អ្នកគាំទ្រលោក យូន ដង្ហើយហៅឈ្មោះ ដូណាល់ ត្រាំ ឲ្យមកជួយផង

ដោយមានលើកបដានិងពាក្យស្លោក ប្រមូលផ្តុំគ្នានៅមុខខ្លោងទ្វារវិមានប្រធានាធិបតីកូរ៉េខាងត្បូង អ្នកគាំទ្រលោក យូន ស៊ុកយុល បានដង្ហើយហៅឈ្មោះប្រធានាធិបតីជាប់ឆ្នោតអាមេរិក ដូណាល់ ត្រាំ ឲ្យមកជួយ និងបង្ហាញជំនឿយ៉ាងមុតមាំថា អ្នកសាធារណរដ្ឋរូបនេះ នឹងមិនឱបដៃមើលវិបត្តិនយោបាយនៅក្នុងប្រទេសកូរ៉េខាងត្បូង ដែលជាសម្ព័ន្ធមិត្តយ៉ាងជិតស្និទ្ធរបស់ទីក្រុងវ៉ាស៊ីនតោនឡើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីថ្ងៃសុក្រទី៣ខែមករាឆ្នាំ២០២៥, អ្នកគាំទ្រលោក យូន ត្រូវបានគេឃើញមានកាន់ទង់ជាតិអាមេរិក និងលើកបដាដែលមានសរសេរពាក្យស្លោក Stop the Steal ដោយនោះជាពាក្យស្លោកដែលអ្នកគាំទ្រលោក ត្រាំ ប្រើដើម្បីប្រឆាំងនឹងលទ្ធផលបោះឆ្នោតឆ្នាំ២០២០ ដោយចោទថាលោក ចូ បៃដិន លួចបន្លំ។

ដូច្នេះហើយ អ្នកគាំទ្រលោក យូន ក៏យកវិធីនេះដើម្បីតវ៉ាប្រឆាំងនឹងគណបក្សប្រជាធិបតេយ្យដែលគ្រប់គ្រងរដ្ឋសភា ដោយចោទប្រកាន់ថា ពួកគេរំលោភអំណាចដើម្បីទម្លាក់លោក យូន។

ស្រ្តីឈ្មោះ Ahn Young-mi វ័យប្រហែល៦០ឆ្នាំ និយាយថា «សហរដ្ឋអាមេរិកឬលោក ត្រាំ នឹងធ្វើអន្តរាគមន៍ ហើយសង្គ្រោះលោក យូន ស៊ុកយុល»។ ចំណែក Pyeong In-su អាយុ៧១ឆ្នាំក៏និយាយដែរថា «ខ្ញុំរង់ចាំឲ្យដល់ពេលលោក ត្រាំ ចូលកាន់តំណែង ហើយនិយាយពីការលួចបន្លំសន្លឹកឆ្នោតនៅក្នុងប្រទេសរបស់យើង និងទូទាំងពិភពលោក។ គាត់នឹងជួយលោក យូន ឲ្យបានកាន់តំណែងវិញយ៉ាងឆាប់រហ័ស»។

កាលពីថ្ងៃទី៣១​ខែធ្នូឆ្នាំ២០២៤ តុលាការកូរ៉េខាងត្បូង បានអនុម័តដីកាចាប់ខ្លួនលោក យូន ដោយអាចធ្វើឲ្យគាត់ ក្លាយជាប្រធានាធិបតីកាន់តំណែងដំបូងគេ ដែលត្រូវឃុំខ្លួន ជាផ្នែកមួយនៃការស៊ើបអង្កេតលើបទ​ចោទប្រកាន់ថា គាត់​ជា​មេខ្លោង​បះបោរ​ដោយព្យាយាមដាក់ច្បាប់អាជ្ញាសឹក។

ប៉ូលិសបានអនុវត្តដីកាចាប់ខ្លួន ចូលទៅចាប់លោក យូន ដល់វិមានប្រធានាធិបតី ប៉ុន្តែពួកគេត្រូវជួបប្រទះជាមួយចលនាតស៊ូរបស់អ្នកគាំទ្រលោក យូន និងកងសន្តិសុខរបស់គាត់ ហើយក្រោយមកក៏ប្រកាសផ្អាកប្រតិបត្តិការនេះសិន ដោយសារហេតុផលសន្តិសុខ។

យ៉ាងណា ការិយាល័យស៊ើបអង្កេតអំពើពុករលួយសម្រាប់មន្ត្រីជាន់ខ្ពស់ ដែលកំពុងដឹកនាំក្រុមស៊ើបអង្កេតរួមគ្នា ជាមួយប៉ូលិសនិងរដ្ឋអាជ្ញា មានពេលរហូតដល់ថ្ងៃទី៦ខែមករា ដើម្បីអនុវត្តដីកាចាប់ខ្លួននេះ៕

អត្ថបទ៖ សុខ សុវណ្ណ

ចុចអាន៖ សភាកូរ៉េ​ខាងត្បូង​ឲ្យចាប់​​​អ្នកណាក៏ដោយ​ឱ្យតែ​រារាំង​ដល់​ការ​ចាប់​ខ្លួន​លោក Yoon