ព័ត៌មានអន្ដរជាតិ

មនុស្សរាប់លាននាក់ប្រឈមខ្វះស្បៀងអាហារនៅមីយ៉ាន់ម៉ា រស់នៅយ៉ាងលំបាក

បានផុស

១ នាទីute មុន

នៅ

ថ្ងៃសៅរ៍ ៤ មករា ២០២៥

ដោយ

របាយការណ៍ថ្មីមួយរបស់អង្គការអន្តរជាតិមួយដែលមានឈ្មោះថា International Christian Concern បានបង្ហាញថា មនុស្សរាប់លាននាក់កំពុងប្រឈមនឹងហានិភ័យនៃភាពអត់ឃ្លាននៅក្នុងប្រទេសមីយ៉ាន់ម៉ាចាប់តាំងពីរដ្ឋប្រហារយោធានៅឆ្នាំ២០២១។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចាប់តាំងពីរដ្ឋប្រហារមក ការប្រយុទ្ធគ្នារវាងក្រុមយោធា និងក្រុមកងកម្លាំងជនជាតិភាគតិច បានបង្ហាញពីភាពចលាចលផ្នែកសេដ្ឋកិច្ចដ៏ធ្ងន់ធ្ងរ។ សារព័ត៌មាន The Independent បានឲ្យដឹងថា៖«ជម្លោះបានរំខានដល់ការដាំដុះយ៉ាងខ្លាំង ទាំងនៅតំបន់ខ្ពង់រាប និងតំបន់ទំនាប។ លើសពីនេះទៀត កង្វះខាតប្រេងបានធ្វើឲ្យថ្លៃដឹកជញ្ជូនឡើងថ្លៃ»។

មួយវិញទៀតវត្តមានជាបន្តបន្ទាប់ ឬការគម្រាមកំហែងរបស់យោធាបង្កើតភាពជាប់គាំងសម្រាប់អង្គការមនុស្សធម៌ដែលស្វែងរកការផ្តល់ជំនួយដល់ពលរដ្ឋ។

ទន្ទឹមនឹងនេះ មនុស្សជាងប្រាំពាន់នាក់ត្រូវបានសម្លាប់ចាប់តាំងពីឆ្នាំ២០២១ ហើយភូមិនិងប្រជាពលរដ្ឋត្រូវបានវាយប្រហារជាប្រចាំ។ នាពេលថ្មីៗនេះ មានសេចក្តីរាយការណ៍ពីការវាយប្រហារលើភូមិមួយដែលបានបណ្តាលឱ្យមនុស្សជាច្រើននាក់ស្លាប់ និងផ្ទះជាច្រើនរបស់ប្រជាពលរដ្ឋត្រូវបានបំផ្លាញ ខណៈអ្នករត់គេចពីការប្រយុទ្ធគ្នាកំពុងរស់នៅក្នុងព្រៃយ៉ាងវេទនា។

ជាមួយគ្នានេះបើតាមភ្នាក់ងារអង្គការសហប្រជាជាតិ UNOCHA មីយ៉ាន់ម៉ាបានប្រកាសថា ប្រជាជនរាប់លាននាក់ក្នុងប្រទេសមីយ៉ាន់ម៉ាប្រឈមនឹងការខ្វះខាតជំនួយដោយសារតែថវិកាមិនគ្រប់គ្រាន់ក្នុងឆ្នាំ២០២៤។ យោងតាម UNOCHA មីយ៉ាន់ម៉ា ប្រជាជនមីយ៉ាន់ម៉ា មិនគួរមានការស៊ូទ្រាំ និងស្ទាក់ស្ទើរក្នុងការសុំជំនួយនោះទេ។

UNOCHA មីយ៉ាន់ម៉ាបានព្រមានកាលពីថ្ងៃទី១៦ខែធ្នូថា ការផ្តល់មូលនិធិមានកម្រិតទាប ដូច្នេះប្រជាជន ១.៤ លាននាក់ក្នុងចំណោម ៥.៣ លាននាក់ដែលជាគោលដៅត្រូវការជំនួយមិនបានទទួលជំនួយណាមួយឡើយ។ ចំណែកអ្នកដែលបានទទួលជំនួយនោះមិនគ្រប់គ្រាន់ទេ។

ប្រសិនបើមូលនិធិនៅតែមិនគ្រប់គ្រាន់នៅឆ្នាំ២០២៥ទៀត នោះជីវិតប្រជាជនជាច្រើននឹងកាន់តែមានការលំបាក។ យ៉ាងណាមិញសម្រាប់ផែនការឆ្លើយតប និងតម្រូវការមនុស្សធម៌ឆ្នាំ២០២៥ ទឹកប្រាក់ ១.១ ពាន់លានដុល្លារត្រូវបានស្នើឡើងដើម្បីផ្តល់ជំនួយដល់ជនងាយរងគ្រោះចំនួន ៥.៥ លាននាក់នៅទូទាំងប្រទេសមីយ៉ាន់ម៉ា៕