ព័ត៌មានអន្ដរជាតិ

ដាណឺម៉ាក សោកស្ដាយដែលព្រងើយកន្ដើយដាក់ Greenland អស់រាប់ឆ្នាំ

បានផុស

៤ សប្តាហ៍ មុន

នៅ

ថ្ងៃសុក្រ ១០ មករា ២០២៥

ដោយ

Chheang

ប្រទេសដាណឺម៉ាក បានទទួលស្គាល់ថា ខ្លួនបានព្រងើយកន្តើយជាយូរយារណាស់មកហើយចំពោះការការពាររបស់ Greenland ដែលជាកោះដ៏ធំ និងមានសារៈសំខាន់ជាយុទ្ធសាស្ត្រ និងជាកោះមួយដែលលោក ដូណាល់ ត្រាំ ចាត់ទុកថាមានសារៈសំខាន់សម្រាប់សន្តិសុខរបស់សហរដ្ឋអាមេរិក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋមន្ត្រីការពារជាតិដាណឺម៉ាក លោក Troels Lund Poulsen បានប្រាប់អ្នកសារព័ត៌មានកាលពីថ្ងៃព្រហស្បតិ៍ទី៩ខែមករាឆ្នាំ២០២៥ថា៖ «យើងបានធ្វេសប្រហែសអស់ជាច្រើនឆ្នាំ ដើម្បីធ្វើការវិនិយោគចាំបាច់លើកប៉ាល់ និងយន្តហោះ ដែលនឹងជួយត្រួតពិនិត្យអាណាចក្ររបស់យើង ហើយនោះជាអ្វីដែលឥឡូវនេះយើងកំពុងព្យាយាមធ្វើរឿងខ្លះ»។

លោក ត្រាំ ដែលត្រៀមចូលកាន់តំណែងជាប្រធានាធិបតីអាមេរិកនៅថ្ងៃទី២០ខែមករា បាននិយាយថា ការគ្រប់គ្រងរបស់អាមេរិកលើ Greenland ដែលជាដែនដីអធិបតេយ្យភាពរបស់ដាណឺម៉ាក គឺចាំបាច់ខ្លាំង ហើយគាត់មិនបានបដិសេធក្នុងការប្រើសកម្មភាពយោធា ឬសេដ្ឋកិច្ចប្រឆាំងនឹងដាណឺម៉ាក ដើម្បីយក Greenland មកកាន់កាប់នោះទេ។

នាយករដ្ឋមន្ត្រីដាណឺម៉ាក លោកស្រី Mette Frederiksen បាននិយាយកាលពីល្ងាចថ្ងៃទី៩មករាថា លោកស្រីបានស្នើសុំជួបជាមួយលោក ត្រាំ ប៉ុន្តែមិនរំពឹងថានឹងអាចមានជំនួបណាមួយ នៅមុនការចូលកាន់តំណែងរបស់គាត់ឡើយ។

សូមបញ្ជាក់ថា Greenland ត្រូវបានគ្រប់គ្រងដោយប្រទេសដាណឺម៉ាកអស់ជាច្រើនសតវត្សរ៍មកហើយ ទោះបីជាប្រជាពលរដ្ឋចំនួន ៥៧ ០០០នាក់នៅទីនោះឥឡូវមានសិទ្ធិគ្រប់គ្រងកិច្ចការក្នុងស្រុកដោយខ្លួនឯងក៏ដោយ។ យ៉ាងណា បើនិយាយពីរឿងសន្តិសុខ និងកិច្ចការបរទេសរបស់ Greenland វានៅតែត្រូវបានគ្រប់គ្រងដោយប្រទេសដាណឺម៉ាកនៅឡើយ។

យោធាអាមេរិក បានរក្សាវត្តមានអចិន្ត្រៃយ៍នៅឯមូលដ្ឋាន Pituffik Space នៅភាគពាយព្យនៃ Greenland។

Greenland មានសារៈសំខាន់សម្រាប់យោធាអាមេរិក និងប្រព័ន្ធប្រកាសអាសន្នមីស៊ីលប៉ាលិស្ទិករបស់ខ្លួន ដោយសារកោះអាកទិកដ៏ធំមួយនេះជាផ្លូវកាត់ជិតបំផុតឆ្លងពីអឺរ៉ុបទៅកាន់អាមេរិកខាងជើង។

Greenland គឺជាទឹកដីផ្នែកមួយនៃដាណឺម៉ាកអស់រយៈពេលជាង ៦០០ឆ្នាំមកហើយ ហើយបានទទួលស្វ័យភាពពីដាណឺម៉ាកក្នុងឆ្នាំ១៩៧៩៕

ដោយ៖ ឈាង

ចុចអាន៖ រឿង Greenland! វិមានក្រឹមឡាំង ផ្តាំទៅ ត្រាំ ថា សូមកុំភ្លេច រុស្ស៊ីក៏មានវត្តមាននៅតំបន់អាកទិកដែរ