ព័ត៌មានអន្ដរជាតិ

Greenland ចង់ជួបលោក ត្រាំ និយាយពីរឿងការពារជាតិ និងជីករ៉ែ

បានផុស

៤ សប្តាហ៍ មុន

នៅ

ថ្ងៃអង្គារ ១៤ មករា ២០២៥

ដោយ

Chheang

នាយករដ្ឋមន្ត្រី Greenland លោក Mute Egede បាននិយាយថា ដែនកោះរបស់លោកកំពុងសម្លឹងមើលការពង្រឹងទំនាក់ទំនងការពារជាតិ និងការរុករករ៉ែជាមួយសហរដ្ឋអាមេរិក ទោះបីជាប្រធានាធិបតីទើបជាប់ឆ្នោតលោក ដូណាល់ ត្រាំ បានប្រកាសក្ដែងៗថាចង់ទិញដែនកោះដ៏ធំរបស់ប្រទេសដាណឺម៉ាកនេះក៏ដោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ត្រាំ ធ្លាប់បានលើកឡើងពីគំនិតទិញយក Greenland តាំងតែពីអាណត្តិដំបូងរបស់គាត់មកម៉្លេះ ហើយបានពិពណ៌នាការគ្រប់គ្រងរបស់សហរដ្ឋអាមេរិកលើ Greenland ដែលជាដែនដីពាក់កណ្តាលស្វយ័តដាណឺម៉ាកថាជា «ភាពចាំបាច់ដាច់ខាត»។

លោក Egede បានលើកឡើងថា រដ្ឋាភិបាលរបស់លោកកំពុងស្វែងរកមធ្យោបាយដើម្បីធ្វើកិច្ចសហប្រតិបត្តិការជាមួយអាមេរិក ហើយបានត្រៀមខ្លួនរួចជាស្រេចដើម្បីចាប់ផ្តើមកិច្ចសន្ទនាជាមួយរដ្ឋបាលរបស់លោក ត្រាំ ដែលនឹងឡើងកាន់តំណែងនាថ្ងៃទី២០ខែមករាខាងមុខ ប៉ុន្តែលោកបានសង្កត់ធ្ងន់ថា កិច្ចសន្ទនានេះនឹងអាស្រ័យលើ Greenland ក្នុងការសម្រេចចិត្តថាត្រូវធ្វើដូចម្ដេច។

នៅពេលត្រូវបានសួរអំពីការពង្រីកសមត្ថភាពយោធារបស់អាមេរិកលើកោះអាកទិកដ៏ធំរបស់ខ្លួន លោក Egede បានឆ្លើយតបកាលពីថ្ងៃចន្ទថា៖ «ឯករាជ្យភាពរបស់ Greenland គឺជារឿងរបស់ Greenland ហើយក៏ទាក់ទងនឹងការប្រើប្រាស់ដីរបស់ខ្លួនផងដែរ ដូច្នេះវាក៏ជា Greenland ខ្លួនឯងដែលនឹងសម្រេចចិត្តថាតើយើងគួរតែឈានដល់កិច្ចព្រមព្រៀងអ្វី»។

ខណៈកាលពីសប្តាហ៍មុនលោក ត្រាំ មិនបានច្រានចោលការប្រើប្រាស់សក្តានុពលនៃមធ្យោបាយយោធា ឬសេដ្ឋកិច្ចដើម្បីទទួលបានការគ្រប់គ្រងលើ Greenland អនុប្រធានាធិបតីអាមេរិកដែលទើបជាប់ឆ្នោតលោក JD Vance បាននិយាយទៅកាន់ Fox News កាលពីថ្ងៃអាទិត្យ ដោយច្រានចោលការប្រើប្រាស់កម្លាំងយោធា ទោះបីជាលោកបានលើកឡើងពីសារៈសំខាន់ជាយុទ្ធសាស្ត្ររបស់ Greenland និងធនធានដ៏សម្បូរបែបរបស់វាក៏ដោយ។

ពាក់ព័ន្ធនឹងរឿងនេះ នាយករដ្ឋមន្ត្រី Greenland បាននិយាយថា៖ «វាគួរឲ្យបារម្ភនៅពេលយើងបានឮវាដំបូង។ ប៉ុន្តែអនុប្រធានាធិបតីបាននិយាយកាលពីម្សិលមិញថាពួកគេគ្មានបំណងក្នុងការប្រើប្រាស់អាវុធទេ។ បំណងរបស់យើងគឺនៅក្នុងកិច្ចសហប្រតិបត្តិការ»៕

ដោយ៖ ឈាង