ព័ត៌មានអន្ដរជាតិ

អាមេរិក ខាតបង់ប្រហែល ៥៧ពាន់លានដុល្លារ ព្រោះភ្លើងឆេះព្រៃនៅ LA

បានផុស

១ ខែ មុន

នៅ

ថ្ងៃសុក្រ ១០ មករា ២០២៥

ដោយ

Chheang

យោងតាមការប៉ាន់ស្មានរបស់ក្រុមហ៊ុន AccuWeather ការខាតបង់សេដ្ឋកិច្ចជាបឋមនៃករណីភ្លើងឆេះព្រៃដ៏អាក្រក់ និងសាហាវបំផុតនៅទីក្រុង Los Angeles រដ្ឋកាលីហ្វ័រញ៉ា អាចស្ថិតក្នុងចន្លោះពី ៥២ពាន់លានដុល្លារ ដល់ ៥៧ពាន់លានដុល្លារ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកជំនាញ បានឲ្យដឹងថា ការខាតបង់ដ៏សម្បើមនេះ មិនមែនដោយសារតែអគ្គិភ័យបានលេបត្របាក់ផ្ទះអស់ជាច្រើនខ្នងនោះទេ តែព្រោះផ្ទះនៅតំបន់រងគ្រោះសុទ្ធតែមានតម្លៃខ្ពស់ខ្លាំង ដោយជាមធ្យមក្នុងផ្ទះមួយខ្នងថ្លៃជាង ២លានដុល្លារឯណោះ។

គិតមកទល់នឹងពេលនេះ យ៉ាងហោចណាស់មនុស្ស ៥នាក់បានស្លាប់ ហើយអគារជាង ១ ០០០ខ្នងត្រូវបានបំផ្លាញ ក្រោយទីក្រុង Los Angeles កើតមានភ្លើងឆេះព្រៃដ៏អាក្រក់បំផុតនៅក្នុងប្រវត្តិសាស្ត្ររបស់ខ្លួន។ អណ្តាតភ្លើងដែលកំពុងឆេះយ៉ាងសន្ធោសន្ធៅ បានលេបត្របាក់ផ្ទះ និងអាជីវកម្ម ដោយបង្ខំអ្នកស្រុកឲ្យភៀសខ្លួនចេញពីទីលំនៅរបស់ពួកគេ ហើយក្នុងចំណោមអ្នករងគ្រោះទាំងនោះក៏មានតារាល្បីៗដូចជា Paris Hilton, Adam Brody, និង Billy Crystal ផងដែរ។

ជុំវិញមហន្តរាយនេះ ប្រធានាធិបតីអាមេរិកលោក ចូ បៃដិន បានប្រកាសបញ្ចេញជំនួយសហព័ន្ធ ហើយបញ្ជូនឧទ្ធម្ភាគចក្រនិងយន្តហោះពន្លត់អគ្គិភ័យ៣០គ្រឿង ព្រមទាំងយន្តហោះយោធាធុនធ្ងន់ C-130 ទៅកាន់ទីក្រុង Los Angeles។

ស្របពេលជាមួយគ្នានោះមន្ត្រីក្រុង Los Angeles កំពុងបើកការស៊ើបអង្កេតរកមូលហេតុពិតនៃសោកនាដកម្មភ្លើងឆេះព្រៃនេះ ខណៈមានការសង្ស័យថា វាអាចផ្តើមចេញពីការលួចដុត ហើយបើរកឃើញថា វាបង្កឡើងដោយមនុស្សលួចដុតមែននោះ អ្នកប្រព្រឹត្តនឹងត្រូវបានចោទប្រកាន់ពីបទឃាតកម្ម៕

ដោយ៖ ឈាង

ចុចអាន៖ ក្រុង LA ប្រាប់ឲ្យពលរដ្ឋត្រៀមចិត្តត្រៀមកាយ ចំពោះភ្លើងឆេះព្រៃ ដែលរឹតតែអាក្រក់ នាពេលខាងមុខ