ព័ត៌មានអន្ដរជាតិ

អឺរ៉ុប បញ្ជាក់ច្បាស់ៗជាថ្មីពីអត្ថប្រយោជន៍វ៉ាក់សាំង AstraZeneca

បានផុស

៤ years មុន

នៅ

ថ្ងៃពុធ ១៧ មីនា ២០២១

ដោយ

ក្រុមអ្នកឃ្លាំមើលឱសថរបស់សហភាពអ៊ឺរ៉ុបបានបញ្ជាក់ជាថ្មីថា អត្ថប្រយោជន៍នៃវ៉ាក់សាំងការពារជំងឺកូវី ១៩ របស់ក្រុមហ៊ុន AstraZeneca គឺមានខ្ពស់ជាងហានិភ័យនៃកើតដុំកំណកឈាមដែលត្រូវបានរាយការណ៍នៅក្នុងប្រទេសដែលទទួលវ៉ាក់សាំងនេះមួយចំនួន ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នាយកប្រតិបត្តិទីភ្នាក់ងារឱសថអឺរ៉ុប (EMA) លោកស្រី Emer Cooke បានថ្លែងនៅក្នុងសន្និសីទសារព័ត៌មានតាមអនឡាញកាលពីថ្ងៃអង្គារថាមិនមានការចង្អុលបង្ហាញណាមួយពីការកកើតដុំកំណកឈាមបណ្តាលមកពីវ៉ាក់សាំងនេះនោះទេ ។

យ៉ាងហោចណាស់មានប្រទេសចំនួន ១៥ នៅអឺរ៉ុបរួមទាំងអាល្លឺម៉ង់ បារាំង និងអ៊ីតាលីបានប្រកាសបញ្ឈប់ជាបណ្តោះអាសន្ននៃការប្រើប្រាស់វ៉ាក់សាំង AstraZeneca បន្ទាប់ពីមានសេចក្តីរាយការណ៍នៃហានិភ័យនេះ ។

EMA កំពុងធ្វើការស៊ើបអង្កេតលម្អិតលើករណីទាំងនេះ ហើយនឹងចេញផ្សាយលទ្ធផលរបស់ខ្លួននៅថ្ងៃព្រហស្បតិ៍នេះ ។

ប្រទេសជាច្រើនដែលបានផ្អាកការប្រើប្រាស់វ៉ាក់សាំង AstraZeneca បាននិយាយថា ពួកគេនឹងរង់ចាំលទ្ធផលពីក្រុមឃ្លាំមើល ។

ទន្ទឹមនោះនាយករដ្ឋមន្រ្តីអ៊ីតាលីលោក Mario Draghi និងប្រធានាធិបតីបារាំងលោក Emmanuel Macron បាននិយាយតាមទូរស័ព្ទពីបញ្ហានេះកាលពីថ្ងៃអង្គារ ។ ការិយាល័យរបស់នាយករដ្ឋមន្រ្តីអ៊ីតាលីបាននិយាយថា មេដឹកនាំទាំងពីរបានស្វាគមន៍ចំពោះយោបល់ចុងក្រោយរបស់ EMA និងបានសង្កត់ធ្ងន់ថាការផ្អាកប្រើប្រាស់វ៉ាក់សាំងនេះគឺជាវិធានការណ៍បង្ការទុកជាមុន និងបណ្តោះអាសន្នតែប៉ុណ្ណោះ ។

ការិយាល័យបាននិយាយថា មេដឹកនាំទាំងពីរបានត្រៀមខ្លួនរួចជាស្រេចដើម្បីបន្តការប្រើប្រាស់វ៉ាក់សាំងនេះប្រសិនបើការរកឃើញរបស់ EMA គឺវិជ្ជមាន ៕