ព័ត៌មានអន្ដរជាតិ

លោក Netanyahu៖ កិច្ចព្រមព្រៀងដោះដូរអ្នកទោស ជិតត្រូវបញ្ចប់រួចរាល់មែនទែនហើយ

បានផុស

១ ខែ មុន

នៅ

ថ្ងៃពុធ ១៥ មករា ២០២៥

ដោយ

Chheang

នាយករដ្ឋមន្ត្រីអ៊ីស្រាអែលលោក បេនចាមីន ណេតាន់យ៉ាហ៊ូ បាននិយាយថា កិច្ចព្រមព្រៀងដោះដូរអ្នកទោសជាមួយក្រុមសកម្មប្រយុទ្ធហាម៉ាស អាចត្រូវបានបញ្ចប់ក្នុងរយៈពេលត្រឹមតែប៉ុន្មានម៉ោង ឬប៉ុន្មានថ្ងៃខាងមុខទៀតប៉ុណ្ណោះ។

លោក បេនចាមីន ណេតាន់យ៉ាហ៊ូ (រូបភាព៖ Reuters)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមការចុះផ្សាយរបស់សារព័ត៌មានក្នុងស្រុក Channel 12 និង Yedioth Ahronoth កាលពីថ្ងៃទី១៤ខែមករាឆ្នាំ២០២៥ លោក ណេតាន់យ៉ាហ៊ូ បានលើកឡើងថា លោកបានត្រៀមខ្លួនរួចជាស្រេចសម្រាប់បទឈប់បាញ់ដែលមានរយៈពេលយូរអង្វែងមួយ ក្នុងលក្ខខណ្ឌដែលចំណាប់ខ្មាំងទាំងអស់ត្រូវបានដោះលែងត្រឡប់មកវិញ។

មេដឹកនាំអ៊ីស្រាអែល បាននិយាយថា៖ «វាត្រឹមតែប៉ុន្មានថ្ងៃឬប៉ុន្មានម៉ោងខាងមុខ។ យើងកំពុងរង់ចាំការឆ្លើយតបរបស់ក្រុមហាម៉ាស ហើយបន្ទាប់មកយើងអាចចាប់ផ្តើមបានភ្លាមៗ»។

លោក ណេតាន់យ៉ាហ៊ូ បានបញ្ជាក់ជាថ្មីថា ការរីកចម្រើននៃកិច្ចព្រមព្រៀងអាស្រ័យលើការឆ្លើយតបរបស់ក្រុមហាម៉ាស ដោយបន្ថែមថា៖ «ក្រុមហាម៉ាសមិនទាន់បានឆ្លើយតបទេ។ អ្វីគ្រប់យ៉ាងដែលលើកឡើងនៅក្នុងរឿងនេះគឺគ្រាន់តែជាការរំពឹងទុកប៉ុណ្ណោះ។ នៅពេលដែលប្រធានាធិបតីទើបជាប់ឆ្នោតរបស់សហរដ្ឋអាមេរិក លោក ដូណាល់ ត្រាំ ចូលកាន់តំណែងនៅថ្ងៃទី២០ខែមករា ច្បាប់នៃការប្រកួតប្រជែងនឹងផ្លាស់ប្តូរយ៉ាងខ្លាំង»។

លោក ណេតាន់យ៉ាហ៊ូ ក៏បានចេញការព្រមានជាមុន ដោយបញ្ជាក់ថា៖ «ការរំលោភបទឈប់បាញ់ណាមួយនឹងត្រូវជួបជាមួយនឹងការឆ្លើយតបដ៏ធ្ងន់ធ្ងរ ហើយវាជាប្រភេទនៃសង្គ្រាមដែលយើងមិនធ្លាប់បានឃើញពីមុនមក»។

សូមបញ្ជាក់ថា បច្ចុប្បន្ន អ៊ីស្រាអែលមានអ្នកទោសប៉ាឡេស្ទីនជាង ១០ ៣០០នាក់ ខណៈដែលគេប៉ាន់ស្មានថា ជនជាតិអ៊ីស្រាអែល ៩៨នាក់ កំពុងត្រូវបានឃុំខ្លួននៅហ្គាហ្សា។

អ៊ីស្រាអែលបានបន្តសង្រ្គាមរបស់ខ្លួនលើតំបន់ហ្គាហ្សា ដែលបានសម្លាប់មនុស្សជាង ៤៦ ០០០នាក់ ភាគច្រើនជាស្ត្រី និងកុមារ ចាប់តាំងពីការវាយប្រហាររបស់ពួកហាម៉ាសកាលពីថ្ងៃទី៧ខែតុលាឆ្នាំ២០២៣ បើទោះបីជាមានសេចក្ដីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិអំពាវនាវឲ្យមានបទឈប់បាញ់ជាបន្ទាន់ក៏ដោយ៕

ដោយ៖ ឈាង

ចុចអាន៖ ៣ចំណុចសំខាន់ៗ ពាក់ព័ន្ធនឹងបទឈប់បាញ់តំបន់ហ្គាហ្សា ដែលកំពុងចរចារវាងអ៊ីស្រាអែលនិងហាម៉ាស