ព័ត៌មានអន្ដរជាតិ

ស្ត្រីកែភេទ អាមេរិក កាត់ឆ្អឹងជំនីរខ្លួនឯងធ្វើមកុដ និងចង់បានរាងដែលប្រាថ្នា

បានផុស

២ ខែ មុន

នៅ

ថ្ងៃអង្គារ ១៤ មករា ២០២៥

ដោយ

រឿងរ៉ាវរបស់ស្ត្រីកែភេទ Emily James មានអាយុ ២៧ ឆ្នាំ មកពីរដ្ឋ Kansas សហរដ្ឋអាមេរិក បានធ្វើឲ្យមានការភ្ញាក់ផ្អើល និងបង្កជាជម្លោះចម្រូងចម្រាសក្នុងចំណោមអ្នកលេងអ៊ីនធឺណិតដោយសារតែនាងមិនស្ទាក់ស្ទើរក្នុងការចំណាយប្រាក់ដ៏ច្រើនចំនួន ១៧,០០០ ដុល្លារ លើការវះកាត់កែសម្ផស្សដកឆ្អឹងជំនីចេញ ដើម្បីទទួលបានរាងស្វែលក្នុងក្ដីស្រម៉ៃ។

ថ្លែងទៅកាន់ Caters News ស្រ្តីកែភេទរូបនេះបានបង្ហាញពីផែនការដ៏ចម្លែករបស់នាងថា គោលដៅរបស់នាងគឺដើម្បីទទួលបានចង្កេះតូចជាងដែលចង់បាន។ បន្ទាប់ពីវះកាត់ នាងត្រូវពាក់អាវទ្រនាប់ទាំងថ្ងៃទាំងយប់ ដើម្បីកាត់បន្ថយការហើម។

នាងបាននិយាយថាការឈឺចាប់របស់នាងមានត្រឹមតែ ២/១០ប៉ុណ្ណោះ ដោយសារតែការមើលថែរបស់ក្រុមវេជ្ជបណ្ឌិត និងគិលានុបដ្ឋាយិកា។ ដំណើរការវះកាត់និងការជាសះស្បើយរបស់ James ត្រូវបាននាងចែកចាយលើបណ្តាញសង្គម។ ការបង្ហោះទាំងនេះបានទទួលប្រតិកម្មចម្រុះពីសហគមន៍អនឡាញ។

ក្នុងអំឡុងពេលនៃការជាសះស្បើយ នាងបានចែករំលែកនៅលើអ៊ីនធឺណិតថា នាងបានយកឆ្អឹងជំនីរចេញសម្រាប់គោលបំណងកែសម្ផស្ស ហើយត្រូវបានអនុញ្ញាតឲ្យរក្សាវាទុក។ នាងក៏បានបង្ហើបពីគម្រោងធ្វើមកុដពីឆ្អឹងជំនីរទាំងនេះទុកជាវត្ថុអនុស្សាវរីយ៍ផងដែរ។

ការដកឆ្អឹងជំនីរចេញគឺជាការវះកាត់ក្នុងគោលបំណងទទួលបានចង្កេះតូចជាង ប៉ុន្តែត្រូវបានគេចាត់ទុកថាមានហានិភ័យខ្ពស់ និងមានភាពចម្រូងចម្រាសខ្លាំង។ ដោយប្រឈមមុខនឹងការចំអក និងយោបល់អំពីការសម្រេចចិត្តដ៏ចម្លែករបស់ខ្លួន នាងបានជ្រើសរើសមិនអើពើសូម្បីតែបន្តិច។

ស្រ្តីកែភេទរូបនេះក៏បានអះអាងទៀតថា៖ «ការដកឆ្អឹងជំនីរចេញមិនបានផ្លាស់ប្តូរការពិតថា ខ្ញុំជានារីកែភេទដែលមានចិត្តសប្បុរសនិងស្រឡាញ់ភេទដូចគ្នានោះទេ។ James បានសង្កត់ធ្ងន់ថា វាជាលុយរបស់ខ្ញុំ រាងកាយរបស់ខ្ញុំ ហើយខ្ញុំនឹងធ្វើអ្វីដែលខ្ញុំចង់បានជាមួយវា» ៕