រុស្ស៊ី ថា លោក បៃដិន ខំបង្កបញ្ហាមុនផុតអាណត្តិ ទុកឲ្យ ត្រាំ ចូលមកដោះស្រាយ

ក្នុងសន្និសីទកាសែតកាលពីថ្ងៃអង្គារទី១៤ខែមករាឆ្នាំ២០២៥ រដ្ឋមន្ត្រីការបរទេសរុស្ស៊ី Sergey Lavrov បានវាយប្រហារចំៗទៅលោក ចូ បៃដិន ដោយបន្ទោសថា ប្រធានាធិបតីផុតអាណត្តិអាមេរិករូបនេះ ខំបង្កបញ្ហាឲ្យច្រើនទុកឲ្យលោក ដូណាល់ ត្រាំ ដោះស្រាយពេលចូលជំនួសតំណែង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Lavrov លើកឡើងបែបនេះ ឆ្លើយតបទៅសំណួរទាក់ទិនការដាក់ទណ្ឌកម្មថ្មីរបស់អាមេរិកលើក្រុមហ៊ុនប្រេងយក្សរុស្ស៊ីចំនួន២គឺ Gazprom Neft និង Surgutneftegaz ក៏ដូចជាក្រុមហ៊ុនបុត្រសម្ព័ន្ធរបស់ពួកគេ រួមទាំង Naftna industrija Srbije (NIS) ដែលគ្រប់គ្រងការដឹកជញ្ជូនប្រេងរុស្ស៊ីទៅកាន់ស៊ែប៊ី និងប្រទេសក្បែរខាងអឺរ៉ុបផងដែរ។

រដ្ឋមន្ត្រីការរបទេសរុស្ស៊ីបន្តថា «​គណបក្ស​ប្រជាធិបតេយ្យ​ តែងមានចរិត​បែប​នេះ​ក្នុង​នយោបាយ​អាមេរិក។ មុនចប់អាណត្តិ ពូកគេ​ព្យាយាមបំផ្លាញ​រឿងគ្រប់យ៉ាង​ ទុកឲ្យរដ្ឋបាលបន្ទាប់ដោះស្រាយ។ ​តួយ៉ាងដូចជាមុនអាណត្តិដំបូងរបស់លោក ត្រាំ អ៊ីចឹង ដែលកាលនោះ ប្រធានាធិបតីខាងបក្សប្រជាធិបតេយ្យលោក បារ៉ាក់ អូបាម៉ា បានបណ្តេញអ្នកការទូតរុស្ស៊ី ១២០នាក់ចេញពីសហរដ្ឋអាមេរិក និងបានរឹបអូសទីតាំងការទូតរុស្ស៊ី៥កន្លែង ត្រឹមបីសប្តាហ៍ប៉ុណ្ណោះមុនពេលរដ្ឋបាលថ្មី ចូលគ្រប់គ្រង។ ដោយ​សារបញ្ហានេះហើយ វាមិនបានជួយឲ្យទំនាក់ទំនងរុស្ស៊ី-អាមេរិកល្អប្រសើរទេក្នុងឆ្នាំ២០១៧»។

យ៉ាងណាក្តី គេសង្ឃឹមថា រដ្ឋបាលថ្មីរបស់អាមេរិក នឹងអាចស្តារទំនាក់ទំនងជាមួយរុស្ស៊ី ដែលធ្លាក់ចុះដល់បាតទៅហើយនោះ ឲ្យងើបឡើងវិញ ខណៈថ្មីៗក៏មានសេចក្តីរាយការណ៍ដែរថា ប្រទេសស្វីស បាន​ប្រកាស​ត្រៀមខ្លួន​រួច​ជាស្រេច ដើម្បីធ្វើជាម្ចាស់ផ្ទះរៀបចំកិច្ចប្រជុំកម្រិតខ្ពស់រវាងលោក ត្រាំ និងលោក ពូទីន។

បើសិនជាជំនួបកំពូលកើតឡើងមែន ច្បាស់ណាស់មេដឹកនាំទាំងពីរមិនមែនពិភាក្សាគ្នាត្រឹមអំពីវិបត្តិនៃទំនាក់ទំនងទីក្រុងមូស្គូនិងវ៉ាស៊ីនតោនប៉ុណ្ណោះទេ តែក៏នឹងជជែកទាក់ទិនសង្គ្រាមរុស្ស៊ី-អ៊ុយក្រែនដែរ៕

អត្ថបទ៖ សុខ សុវណ្ណ

ចុចអាន៖ លោក​ ត្រាំ ចង់​ជួប​ ពូទីន ឲ្យ​បាន​លឿន​ក្រោយ​ឡើង​កាន់​តំណែង