អ៊ុយក្រែន បាញ់មីស៊ីលវាយប្រហារតំបន់ព្រំដែនរុស្ស៊ី កំណត់គោលដៅរោងចក្រគីមី

តាមការចុះផ្សាយរបស់ RT នៅថ្ងៃអង្គារទី១៤ខែមករាឆ្នាំ២០២៥, អ៊ុយក្រែន បានបាញ់មីស៊ីលសន្ធាប់លើតំបន់ Bryansk នៃព្រំដែនរុស្ស៊ី ខណៈលោកអភិបាលអះអាងថា ការវាយប្រហារនេះ គឺកំណត់គោលដៅលើរោងចក្រគីមីដ៏ធំមួយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អភិបាលតំបន់លោក Aleksandr Bogomaz បានឲ្យដឹងថា កងទ័ពអ៊ុយក្រែនបានបាញ់មីស៊ីលច្រើនប្រភេទណាស់លើព្រំដែនរុស្ស៊ី ប៉ុន្តែខែលការពារស្ទាក់ចាប់បាន ហើយមិនបណ្តាលឲ្យមានជនរងគ្រោះឬបង្កការខូចខាតអ្វីឡើយ។ យ៉ាងណា លោកមិនបញ្ជាក់លម្អិតអំពីរឿងនេះទេ។

ការវាយប្រហារនេះកើតឡើងមិនដល់មួយសប្តាហ៍ផង បន្ទាប់ពីមាន​សេចក្តី​រាយការណ៍​អំពី​​ការ​ផ្ទុះ​ឆេះ​​រោង​ចក្រ​​​​ផលិត​អង្គធាតុ​រាវ «​​​​អាសេតូន (acetone)​» ​ដែលជា​​ធាតុ​គីមី​ចាំបាច់​​​​មួយ​សម្រាប់​វិស័យ​ឧស្សាហកម្ម ​នៅ​​ក្នុង​ឧស្សាហកម្មនៃតំបន់ Leningrad របស់រុស្ស៊ី។

ត្បិតតែ​​រុស្ស៊ី​មិន​បញ្ជាក់​ពីមូល​ហេតុ​នៃ​ការ​ផ្ទុះ​ឆេះ​នោះក៏ពិតមែន​ ប៉ុន្តែ​គេសង្ស័យថា វាគឺបង្កឡើងដោយការវាយប្រហាររបស់ដ្រូនអ៊ុយក្រែន។ ​រោងចក្រ​នេះ​​មាន​​​ទំហំ​ ​​១៦០០​​ម៉ែត្រការ៉េ​ ហើយការ​ឆេះនោះ ​​​នាំឲ្យមានការធ្លាយប្រេងយ៉ាងធំ។

លើសពីនេះ អ៊ុយក្រែន ក៏អះអាងវាយប្រហារឃ្លាំងផ្ទុកប្រេងឥន្ធនៈ នៅទីតាំងផ្គត់ផ្គង់មីស៊ីលនៃមូលដ្ឋានទ័ពអាកាសរុស្ស៊ីផងដែរ ដែលបណ្តាលឲ្យមានការឆាបឆេះយ៉ាងសន្ធោសន្ធៅ។

ម្តងហើយម្តងទៀត កងកម្លាំងអ៊ុយក្រែន តែងយកមីស៊ីលផ្គត់ផ្គង់ដោយលោកខាងលិចទៅវាយប្រហារចូលទឹកដីរុស្ស៊ី ក្នុងនោះរួមមានទាំងមីស៊ីលផ្លោង ATACMS របស់សហរដ្ឋអាមេរិក និងមីស៊ីល Cruise របស់បារាំងនិងអង់គ្លេសផងដែរ។

យ៉ាងណា ទីក្រុងមូស្គូតែងព្រមានមិនដាច់ពីមាត់ថា ការវាយប្រហារបែបនេះកំពុងទាញអង្គការណាតូឲ្យចូលរួមដោយផ្ទាល់នៅក្នុងជម្លោះនេះហើយ៕

អត្ថបទ៖ សុខ សុវណ្ណ

ចុចអាន៖ កូរ៉េខាងត្បូង អះអាងថា ទ័ពកូរ៉េខាងជើង ៣០០នាក់ស្លាប់ និង ២ ៧០០នាក់របួស នៅអ៊ុយក្រែន