេយ្យ។
ប្រធានាធិបតីកូរ៉េខាងត្បូង លោក Yoon Suk Yeol ក៏ត្រូវបានគេចោទថា បានជឿលើគ្រូហុងស៊ុយមកពីប្រទេសចិនលើការមូលដ្ឋាននៃការសម្រេចចិត្តរបស់លោកសម្រាប់ការប្តូរការិយាល័យប្រធានាធិបតីនេះ ដោយមានការលើកឡើងថា វិមានប្រធានាធិបតី (ឬវិមានបៃតង) ដែលជាអតីតព្រះរាជវាំងគ្មានជោគជាតារាសីទេ ព្រោះក្នុងរយៈពេល២៥ឆ្នាំ មានប្រធានាធិបតីជាប់គុកផង និង ធ្វើអត្តឃាតផង ក្រោយអស់អំណាច។
រឿងអាស្រូវ ឬប្រព្រឹត្តរឿងដែលគេយល់ថា ពុករលួយ ឬអសីលធម៌របស់ភរិយាប្រធានាធិបតី ឬហៅថា ស្ត្រីទី១ Kim Keon-hee បានបន្ថែមរឿងរ៉ាវអាស្រូវបន្ថែមទៀតដល់ការគ្រប់គ្រងអំណាចរបស់លោក ហើយលោកប្រធានាធិបតី រារាំងការស៊ើបអង្កេតដោយឯករាជ្យរបស់រដ្ឋអាជ្ញា។
មុនការប្រកាសច្បាប់អាជ្ញាសឹក ជម្លោះចុងក្រោយធំបំផុតរវាងប្រធានាធិបតី និងរដ្ឋសភាគឺនៅពេលដែលរដ្ឋសភាគ្រប់គ្រងដោយគណបក្សប្រជាធិបតេយ្យ បានបោះឆ្នោតប្រឆាំងផែនការចំណាយថវិការដ្ឋដែលស្នើរបស់ប្រធានាធិបតី Yoon Suk Yeol ដោយកាត់បន្ថយការចំណាយរហូតដល់ជិត៣ពាន់លានដុល្លារពីការគម្រោងស្នើសរុប ដែលធ្វើឲ្យលោកយល់ថា គណបក្សប្រជាធិបតេយ្យដែលគ្រប់គ្រងសំឡេងច្រើនលើសលប់នៅក្នុងសភាក្រោយការបោះឆ្នោតកាលខែតុលា២០២៤ បានបង្កការរាំងស្ទះដល់ដំណើរការរបស់រដ្ឋ៕

ដោយ រ៉ាន់ រើយ