ព័ត៌មានអន្ដរជាតិ

នាយករដ្ឋមន្ត្រីថៃ ប្រកាសថា មានទ្រព្យសម្បត្តិសរុបជាង ៤០០លានដុល្លារ

បានផុស

៣ ខែ មុន

នៅ

ថ្ងៃសុក្រ ៣ មករា ២០២៥

ដោយ

Chheang

ក្នុងកាតព្វកិច្ចប្រកាសទ្រព្យសម្បត្តិ និងបំណុលរបស់ខ្លួនទៅគណៈកម្មាធិការជាតិប្រឆាំងអំពើពុករលួយ (NACC) នាយករដ្ឋមន្ត្រីថៃ លោកស្រី ផែតងតាន ស៊ីណាវ៉ាត្រា បានបញ្ជាក់នៅថ្ងៃសុក្រទី៣ខែមករាឆ្នាំ២០២៥ថា លោកស្រីមានទ្រព្យសម្បត្តិសរុបជាង ៤០០លានដុល្លារ។

លោកស្រី ផែតងតាន ស៊ីណាវ៉ាត្រា (រូបភាព៖ Bangkok Post)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រព័ន្ធផ្សព្វផ្សាយថៃ បានរាយការណ៍ថា លោកស្រី ផែតងតាន មានទ្រព្យសម្បត្តិសរុបចំនួន ១៣,៨ពាន់លានបាត ស្មើនឹងជាង ៤០០លានដុល្លារ ដោយក្នុងនោះមាន ១១ពាន់លានបាតស្ថិតនៅក្នុងការវិនិយោគ និង ១ពាន់លានបាតជាសាច់ប្រាក់ ព្រមទាំងបញ្ញើនៅក្នុងធនាគារ។

ទ្រព្យសម្បត្តិផ្សេងទៀតរបស់លោកស្រីនាយករដ្ឋមន្ត្រីថៃ រួមមាននាឡិកាចំនួន ៧៥គ្រឿងដែលមានតម្លៃ ១៦២លានបាត និងកាបូបចំនួន ២១៧កាបូប ដែលមានតម្លៃ ៧៦លានបាត ក៏ដូចជាអចលនទ្រព្យមួយចំនួននៅទីក្រុងឡុងដ៍ និងប្រទេសជប៉ុន។

បើយោងតាមឯកសាររបស់ NACC លោកស្រីក៏បានប្រកាសពីបំណុលជិត ៥ពាន់លានបាតផងដែរ ដែលបានន័យថា ទ្រព្យសម្បត្តិជាក់ស្ដែងរបស់លោកស្រី មានចំនួន ៨,៩ពាន់លានបាត ឬ ២៥៨លានដុល្លារ។

សូមបញ្ជាក់ថា លោកស្រី ផែតងតាន ជាកូនស្រីពៅរបស់មហាសេដ្ឋីទូរគមនាគមន៍ និងជាអតីតនាយករដ្ឋមន្ត្រីថៃ គឺលោក ថាក់ស៊ីន ស៊ីណាវ៉ាត្រា។ លោកស្រី បានចូលកាន់តំណែងកាលពីខែកញ្ញាឆ្នាំ២០២៤ ក្នុងនាមជាសមាជិកទីបួននៃត្រកូល ស៊ីណាវ៉ាត្រា ដែលដឹកនាំរដ្ឋាភិបាលថៃក្នុងរយៈពេល ២០ឆ្នាំ។

បើនិយាយពីលោក ថាក់ស៊ីន វិញដែលជាឪពុករបស់នាយករដ្ឋមន្ត្រី លោកគឺជាបុគ្គលដែលមានជាងគេបំផុតលំដាប់ទី១០នៅក្នុងប្រទេសថៃ ជាមួយទ្រព្យសម្បត្តិសរុបចំនួន ២,១ពាន់លានដុល្លារ។ នេះបើយោងតាមទស្សនាវដ្ដី Forbes៕

ដោយ៖ ឈាង