ព័ត៌មានអន្ដរជាតិ

លោក Yoon នឹងអវត្តមានពីសវនាការលើកដំបូងរបស់តុលាការធម្មនុញ្ញនៅថ្ងៃអង្គារ

បានផុស

៣ ខែ មុន

នៅ

ថ្ងៃចន្ទ ១៣ មករា ២០២៥

ដោយ

តុលាការធម្មនុញ្ញកូរ៉េខាងត្បូងនឹងបើកសវនាលើកដំបូងលើសំណុំរឿងដ៏ចម្រូងចម្រាស់ជុំវិញការដកអំណាចប្រធានាធិបតីកូរ៉េខាងត្បូង លោក Yoon Suk Yeol ដោយរដ្ឋសភាកាលថ្ងៃទី១៤ខែធ្នូឆ្នាំ២០២៤ ខណៈលោក Yoon នៅសល់វេទិកានយោបាយចុងក្រោយគឺតុលាការធម្មនុញ្ញនេះដើម្បីលេងជាមួយបក្សប្រឆាំងដែលគ្រប់គ្រងសភាស្ទើរផ្តាច់មុខ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

វាមានរយៈពេល៣១ថ្ងៃ បន្ទាប់ពីប្រធានាធិបតីកូរ៉េខាងត្បូង លោក Yoon Suk Yeol ដែលត្រូវព្យួរអំណាចដោយការបោះឆ្នោតរដ្ឋសភាដែលផ្តួចផ្តើមដោយគណបក្សប្រជាធិបតេយ្យ ដែលគ្រប់គ្រងស្ទើរតែ១ភាគ៣នៃសមាជិករដ្ឋសភាសរុប៣០០នាក់។ លោក Yoon បានសន្យាជាមួយអ្នកគាំទ្រថា «ខ្លួននឹងប្រយុទ្ធដល់ទីបំផុត»នោះ គឺមានលទ្ធភាពវិលទៅកាន់អំណាចវិញ នៅពេលតុលាការធម្មនុញ្ញដែលសមាជិកចៅក្រមយ៉ាងហោចណាស់៤រូបក្នុងចំណោមចៅក្រមដែលស្ថិតក្នុងតួនាទីចំនួន៦រូបតែងតាំងដោយរូបលោក។

ជោគវាសនាអំណាចរបស់ លោក Yoon គឺស្ថិតនៅក្នុងកណ្តាប់ដៃរបស់តុលាការធម្មនុញ្ញដែលមានពេល១៨០ថ្ងៃដើម្បីដំណើរការត្រួតពិនិត្យផ្លូវច្បាប់ មុនឈានទៅសម្រេចសេចក្តីថាតើ នឹងត្រូវតម្កល់ការចោទប្រកាន់ទម្លាក់អំណាចរបស់រដ្ឋសភាចាត់ទុកជាបានការ ឬក៏ត្រូវច្រានចោលបណ្តឹងរបស់សភានោះ។

ដំណើរការសវនាការលើកដំបូងរបស់តុលាការធម្មនុញ្ញនៅថ្ងៃទី១៤ខែមករានេះ គឺកើតឡើងដែលមានរយៈពេល១ខែគត់ ចាប់តាំងពីលោក Yoon ត្រូវបានព្យួរអំណាច។ ក្នុងចន្លោះពេលនៃការព្យួរអំណាចនេះ នយោបាយរបស់កូរ៉េខាងត្បូងបានធ្លាក់ចូលទៅក្នុងវិបត្តិមួយមិនធ្លាប់ ដោយសភាបានបោះឆ្នោតទម្លាក់នាយករដ្ឋមន្ត្រី Han Duck-soo ដែលកាន់អំណាចជាប្រធានាធិបតីស្តីទីជំនួសលោក Yoon ត្រឹមតែរយៈពេល១៣ថ្ងៃ ដោយសារតែលោក Han មិនចេញក្រឹត្យតែងតាំងក្រុមស៊ើបអង្កេតពិសេសលើករណី លោក Yoon និងការមិនតែងតាំងចៅក្រមតុលាការធម្មនុញ្ញដែលស្នើដោយគណបក្សប្រជាធិបតេយ្យ។

តាមសេចក្តីរាយការណ៍របស់សារព័ត៌មានកូរ៉េ The Korea Herald ទោះបីជាមានការអះអាងរបស់មេធាវីថា លោក Yoon នឹងមានវត្តមាននៅអំឡុងពេលសវនាការ ប៉ុន្តែសម្រាប់សវនាការនៅថ្ងៃអង្គារនេះនឹងគ្មានវត្តមានលោក Yoon ទេ ដោយសារតែការបារម្ភអំពីសន្តិសុខ។

ក្នុងសប្តាហ៍មុន លោក Yoon ប្រឈមការប៉ុនប៉ងចាប់ខ្លួនរហូតដល់ទៅ២ដង ដោយក្រុមស៊ើបអង្កេតបង្កើតឡើងដោយរដ្ឋសភា និង ក្រុមឯករាជ្យនៃការិយាយល័យស៊ើបអង្កេតពុករលួយសម្រាប់មន្ត្រីជាន់ខ្ពស់(CIO) ប៉ុន្តែការចាប់ខ្លួនបរាជ័យទៅវិញដោយសារការរារាំងរបស់កងរក្សាសន្តិសុខប្រធានាធិបតី និងប្រជាជនគាំទ្រលោក Yoon។

ក្រុមអ្នកគាំទ្រលោក Yoon បានប្រមូលផ្តុំគ្នារួមជាមួយកងរក្សាសន្តិសុខ ដោយមិនបំបែកគ្នាចេញពីនិវេសនដ្ឋានរបស់លោក Yoon ចាប់តាំងពី CIO ចេញដីកាបង្គាប់ឲ្យនាំខ្លួន ដោយសារតែលោក Yoon បានខកខានទៅឆ្លើយបំភ្លឺចំនួន២លើករួចមក។

នយោបាយរបស់កូរ៉េខាងត្បូងបានធ្លាក់ចូលទៅក្នុងវិបត្តិដ៏ស្មុគស្មាញ ចាប់តាំងពីលោក Yoon បានប្រកាសច្បាប់អាជ្ញាសឹកកាលរាត្រីថ្ងៃទី៣ខែធ្នូ ដោយប៉ងចាប់អ្នកនយោបាយប្រឆាំងសំខាន់ៗ មានដូចជា ប្រធានរដ្ឋសភា ប្រធានគណៈប្រជាធិបតេយ្យ និងសូម្បីប្រធានគណបក្សរបស់លោកផងដែរ ដោយចោទពីបទប្រឆាំងរដ្ឋ និងគាំទ្រកូរ៉េខាងជើង។

មុនឈានដល់ការប្រកាសច្បាប់អាជ្ញាសឹករបស់លោក Yoon រដ្ឋសភាកូរ៉េខាងត្បូងគ្រប់គ្រងស្ទើរតែផ្តាច់មុខរបស់បក្សប្រឆាំង បានច្រានចោលសំណើរចំណាយថវិកានៅក្នុងឆ្នាំ២០២៥ ដែលស្នើឡើងដោយប្រធានាធិបតី។

ទោះបីជាបែបណា ការបើកសវនាការរបស់តុលាការធម្មនុញ្ញនៅថ្ងៃអង្គារនេះ គឺគា្រន់តែពិនិត្យមើលដំណើរការផ្លូវច្បាប់ និងការស្តាប់ការបកស្រាយពីភាគីទាំងសងខាងប៉ុណ្ណោះ ដោយមិនទាន់សម្រេចសេចក្តីលើសំណុំរឿងនេះទេ ដោយតុលាការមានពេលច្រើនទៀតដើម្បីដំណើរការផ្លូវច្បាប់៕

ដោយ រ៉ាន់ រើយ