លោក ហ្សេលេនស្គី៖ ស្តាយណាស់ ដែល អ៊ុយក្រែន គ្មាននុយក្លេអ៊ែរ ទុកកំញើញរុស្ស៊ី

ក្នុងបទសម្ភាសរយៈពេល៣ម៉ោងជាមួយអ្នកជំនាញអាមេរិក Lex Fridman កាលពីថ្ងៃអាទិត្យទី៥ខែមករាឆ្នាំ២០២៥ ប្រធានាធិបតីអ៊ុយក្រែន វ្ល៉ាឌីមៀរ ហ្សេលេនស្គី បញ្ជាក់ថា លោកពិតជាសោកស្តាយណាស់ ដែលទីក្រុងកៀវត្រូវពឹងផ្អែកលើខ្នងបង្អែកបស្ចិមប្រទេសសម្រាប់ធានាសន្តិសុខរបស់ខ្លួន ហើយមិនមានអាវុធនុយក្លេអ៊ែរ ដើម្បីកំញើញរុស្ស៊ី។

ក្នុងអំឡុងពេលនោះដែរ ដោយសំដៅទៅលើអនុស្សរណៈទីក្រុងប៊ុយដាប៉ែស, លោកហ្សេលេនស្គី ថែមទាំងរិះគន់សហរដ្ឋអាមេរិក ចក្រភពអង់គ្លេស និងមហាអំណាចនុយក្លេអ៊ែរផ្សេងទៀតផងដែរ ដែលមិនជួយការពារបូរណភាពទឹកដីរបស់អ៊ុយក្រែន។

អនុស្សារណៈទីក្រុងប៊ុយដាប៉ែស បានធានាអំពីការការពាសន្តិសុខអ៊ុយក្រែន ជាថ្នូរឲ្យប្រទេសនេះបោះបង់ចោលអាវុធនុយក្លេអ៊ែរ។ យ៉ាងណា លោកហ្សេលេនស្គី បានសម្តែងការខកចិត្តថា ទីក្រុងកៀវលែងមាននុយក្លេអ៊ែរទៀតហើយ, ឥឡូវរឿងរ៉ាវពិតជាអាក្រក់ខ្លាំងព្រោះយើងគ្មានអាវុធទាំងនោះ។

លោករិះគន់ថា សហរដ្ឋអាមេរិក ចក្រភពអង់គ្លេសនិងមហាអំណាចនុយក្លេអ៊ែរដទៃទៀត បែរជាព្រងើយកន្តើយ មិនខ្វល់ការអង្វរកររបស់អ៊ុយក្រែន សុំឲ្យជួយការពារបូរណភាពទឹកដីរបស់ខ្លួន។ នោះពិតជារឿងដ៏គួរឲ្យសោកស្តាយនិងខកចិត្តជាទីបំផុត។

បន្ទាប់ពីសហភាពសូវៀតដួលរលំ អ៊ុយក្រែនមានក្បាលគ្រាប់នុយក្លេអ៊ែរចំនួន ១ ៧០០គ្រាប់ ក្លាយជាមហាអំណាចនុយក្លេអ៊ែរទីបីលើពិភពលោកនាពេលនោះ។

ទោះបែបនេះក្តី អាវុធទាំងនេះគឺស្ថិតក្រោមការគ្រប់គ្រងរបស់រុស្ស៊ី ហើយក្រោយមក អ៊ុយក្រែន​អះអាង​ថា ខ្លួន​សុខចិត្តបោះចោល​អាវុធ​នុយក្លេអ៊ែរ ​ក្រោម​អនុស្សរណៈ​​ទីក្រុងប៊ុយដាប៉ែសឆ្នាំ១៩៩៤ ដើម្បីទទួលបាន​ការ​ធានា​សន្តិសុខ​ពីសំណាក់​រុស្ស៊ី ចក្រភព​អង់គ្លេស និង​អាមេរិក។

យ៉ាងណាមិញ រុស្ស៊ីតែងប្រកែកថា អ៊ុយក្រែន មិនដែលមាននុយក្លេអ៊ែរឡើយ ហើយអាវុធដែលនៅសេសសល់ក្រោយការដួលរលំសហភាពសូវៀតនោះ គឺជាកម្មសិទ្ធិ​ស្រប​ច្បាប់​របស់ទី​ក្រុងមូស្គូទេ៕

អត្ថបទ៖ សុខ សុវណ្ណ

ចុចអាន៖ រុស្ស៊ី អះអាងបាញ់ទម្លាក់ MiG-29 និងសម្លាប់ទ័ពអ៊ុយក្រែន ជាង៤០០នាក់ នៅតំបន់ Kursk