ព័ត៌មានអន្ដរជាតិ

អាល្លឺម៉ង់ កំពុងជំរុញឲ្យ EU បន្ធូរបន្ថយទណ្ឌកម្មលើស៊ីរី

បានផុស

២ ខែ មុន

នៅ

ថ្ងៃពុធ ៨ មករា ២០២៥

ដោយ

Chheang

ប្រទេសអាល្លឺម៉ង់ កំពុងដឹកនាំសហភាពអឺរ៉ុបពិភាក្សាគ្នាអំពីការបន្ធូរបន្ថយទណ្ឌកម្ម ដែលដាក់លើរដ្ឋាភិបាលស៊ីរី និងការផ្ដល់ជំនួយដល់ប្រជាជនស៊ីរី ក្រោយការផ្តួលរំលំរបបប្រធានាធិបតី Bashar al-Assad។ នេះបើយោងតាមការចុះផ្សាយរបស់ទីភ្នាក់ងារព័ត៌មាន Reuters នៅថ្ងៃទី៨ខែមករាឆ្នាំ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រភពពីក្រសួងការបរទេសអាល្លឺម៉ង់ បានប្រាប់ Reuters ថា៖ «យើងកំពុងពិភាក្សាយ៉ាងសកម្មនូវមធ្យោបាយ ក្នុងការផ្តល់ការបន្ធូរបន្ថយទណ្ឌកម្មដល់ប្រជាជនស៊ីរី ក្នុងវិស័យមួយចំនួន» ដែលនេះតម្រូវឲ្យមានការសម្រេចចិត្តជាឯកច្ឆ័ន្ទពីសហភាពអឺរ៉ុប។

កាលពីថ្ងៃសុក្រសប្ដាហ៍មុន រដ្ឋមន្ត្រីការបរទេសអាល្លឺម៉ង់ លោកស្រី Annalena Baerbock បានធ្វើដំណើរទៅកាន់ប្រទេសស៊ីរី សម្រាប់ទស្សនកិច្ចរយៈពេលមួយថ្ងៃជាមួយសមភាគីបារាំង ក្នុងនាមជាសហភាពអឺរ៉ុប និងបានជួបជាមួយមេដឹកនាំនៃក្រុម HTS Ahmed al-Sharaa។

លោកស្រី Baerbock បាននិយាយថា គ្រប់ក្រុមកងកម្លាំងស៊ីរីទាំងអស់ រួមទាំងស្ត្រីនិងជនជាតិ Kurd ត្រូវតែចូលរួមនៅក្នុងការផ្លាស់ប្តូរប្រទេស បើខ្លួនពិតជាចង់បានការគាំទ្រពីអឺរ៉ុបប្រាកដមែន។

សូមរំឭកថា ការវាយលុកដ៏លឿនរបស់ក្រុមឧទ្ទាម Hayat Tahrir al-Sham បានផ្តួលរំលំលោកប្រធានាធិបតី Assad កាលពីថ្ងៃទី៨ខែធ្នូឆ្នាំ២០២៤ ហើយឈានដល់ការបង្កើតជារដ្ឋាភិបាលថ្មីបណ្ដោះអាសន្ន។

សហរដ្ឋអាមេរិក កាលពីថ្ងៃចន្ទបានដាក់ចេញនូវការលើកលែងទណ្ឌកម្មរយៈពេល៦ខែ សម្រាប់ប្រតិបត្តិការជាមួយស្ថាប័នរដ្ឋាភិបាលស៊ីរីមួយចំនួន ដើម្បីសម្រួលដល់លំហូរនៃជំនួយមនុស្សធម៌ ដោះស្រាយការខ្វះខាតថាមពលរបស់ស៊ីរី និងអនុញ្ញាតឲ្យមានការបង្វិលប្រាក់ផ្ទាល់ខ្លួន។

សហភាពអឺរ៉ុប អាមេរិក ចក្រភពអង់គ្លេស និងប្រទេសមួយចំនួនផ្សេងទៀត បានដាក់ទណ្ឌកម្មយ៉ាងតឹងរ៉ឹងលើប្រទេសស៊ីរី បន្ទាប់ពីលោក Assad បានបង្ក្រាបការតវ៉ាគាំទ្រលទ្ធិប្រជាធិបតេយ្យក្នុងឆ្នាំ២០១១ ដែលនាំឲ្យស៊ីរីធ្លាក់ចូលទៅក្នុងសង្គ្រាមស៊ីវិល៕

ដោយ៖ ឈាង