ព័ត៌មានអន្ដរជាតិ

ប៉ូលិស LA ចាប់បាន ចោរបន្លំខ្លួនជាអ្នកពន្លត់អគ្គិភ័យ ចូលលួចទ្រព្យសម្បត្តិក្នុងផ្ទះដែលត្រូវភ្លើងឆេះ

បានផុស

៣ ខែ មុន

នៅ

ថ្ងៃចន្ទ ១៣ មករា ២០២៥

ដោយ

ស្របពេលពលរដ្ឋរាប់ម៉ឺននាក់កំពុងជួបទុក្ខដោយសារអគ្គិភ័យដ៏សាហាវនៅទីក្រុង Los Angeles ស្រាប់តែមានជនឱកាសនិយម បានបន្លំខ្លួនធ្វើជាអ្នកពន្លត់អគ្គិភ័យ ចូលទៅលួចទ្រព្យសម្បត្តិក្នុងផ្ទះដែលត្រូវភ្លើងឆេះ។

ក្រុមពន្លត់អគ្គិភ័យនៅទីក្រុង Los Angeles (រូបថត៖ Reuters)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការបញ្ជាក់ពីប៉ូលិស LA, ពួកគេចាប់បានចោរជាង២០នាក់ ហើយក្នុងនោះមានមួយចំនួន បានស្លៀកពាក់បន្លំខ្លួនធ្វើជាអ្នកពន្លត់អគ្គិភ័យ ចូលលួចរបស់របរក្នុងផ្ទះនៅ Malibu។

មន្ត្រីកងល្បាតនៅ LA លោក Robert Luna បានប្រាប់ក្នុងសន្និសីទសារព័ត៌មានថា «ខ្ញុំសឹងមិនជឿនឹងភ្នែកថា ខ្ញុំបានឃើញបុរសដែលមើលទៅដូចជាអ្នកពន្លត់អគ្គិភ័យ ប៉ុន្តែតាមពិតមិនមែនទេ គាត់គឺជាចោរ! យើងក៏ដាក់ខ្នោះគាត់ ហើយប្រគល់ឲ្យទៅប៉ូលិសក្រុង Los Angeles ដើម្បីចាត់វិធានការជាបន្ត»។

ជុំវិញបញ្ហានេះដែរ ប្រធានាធិបតីជាប់ឆ្នោតអាមេរិក បានចេញមុខស្តីបន្ទោសមន្ត្រីរដ្ឋកាលីហ្វ័ញ៉ា ថា «អសមត្ថភាព» និងថែមទាំងទាមទារឲ្យអភិបាលរដ្ឋលោក Gavin Newsom ចុះចេញពីតំណែងទៀតផង។

លោក Newsom (ឆ្វេង) និងលោក ត្រាំ (រូបថត៖ AP)

ក្នុងការបង្ហោះលើបណ្តាញសង្គម Truth Social លោក ត្រាំ សរសេរថា «អគ្គិភ័យនៅតែកំពុងឆាបឆេះនៅ LA។ ក្រុមអ្នកអសមត្ថភាព ដូចជាគិតមិនចេញសោះថាត្រូវពន្លត់ភ្លើងដោយរបៀបណា។ ផ្ទះរាប់ម៉ឺនខ្នងត្រូវបានបាត់បង់ ហើយជាច្រើនខ្នងទៀតនឹងត្រូវបាត់បង់ក្នុងពេលឆាប់ៗ។ មានតែការស្លាប់នៅគ្រប់កន្លែង នេះគឺជាមហន្តរាយដ៏អាក្រក់បំផុតមួយក្នុងប្រវត្តិសាស្ត្រប្រទេសយើង។ តើពួកគេកើតអីបានជាមិនអាចពន្លត់ភ្លើងបាន?»។

តួលេខគិតត្រឹមព្រឹកថ្ងៃចន្ទទី១៣ខែមករាឆ្នាំ២០២៥ ចំនួនមនុស្សស្លាប់ដោយសារវិនាសកម្មភ្លើងឆេះព្រៃនៅ LA បានកើនដល់២៤នាក់ហើយ។

អគ្គិភ័យនៅ LA បានឆាបឆេះលើផ្ទៃដីសរុប ១៥ ៧៨២ហិកតា ដោយបំផ្លាញសំណង់អគារនិងផ្ទះសម្បែងជាង ១២ ០០០ខ្នង និងជំរុញឲ្យមនុស្ស ១៨០ ០០០នាក់ ត្រូវជម្លៀសខ្លួន។

អត្ថបទ៖ សុខ សុវណ្ណ

ចុចអាន៖ ត្រាំ បន្ទោសមន្ត្រី LA ថា «អសមត្ថភាព» និងទាមទារឲ្យអភិបាលរដ្ឋកាលីហ្វ័រញ៉ា ចុះចេញពីតំណែង