រកឃើញមនុស្សស្លាប់កើនដល់ ៥៣នាក់ ក្នុងគ្រោះរញ្ជួយដីកម្រិតធ្ងន់នៅ ទីបេ 

គិតត្រឹមម៉ោង១:៣០នាទីរសៀល មនុស្សចំនួន៥៣នាក់ហើយ ត្រូវបានបញ្ជាក់ថា ស្លាប់និង៦២នាក់​ រងរបួសដោយសារគ្រោះរញ្ជួយដីកម្រិតធ្ងន់ វាយប្រហារតំបន់ទីបេ នៃប្រទេសចិន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ BBC, រញ្ជួយដីកម្រិតធ្ងន់៧.១រ៉ិចទ័រ បានវាយប្រហារទីក្រុង Shigatse នៅម៉ោង៩:០៥នាទីព្រឹកថ្ងៃអង្គារទី៧ខែមករាឆ្នាំ២០២៥ ជាមួយជម្រៅ១០គីឡូម៉ែត្រ ហើយឥទ្ធិពលរបស់វា បានធ្វើឲ្យរង្គើចម្ងាយរាប់រយគីឡូម៉ែត្រ ដល់ប្រទេសនេប៉ាល់និងឥណ្ឌាឯណោះ។

ភ្លាមៗនោះ កងទ័ពអាកាសចិន បានបើកប្រតិបត្តិការជួយសង្គ្រោះ ហើយបញ្ជូនដ្រូនទៅកាន់តំបន់ដែលរងការវាយប្រហារ ដែលស្ថិតនៅជើងភ្នំ Everest ប៉ុន្តែ ប្រតិបត្តិការនេះ ត្រូវជួបឧបសគ្គដោយសារតែអាកាសធាតុត្រជាក់ខ្លាំង។

ស្របពេលជាមួយគ្នានោះ សារព័ត៌មាន Xinhua រាយការណ៍ថា ផ្ទះសម្បែងនិងសំណាង់នានា ត្រូវខូចខាតយ៉ាងដំណំ ខណៈអគ្គិសនីនិងទឹកស្អាត ក៏ត្រូវកាត់ផ្តាច់ផងដែរ។

សូមបញ្ជាក់ថា តំបន់នេះស្ថិតនៅលើខ្សែបណ្តោយនៃផ្ទាំងតិចតូនិកឥណ្ឌានិងអឺរ៉ូស៊ី ដែលតែងកើតមានសកម្មភាពរញ្ជួយយ៉ាងញឹកញាប់។

ជាក់ស្តែង ការរញ្ជួយដីកម្រិតធ្ងន់៧.៨រ៉ិចទ័រ នៅក្បែរទីក្រុង កដ្ឋមណ្ឌូ នៃប្រទេសនេប៉ាល់ បានសម្លាប់មនុស្សជិត ៩ ០០០នាក់ និងរបួសជាង ២០ ០០០នាក់៕

អត្ថបទ៖ សុខ សុវណ្ណ

ចុចអាន៖ រញ្ជួយដីកម្រិតធ្ងន់ វាយប្រហារតំបន់ទីបេ បណ្តាលឲ្យមានមនុស្សស្លាប់