ព័ត៌មានអន្ដរជាតិ

ប្រទេសចិនរកឃើញអ្នកឆ្លងមេរោគអុតស្វា(mpox) ៥ករណីថ្មីទៀត

បានផុស

៤ សប្តាហ៍ មុន

នៅ

ថ្ងៃសុក្រ ១០ មករា ២០២៥

ដោយ

ប្រទេសចិន បានរាយការណ៍ថា ខ្លួនបានរកឃើញករណីឆ្លងចំនួន៥នៃមេរោគជំងឺអុតស្វា (mpox) ថ្មី ប៉ុន្តែថាក៏បានអះអាងថា ការផ្ទុះឡើងនេះត្រូវបានគ្រប់គ្រងយ៉ាងមានប្រសិទ្ធភាព និងមិនមានការឆ្លងដែលត្រូវបានរកឃើញទៅកាន់អ្នកជិតស្និទ្ធអ្នកជំងឺនោះទេ។ នេះបើយោងតាមការចេញផ្សាយរបស់សារព័ត៌មាន CNA នៅថ្ងៃទី១០ខែមករានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អង្គការសុខភាពពិភពលោក (WHO) បានប្រកាសអាសន្នសុខភាពជាសាកលជុំវិញមេរោគអុតស្វានេះនៅក្នុងខែសីហា ហើយបានបន្តវានៅក្នុងខែវិច្ឆិកា បន្ទាប់ពីការផ្ទុះឡើងនៅសាធារណរដ្ឋប្រជាធិបតេយ្យកុងហ្គោ (DRC)នៅតំបន់អាហ្វ្រិក ជាកន្លែងដែលវាបានសម្លាប់មនុស្សជាង១០០០នាក់។ ពីរថ្ងៃបន្ទាប់ពីការប្រកាសខែសីហារបស់អង្គការសុខភាពពិភពលោក ប្រទេសចិនបានប្រកាសថា ខ្លួននឹងពិនិត្យមនុស្សធ្វើដំណើរចូលប្រទេស ដោយការធ្វើតេស្តរក mpox ក្នុងរយៈពេលប្រាំមួយខែខាងមុខ។

កាលពីព្រហស្បតិ៍អាជ្ញាធរសុខាភិបាលចិន បានរកឃើញការផ្ទុះឡើងជាចង្កោមនៃមេរោគ mpox strain clade 1b ជាមួយនឹងប្រភពនៃការឆ្លងដែលគេជឿថា ពីអ្នកដែលធ្លាប់រស់នៅក្នុងសាធារណរដ្ឋប្រជាធិបតេយ្យកុងហ្គោ DRC។ មជ្ឈមណ្ឌលគ្រប់គ្រងនិងបង្ការជំងឺរបស់ចិន បាននិយាយនៅក្នុងសេចក្តីថ្លែងការណ៍មួយថា មនុស្ស៤នាក់ដែលមានទំនាក់ទំនងជិតស្និទ្ធជាមួយអ្នកជំងឺត្រូវបានគេរកឃើញថា បានឆ្លងមេរោគហើយកំពុងបង្ហាញរោគសញ្ញាស្រាលៗ ដូចជា មានកន្ទួល និងពងបែក។

អ្នកឆ្លងមេរោគ និងអ្នកប៉ះពាល់អ្នកឆ្លងកំពុងទទួលបានការព្យាបាលវេជ្ជសាស្រ្ត និងការសង្កេតសុខភាព ហើយការផ្ទុះឡើងនេះត្រូវបានគ្រប់គ្រងនិងដោះស្រាយប្រកបដោយប្រសិទ្ធភាពផងដែរ។ បើតាមអាជ្ញាធរសុខាភិបាលចិន រហូតមកដល់ពេលនេះ មិនមានករណីណាមួយត្រូវបានរកឃើញក្នុងចំណោមអ្នកមានទំនាក់ទំនងអ្នកឆ្លងផ្សេងទៀតនោះទេ។

ជំងឺឆ្លងអុតស្វា (Mpox) បង្កឡើងដោយមេរោគឆ្លងទៅមនុស្សដោយសត្វ ប៉ុន្តែក៏អាចឆ្លងពីមនុស្សទៅមនុស្សតាមរយៈការប៉ះពាល់រាងកាយជិតស្និទ្ធផងដែរ។ វាបណ្តាលឱ្យមានអាការៈគ្រុនក្តៅ ឈឺសាច់ដុំ និងដំបៅស្បែកធំៗ ព្រមទាំងអាចបណ្តាលឲ្យស្លាប់បាន។ បើយោងតាមអង្គការសុខភាពពិភពលោកករណីឆ្លង mpox ត្រូវបានរាយការណ៍នៅក្នុងប្រទេសជាង ១២០ចាប់តាំងពីឆ្នាំ២០២២មក៕