ព័ត៌មានអន្ដរជាតិ

លោក ត្រាំ៖ ជំនួបជាមួយ ពូទីន កំពុងត្រូវបានរៀបចំហើយ

បានផុស

២ សប្តាហ៍ មុន

នៅ

ថ្ងៃសៅរ៍ ១១ មករា ២០២៥

ដោយ

Chheang

ប្រធានាធិបតីទើបជាប់ឆ្នោតរបស់សហរដ្ឋអាមេរិក លោក ដូណាល់ ត្រាំ បាននិយាយថា កិច្ចប្រជុំរវាងលោក និងប្រធានាធិបតីរុស្ស៊ីលោក វ៉្លាឌឺមៀរ ពូទីន កំពុងត្រូវបានបង្កើតឡើងហើយ ប៉ុន្តែលោកមិនបានបញ្ជាក់ពីកាលបរិច្ឆេទសម្រាប់កិច្ចពិភាក្សារវាងមេដឹកនាំទាំងពីរនោះទេ។

លោក ដូណាល់ ត្រាំ និងលោក វ៉្លាឌឺមៀរ ពូទីន (រូបភាព៖ AP)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ត្រាំ បាននិយាយនៅក្នុងសុន្ទរកថាមុនពេលកិច្ចប្រជុំជាមួយអភិបាលរដ្ឋនៅរមណីយដ្ឋាន Mar-a-Lago ក្នុងទីក្រុង Palm Beach រដ្ឋ Florida កាលពីថ្ងៃទី៩ខែមករាឆ្នាំ២០២៥ថា៖ «គាត់ចង់ជួប ហើយយើងកំពុងរៀបចំវា។ ប្រធានាធិបតីពូទីនចង់ជួប។ គាត់បាននិយាយជាសាធារណៈ ហើយយើងត្រូវតែបញ្ចប់សង្រ្គាមនោះ។ នោះជាភាពរញ៉េរញ៉ៃដ៏បង្ហូរឈាម» ដោយសំដៅលើសង្គ្រាមរុស្ស៊ី និងអ៊ុយក្រែន។

វិមានក្រឹមឡាំង បាននិយាយកាលពីថ្ងៃសុក្រទី១០មករាថា លោក ពូទីន បើកចំហដើម្បីពិភាក្សាជាមួយលោក ត្រាំ ហើយថា ទីក្រុងមូស្គូមិនមានលក្ខខណ្ឌចាំបាច់សម្រាប់រៀបចំកិច្ចប្រជុំនោះទេ។

អ្នកនាំពាក្យរបស់លោក ពូទីន លោក Dmitry Peskov បានប្រាប់អ្នកសារព័ត៌មានថា៖ «ប្រធានាធិបតីបាននិយាយម្តងហើយម្តងទៀតអំពីការបើកចំហរបស់គាត់ក្នុងការទាក់ទងជាមួយមេដឹកនាំអន្តរជាតិ រួមទាំងប្រធានាធិបតីសហរដ្ឋអាមេរិក រួមទាំងលោក ដូណាល់ ត្រាំ»។

លោក Peskov បានបន្ថែមថា វិមានក្រឹមឡាំងបានស្វាគមន៍ «ការត្រៀមខ្លួនរបស់ ត្រាំ ក្នុងការដោះស្រាយបញ្ហាតាមរយៈការសន្ទនា។ វាគ្មានលក្ខខណ្ឌតម្រូវទេ។ អ្វីដែលទាមទារគឺឆន្ទៈនយោបាយទៅវិញទៅមក ដើម្បីដោះស្រាយបញ្ហាតាមរយៈការសន្ទនា»។

សូមបញ្ជាក់ថា កន្លងមកលោក ត្រាំ បានរិះគន់ជាញឹកញាប់ចំពោះជំនួយយោធាដ៏ច្រើនដែលអាមេរិកបានបញ្ជូនទៅក្រុងកៀវ។

ចាប់តាំងពីការឈ្លានពានរបស់រុស្ស៊ីបានចាប់ផ្តើមមក អាមេរិកក្រោមការដឹកនាំរបស់ប្រធានាធិបតី ចូ បៃដិន បានសន្យាផ្តល់ជំនួយជាង ១៧៥ពាន់លានដុល្លារសម្រាប់អ៊ុយក្រែន រួមទាំងជំនួយសន្តិសុខជាង ៦០ពាន់លានដុល្លារផងដែរ។

ទោះបីជាយ៉ាងណាក៏ដោយ គេមិនប្រាកដទេថាតើជំនួយនឹងបន្តក្នុងជំហរយ៉ាងដូចម្ដេចទៀតក្រោមការដឹកនាំរបស់លោក ត្រាំ នៅក្នុងអាណត្តិថ្មី ខណៈដែលគាត់បាននិយាយថា គាត់ចង់ធ្វើឲ្យសង្រ្គាមឈានដល់ទីបញ្ចប់យ៉ាងឆាប់រហ័ស៕

ដោយ៖ ឈាង