រដ្ឋ Johor ភាគខាងត្បូង​ម៉ាឡេស៊ី​​ប្រឈមទឹកជំនន់ ខណៈ​អ្នក​ប៉ះពាល់​កើនជិត៤០០០នាក់

ចំនួនជនរងគ្រោះដោយសារទឹកជំនន់នៅរដ្ឋ Johor ​ភាគ​ខាងត្បូង​​​​ប្រទេសម៉ាឡេស៊ីបន្តកើនឡើង ដោយឥឡូវនេះមនុស្សជិត​៤០០០​នាក់កំពុងស្វែងរកទីជម្រកបណ្ដោះអាសន្ននៅក្នុងមជ្ឈមណ្ឌលសង្គ្រោះទឹកជំនន់​នៅ​រដ្ឋ​​​ដែល​មាន​ព្រំ​ប្រទល់​ជាប់​ប្រទេសសិង្ហបុរី​​។

យោងតាមគណៈកម្មាធិការគ្រប់គ្រងគ្រោះមហន្តរាយរដ្ឋ Johor ចំនួនសរុបនៃជនរងគ្រោះដោយទឹកជំនន់នៅក្នុងរដ្ឋមានចំនួន ៣៩៧៣​នាក់គិតត្រឹមម៉ោង​៩ព្រឹកថ្ងៃចន្ទ។ គណៈកម្មាធិការ បានបន្ថែម ថា អាកាសធាតុមានភាពអាប់អួរនៅក្នុងស្រុកទាំងដប់ក្នុងរដ្ឋ Johor រួមទាំងតំបន់ដែលមិនរងផលប៉ះពាល់ដោយទឹកជំនន់ចាប់តាំងពីម៉ោង​៤ព្រឹកថ្ងៃចន្ទ​១៣ មករានេះ។

គណៈកម្មាធិការនេះ បានឲ្យដឹងថា មានប្រជាពលរដ្ឋចំនួន​៣៩៧៣​នាក់ មកពី១១១៣​គ្រួសារកំពុងស្វែងរកទីជម្រកនៅក្នុងស្រុកចំនួន៥​ ដែលរងផលប៉ះពាល់។ អ្នកដែលត្រូវបានជម្លៀសដោយសារទឹកជំនន់រួមមាននៅ ៨០៨នាក់ នៅក្រុង Kulai ៧៦៤ នាក់ នៅក្រុងPontian មាន ៥៩៥ នាក់ និង នៅក្រុង Kluang ចំនួន ៥៥០ នាក់។មជ្ឈមណ្ឌលសង្គ្រោះទឹកជំនន់មួយទៀតក៏ត្រូវបានបើកផងដែរ ដែលនាំឱ្យចំនួនមជ្ឈមណ្ឌលសកម្មសរុបកើនដល់ ៣៨ នៅទូទាំងរដ្ឋ។

គួរបញ្ជាក់ថាទឹកជំនន់គឺជារឿងធម្មតានៅក្នុងផ្នែកខ្លះនៃប្រទេសម៉ាឡេស៊ីក្នុងអំឡុងរដូវខ្យល់មូសុងប្រចាំឆ្នាំ ដែលចាប់ផ្តើមនៅក្នុងខែវិច្ឆិកា ហើយអាចបន្តរហូតដល់ខែមីនា៕

អត្ថបទ៖ ប៊ុន សុភាព