ព័ត៌មានអន្ដរជាតិ

សភាកូរ៉េខាងត្បូងឲ្យចាប់អ្នកណាក៏ដោយឱ្យតែរារាំងដល់ការចាប់ខ្លួនលោក Yoon

បានផុស

២ ខែ មុន

នៅ

ថ្ងៃសុក្រ ៣ មករា ២០២៥

ដោយ

ក្រោយការបរាជ័យក្នុងការអនុវត្តដីកាចាប់ខ្លួនលោក Yoon នៅព្រឹកថ្ងៃសុក្រនេះ គណបក្សប្រជាធិបតេយ្យដែលកំពុងគ្រប់គ្រងរដ្ឋសភាអំពាវនាវឲ្យចាប់ខ្លួននរណាក៏ដោយក្នុងកងអង្គរក្សរបស់ប្រធានាធិបតីឱ្យតែរារាំងដល់ការចាប់ខ្លួន លោក Yoon Suk Yeol ដែលមានដីកាចាប់ខ្លួនពីតុលាការចេញកាលពីថ្ងៃអង្គារ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គណបក្សប្រជាធិបតេយ្យកូរ៉េកំពុងអំពាវនាវឱ្យចាប់ខ្លួនឆ្មាំប្រធានាធិបតី Yoon ដោយចោទប្រកាន់ការិយាល័យសន្តិសុខប្រធានាធិបតីថាបានរារាំងការប៉ុនប៉ងរបស់ការិយាល័យស៊ើបអង្កេតអំពើពុករលួយសម្រាប់មន្ត្រីជាន់ខ្ពស់ដើម្បីឃុំខ្លួនប្រធានាធិបតីដែលមានជម្លោះនៅថ្ងៃទី៣ខែមករា។

លោក Park Chan-dae មេដឹកនាំក្រុមតំណាងរាស្រ្តក្នុងសភានៃគណបក្សប្រជាធិបតេយ្យត្រូវបានដកស្រង់ដោយសារសារព័ត៌មាន AFP ដូចបាននិយាយថា៖«នរណាម្នាក់ដែលរារាំងដំណើរការចាប់ខ្លួន Yoon គួរតែត្រូវបានចាប់ខ្លួនជាបន្ទាន់ក្នុងនាមជាអ្នកប្រព្រឹត្តល្មើសនឹងការរារាំងយុត្តិធម៌»។

លោក Park បាននិយាយថា៖«ប្រធានក៏ដោយ អនុប្រធានក៏ដោយ និងមន្ត្រីផ្សេងទៀតនៃការិយាល័យសន្តិសុខប្រធានាធិបតី គួរតែត្រូវបានចាត់ទុកជាអ្នកសមគំនិត និងទទួលខុសត្រូវដោយមិនគិតពីឋានៈរបស់ពួកគេ ប្រសិនបើពួកគេជ្រៀតជ្រែកក្នុងការអនុវត្តដីកាចាប់ខ្លួនលោក Yoon»។

អង្គភាពការិយាល័យស៊ើបអង្កេតពុករលួយសម្រាប់មន្ត្រីជាន់ខ្ពស់ (Corruption Investigation Office for High-ranking Officials (CIO)) ដែលជាភ្នាក់ងារឯករាជ្យនៅប្រទេសកូរ៉េខាងត្បូង កំពុងដឹកនាំប្រតិបត្តិការចាប់ខ្លួនលោក Yoon Suk Yeol យកទៅសួរចម្លើយ។ ដោយសារការបរាជ័យនេះ CIO នឹងបន្តអនុវត្តកិច្ចការនៅថ្ងៃស្អែក។

ជាមួយគ្នានេះ ក្រុមតំណាងរាស្រ្តគណបក្សអំណាចប្រជាជន (PPP) របស់លោក Yoon Suk Yeol បានស្នើឲ្យមានការស៊ើបអង្កេតដោយពុំចាំបាច់ចាប់ខ្លួន។ ការចាប់ខ្លួនត្រូវបានរារាំងដោយការិយាល័យការពារប្រធានាធិបតី និងអ្នកគាំទ្ររបស់លោក Yoon។

ជាមួយគ្នានេះ តុលាការធម្មនុញ្ញត្រៀមបើកសវនាការលើកដំបូងដើម្បីដំណើរការរឿងក្តីប្រឆាំងប្រធានាធិបតី Yoon Suk Yeol នៅថ្ងៃទី១៤និងថ្ងៃទី១៦ខែមករា២០២៥៕

ដោយ រ៉ាន់ រើយ