អាកាសធាតុត្រជាក់ខ្លាំង​បន្ថែម​ការលំបាក​ដល់​ការជួយ​សង្គ្រោះ​ក្នុង​គ្រោះ​រញ្ជួយដី​នៅទីបេ

មនុស្សជាង៤០០នាក់ដែលជាប់ក្រោមគំនរបាក់បែកដោយសាររញ្ជួយដីដ៏ខ្លាំងនៅតំបន់ជើងភ្នំហិម៉ាឡៃត្រូវបានជួយសង្គ្រោះ និងអ្នកស្រុកជាង ៣០០០០នាក់ត្រូវបានផ្លាស់ប្តូរទីលំនៅ ខណៈដែលការស្វែងរកអ្នកនៅរស់បានឈានចូលដល់ថ្ងៃទី២។

កាលពីថ្ងៃទី​៧មករាមានរញ្ជួយដីដ៏ខ្លាំងបំផុតមួយមិនធ្លាប់មានក្នុងប៉ុន្មានឆ្នាំថ្មីៗនេះ បានកើតឡើងនៅ Tingri ក្នុងកម្រិត ៦.៨រ៉ិចទ័រ ក្នុងតំបន់ទីបេរបស់ប្រទេសចិន ចម្ងាយប្រហែល​៨០គីឡូម៉ែត្រភាគខាងជើងនៃភ្នំ Everest ដែលជាភ្នំខ្ពស់បំផុតរបស់ពិភពលោក។ ឥទ្ធិពលរញ្ជួយនេះក៏បានអង្រួនអគារនៅប្រទេសជិតខាងនេប៉ាល់ ប៊ូតង់ និងឥណ្ឌាផងដែរ។ យោង​ទីភ្នាក់​​ងារ​ព័ត៌មានរ៉យទ័រ។​

ប្រព័ន្ធផ្សព្វផ្សាយរដ្ឋរបស់ចិនបានរាយការណ៍ដោយដកស្រង់សម្តីមន្ត្រីក្នុងតំបន់​ឲ្យ​ដឹង​ថា ការប៉ាន់ស្មានដំបូងមានផ្ទះចំនួន ៣៦០៩ខ្នង ត្រូវបានបំផ្លាញនៅក្នុងតំបន់ Shigatse នៃតំបន់ទីបេ ដែលជាជម្រករបស់ប្រជាជន ៨០០០០០នាក់។ ដើម្បីជួយក្នុងប្រតិបត្តិការសង្គ្រោះ មានមនុស្សជាង៥០០នាក់ និងរថយន្តសង្គ្រោះចំនួន១០៦ ត្រូវបានបញ្ជូនទៅជួយអ្នករបួស។ តង់ អាហារ គ្រឿងម៉ាស៊ីនភ្លើង និងគ្រឿងផ្គត់ផ្គង់ផ្សេងទៀតក៏ត្រូវបានបញ្ចូនទៅដល់ទីតាំងកាលពីយប់ថ្ងៃទី ៧ខែមករាផងដែរ ហើយគ្រប់ផ្នែកនៃផ្លូវដែលរងការខូចខាតដោយសាររញ្ជួយដីត្រូវបានបើកឡើងវិញ។

ទូរទស្សន៍រដ្ឋចិន CCTV បានរាយការណ៍ថា យ៉ាងហោចណាស់មនុស្ស​១២៦​នាក់បានស្លាប់ និង ១៨៨ នាក់បានរងរបួសនៅខាងទីបេ ប៉ុន្តែគ្មាន​អ្នក​ស្លាប់​ត្រូវ​បាន​គេ​រាយការណ៍​នៅ​ក្នុង​ប្រទេស​នេប៉ាល់ ឬ​កន្លែង​ផ្សេង​ទៀត​ទេ។ យ៉ាងណាមិញបើតាមមជ្ឈមណ្ឌលគ្រប់គ្រងគ្រោះមហន្តរាយរញ្ជួយដីរបស់ចិនបានឲ្យដឹងថា ការរញ្ជួយដីច្រើនជាង៥០០ ដែលមានកម្រិតរហូតដល់ ៤.៤ រ៉ិចទ័រ បានបន្តការរញ្ជួយដីនេះ គិតត្រឹមម៉ោង​៨ព្រឹក ថ្ងៃទី៨ខែមករា។

ជាមួយគ្នានេះសីតុណ្ហភាពនៅតំបន់ខ្ពង់រាបខ្ពស់បានធ្លាក់ចុះដល់-១៨ អង្សារសេពេញមួយយប់ ដោយបន្ថែមភាពទុក្ខព្រួយដល់អ្នកដែលគ្មានផ្ទះសម្បែងបន្ថែមទៀត។ ម្ភៃបួនម៉ោងបន្ទាប់ពីការរញ្ជួយដីបានវាយប្រហារ អ្នករស់រានមានជីវិតដែលជាប់នៅក្រោមគំនរបាក់បែកដែលបានត្រូវស៊ូទ្រាំមួយយប់ក្នុងសីតុណ្ហភាពក្រោមសូន្យ បានប្រឈមនឹង​ហានិភ័យការថយចុះកម្តៅ និងបាត់បង់ជាតិទឹក។

គួរបញ្ជាក់ថាតំបន់ភាគនិរតីនៃប្រទេសចិន នេប៉ាល់ និងភាគខាងជើងប្រទេសឥណ្ឌា តែងតែរងការវាយប្រហារដោយការរញ្ជួយដី ខណៈខ្ពង់រាបទីបេទាំងមូលមានសកម្មភាពរញ្ជួយ ក៏ដូចជាគែមខាងកើត និងខាងជើងរបស់វា ដែលត្រួតលើគ្នាជាមួយខេត្ត និងតំបន់របស់ចិនដូចជា Sichuan, Gansu និង Qinghai ។

យោងតាមការិយាល័យរញ្ជួយដីនៃខេត្តSichuanបានឱ្យដឹងថា ក្នុងរយៈពេល ៥ឆ្នាំកន្លងមកនេះ មានការរញ្ជួយដីចំនួន ២៩ ដែលមានកម្រិត ៣ ឬលើសពីនេះ ក្នុងចម្ងាយ២០០ គីឡូម៉ែត្រពីចំណុចកណ្តាលនៃការរញ្ជួយដី។ ក្នុងឆ្នាំ ២០០៨ ការរញ្ជួយដីកម្រិត ៨ រិចទ័របានវាយប្រហារទីក្រុង Chengdu នៃខេត្ត Sichuan ដោយបានឆក់យកជីវិតមនុស្សយ៉ាងហោចណាស់ ៧០០០០ នាក់ ដែលជាការរញ្ជួយដីខ្លាំងបំផុតដែលបានវាយប្រហារប្រទេសចិនចាប់តាំងពីការរញ្ជួយដី Tangshan ឆ្នាំ ១៩៧៦ ដែលបានសម្លាប់មនុស្សយ៉ាងហោចណាស់ ២៤២០០០ នាក់។

យ៉ាងណាការរញ្ជួយដីកាលថ្ងៃទី៧ខែមករានេះគឺជាគ្រោះមហន្តរាយដ៏អាក្រក់បំផុតចាប់តាំងពីការរញ្ជួយដីកម្រិត ៦.២ រិចទ័រក្នុងឆ្នាំ ២០២៣ ដែលបានសម្លាប់មនុស្សយ៉ាងហោចណាស់ ១៤៩ នាក់នៅក្នុងតំបន់ដាច់ស្រយាលភាគខាងជើងភាគខាងលិចនៃប្រទេសចិន៕

អត្ថបទ៖ ប៊ុន សុភាព