៦រដ្ឋនៅអាមេរិក ប្រកាសអាសន្នដោយសារព្យុះព្រឹល ដែលគំរាមកំហែងដល់អាយុជីវិតមនុស្សរាប់លាននាក់

នៅថ្ងៃចន្ទទី៦ខែមករាឆ្នាំ២០២៥ រដ្ឋចំនួន៦នៅសហរដ្ឋអាមេរិក បានប្រកាសអាសន្នដោយ​សារតែព្យុះព្រឹលយ៉ាងធ្ងន់ធ្ងរ ដែលបង្កការគំរាមកំហែងដល់អាយុជីវិតមនុស្សរាប់លាននាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមភ្នាក់ងារអាកាសធាតុជាតិ (NWS), ព្យុះព្រឹល បានចាប់ផ្តើមនៅភាគកណ្តាលសហរដ្ឋអាមេរិក ហើយធ្វើដំណើរឆ្ពោះទៅទិសខាងកើត នៅរយៈពេលពីរបីថ្ងៃខាងមុខនេះ។

អាស្រ័យហេតុនេះ រដ្ឋ Kentucky, Virginia, West Virginia, Kansas, Arkansas និង Missouri ​សុទ្ធតែបានចេញការប្រកាសអាសន្នព្រោះថា ស្ថានភាពឈានដល់កម្រិតធ្ងន់ធ្ងរជាពិសេសប៉ះពាល់ដល់ការធ្វើចរាចរណ៍ទាំងផ្លូវគោកនិងផ្លូវអាកាស។

តាមការព្យាករ, ព្យុះនេះនឹងទម្លាក់ព្រឹលក្នុងកម្រិតធ្ងន់បំផុត និងធ្វើឲ្យសីតុណ្ហភាព ធ្លាក់ចុះទាបមិនធ្លាប់មាន បើគិតចាប់តាំងពីឆ្នាំ២០១១មក បង្កផលប៉ះពាល់ដល់ប្រជាជនអាមេរិក រាប់លាននាក់ ជាពិសេសនៅរដ្ឋ Kansas ដែលសីតុណ្ហភាពអាចធ្លាក់ចុះដល់ -29 អង្សាសេ។

ជើងហោះហើររាប់ពាន់ជើងត្រូវបានពន្យារពេលឬលុបចោលតែម្តង ខណៈអាកាសយានដ្ឋាន St Louis ក្នុងរដ្ឋ Missouri ជាកន្លែងរងការវាយប្រហារធ្ងន់ធ្ងរជាងគេដោយសារព្យុះ។

មិនត្រឹមប៉ុណ្ណឹង រដ្ឋទាំង៦ ក៏បានព្រមានដល់ពលរដ្ឋឲ្យប្រុងប្រយ័ត្នពេលបើកបរយានយន្តឬកុំធ្វើដំណើរលើដងផ្លូវតែម្តងក៏ល្អដែរ ព្រោះថា ស្ថានភាពផ្លូវមានភាពរអិលខ្លាំងឬពិបាកមើល អាចបង្កគ្រោះថ្នាក់ជាយថាហេតុ។

សូមបញ្ជាក់ថា ព្យុះនេះគឺបង្កឡើងដោយខ្យល់ប៉ូលឬគេហៅថា Polar Vortex ដែលជាខ្យល់ត្រជាក់ ចរាចរជុំវិញតំបន់អាក់ទិក។ ជាធម្មតា Polar Vortex ស្ថិតនៅជុំវិញប៉ូលខាងជើង ប៉ុន្តែវាអាចផ្លាស់ប្តូរ និងពង្រីកខ្លួន ដោយនាំមកនូវសីតុណ្ហភាពទាបជាងធម្មតាបោកបក់លើសហរដ្ឋអាមេរិក៕

អត្ថបទ៖ សុខ សុវណ្ណ

ចុចអាន៖ កូរ៉េខាងត្បូង ជួបព្យុះព្រឹលសាហាវបំផុត, មនុស្សស្លាប់បន្តកើនឡើង ឯជើងហោះហើរក៏លុបចោល